Haiꞌouna neꞌinaa aꞌa fei losuu yei Thessalonica, fei losuu aꞌa mei Haidaa, mei Amaa oꞌou mawe mei Fasu Jesus Christ.

2 Fei rawaniꞌa ma gutafarawania i ude aꞌa hamuꞌou, noramiana aꞌa mei Haidaa, mei Ama mawe mei Fasu Jesus Christ.

3 Ranimai haiꞌouneipaꞌaa ware ‘ta’ aꞌa mei Haidaa uaa hamuꞌou ena lofu ma na rawani aleꞌei uaa fei weꞌiaa naranaraa hamuꞌou, fimina gipe apoiꞌualao ma fei fihaguiaa hememea hamuꞌou ana fi gipelao. 4 Siꞌei, i dupuaa ei losuu mei Haidaa, haiꞌouna mamagugu uꞌugaa fei apitaia ma weꞌiaa naranaraa hamuꞌou wagii minaa ei haperararaia ma manimania, ei hamoꞌei tonia eꞌeni.

5 Minaa eꞌei na famaꞌaia ba fei dududuaa mei Haidaa na wanewane ma siꞌei uniꞌunina ba na rawani ba hamopowe guta aꞌa fei haparaiaa mei Haidaa, fei hamoꞌei to fiꞌia wagina. 6 Mei Haidaa, hia na wanewane: Iwe fagianainaa ei rona fafeloaa hamuꞌou 7 ma fani hawenia aꞌa hamuꞌou ena na paꞌi awataa ma aꞌa haiꞌou anaa. Ipowe nomai ei ena na faꞌarewamai pafea mei Fasu Jesus fininaa fei nalenaleaa hafi fipuinaa ei aloꞌalona, ei rona faufau. 8 Iwe fanimaꞌaiaa ei lomi rona apaꞌaa mei Haidaa ma guaineneraa fei rawaniꞌa wareaa mei Fasuu oꞌou Jesus. 9 Ropowe tonaa fei lagi lomi i pedutoo ma lomi roꞌawe u inamoaa mei Fasu ma fei haparaiana, fei na faufau. 10 Ma i aleꞌei wagii fei arewaa na nomai ba i to hawerana i aꞌa ei ramaꞌa gufuna, ei rona apunai ma ba i famalefaiaa ei narafaweꞌia. Ma hamuꞌou aꞌa roꞌou uaa hamona narafaweꞌi aꞌa tamanu haiꞌouna uꞌufanaa hamuꞌou.

11 Hefei na ude naranaraa haiꞌou ei haiꞌounaꞌaida lafulafunaa hamuꞌou ba mei Haidaniaa oꞌou nei nara ba fei rafeiana hamuꞌou na paꞌi hanuna ma ba wagii fei faufauna, i fagipeaa minaa ei rawaniꞌa bigiꞌaa hamuꞌou ma minaa ei rawaniꞌa maumau hamuꞌou, ei na faꞌasiꞌanaa ei narafaweꞌiaa hamuꞌou. 12 Haiꞌouꞌei lafulafu aleꞌei ba fei haraa mei Fasuu oꞌou Jesus nei to hawerana i aꞌa hamuꞌou ma hamuꞌou i aꞌana aleꞌei fei rawaniꞌaa mei Haidaniaa oꞌou mawe mei Fasu Jesus Christ.^b