Ronei Lafulafu
3
Hee, siꞌei, ena lofu, hamonei lafulafunaa haiꞌou ba fei uꞌugaa mei Fasu nei tale batafa ma ba ei ramaꞌa nei maꞌauia ana aleꞌei aꞌa hamuꞌou. 2 Ma hamonei lafulafu ba mei Fasu nei tataꞌainaa haiꞌou wagii ei manitoai mawe ei hafeloꞌa ramaꞌa, uaa aꞌa ba minaa ei ramaꞌa rona paꞌi fei narafaweꞌia. 3 Maꞌuaa, mei Fasu na oafagugu ma iwe faweꞌiaa hamuꞌou ma wagiꞌinaa hamuꞌou aꞌa mei hafeloꞌa. 4 Haiꞌounapaꞌaa oꞌugaa mei Fasu ba hamoꞌei neneraa ei wareaa haiꞌou ma biginenegiꞌuaialao. 5 Ma laloo iaa hamuꞌou, mei Fasu i unifanaa hamuꞌou fei haguaa mei Haidaa ma fei apitaiaa Christ.Fei Wareꞌaweia wagii fei Tamafoia
6 Wagii fei haraa mei Fasu Jesus Christ haiꞌou warefaweꞌi aꞌa hamuꞌou ena lofu, ba hamonei faraua aꞌa ei rona tamafoi, ei lomi rona neneraa ei feroiaa hamona tonia aꞌa haiꞌou. 7 Uaa hamuꞌou ana na aida ba batanai hamonei neneraa fei maumau haiꞌou. Ei haiꞌou aꞌa hamuꞌou, lomi haiꞌouna panimadumui 8 ma ana lomi haiꞌouna hanaiaa hanaa hemeadiai nabaa lomi haiꞌouna ponoꞌia. Agia, poi ma arewaa, haiꞌouna bigi maguhagu ba lomi haiꞌouꞌaa fani rarabaa aꞌa hemea hamuꞌou. 9 Faꞌua ba haiꞌouna paꞌi fei forafora ba haiꞌou ware ba hamoneipaꞌaa hadumaa haiꞌou, maꞌuaa haiꞌouna bigiꞌaa fei ba haiꞌou aleꞌei famaꞌamaꞌa ba hamonei neneraa haiꞌou. 10 Uaa ei ana haiꞌou i aꞌa hamuꞌou haiꞌouna ware aleꞌei aꞌa hamuꞌou ba: “Nabaa nemea ramaꞌa lomi i bigi, ana lomi i hanana.”
11 Haiꞌouna guainia ba hefiꞌa hamuꞌou na tamafoi. Lomi rona panitawei, maꞌuaa rona fawaduꞌai ua aꞌa ei pidawaiaa hefiꞌa. 12 Aꞌa ei ramaꞌa aleꞌei, haiꞌouꞌaa warefaweꞌi aꞌa fei faufau mei Fasu Jesus Christ ba ronei gutafarawani ma bigitoo hanaa roꞌou. 13 Ma aꞌa hamuꞌou, ena lofu, hamonei wewea bigiꞌaa ei na wanewane.
14 Nabaa nemea lomi na guainaa ei feroiaa haiꞌou laloo feni neꞌia feni, pupudainia. Faraua aꞌana ba i famamafaiaa anaia. 15 Apuna nara ba hia hemea bidibidii unu, maꞌuaa aweinia aleꞌei hemea lofu.
Ei Famafufuoia
16 Na rawani ba mei Fasu, mei i fanaa fei gutafarawania, i fani gutafarawania ranimai aꞌa minaa ei tala. Mei Fasu nei gutafipui aꞌa minaa hamuꞌou.
17 Yau Paul, na neꞌinaa feni famafufuoia aꞌa feni paniu ba aleꞌei paꞌaa lalau aꞌa minaa ei neꞌiau. Sifei fei maumau neꞌiau.
18 Fei rawaniꞌaa mei Fasuu oꞌou Jesus Christ i ude i aꞌa minaa hamuꞌou.