Batanai fei Mau Gutafafaꞌaraia
3
Siꞌei ba hamona asiꞌafipui aꞌa Christ, labaginaa ei manumanuu pafea fawelei i guta wagina Christ raudei maꞌau mei Haidaa. 2 Augaa ei naranaraa hamuꞌou aꞌa ei manumanuu pafea ma aꞌa ba eni manumanu yeni pu. 3 Uaa hamona maꞌe ma ei harenuaa hamuꞌou na opaꞌai aꞌa Christ fininaa mei Haidaa eꞌeni. 4 Ena na nomai Christ, mei harenuaa hamuꞌou,a ana hamoꞌaa ufipui aꞌana wagii fei hawera. 5 Siꞌei, hamonei famaꞌeaa hamuꞌou aꞌa ei maumau feni ano: ei fitatafipaꞌaia, ei abaa fafaꞌaraia, laraa huwi, nunumiaa unu, fei wawaꞌai poa, fei losuinaa ei haidaa sifisifi. 6 Fei sibaa mei Haidaa fi nomaib uaa eꞌei manumanu eꞌei. 7 Mina, hamona panarofaa eꞌei manumanu eꞌei aꞌa fei tatalaiaa hamuꞌou. 8 Maꞌuaa eꞌeni, hamonei faraua aꞌa minaa eni manumanu eni: sibasibaa, fifiꞌii unu, bidibidii unu, uꞌufafeloaa ramaꞌa ma ena hafeloꞌa warea na leleꞌamai habaꞌumuu hamuꞌou. 9 Apuna fisifisifiꞌii aꞌa hememea hamuꞌou, hamatee hamona simidigaa fei watanai hube fininaa ei manitoaia wagina 10 ma hamona fahawaiaa fei manufau hube, fei ifi farawaninaa hamuꞌou wagii fei apaꞌa aꞌa fei haduoo mei i Famamaraia. 11 Aꞌa fei, lomi manumanu ba hemea, hia Greece o Jew, na moro o lomi, o hemea na uꞌugai maumau gufuna, o hia Barbaria, o gufuna Scythia, humuwa o loꞌe, maꞌuaa Christ, hia aleꞌei minaa ei ma na oafipui aꞌa minaa ei.
12 Mei Haidaa na rafeinaa hamuꞌou ena fafaꞌaraia ma napaꞌaa haguaa hamuꞌou ma siꞌei hamonei lalawainaa fei faloloaꞌia, firawania, fafefenaa pu, madumuia ma ofasisia. 13 Gutafirawanii ua ma futoaa tamanu watolaa hememea hamuꞌou. Futoia aleꞌei fei futoaa mei Fasu ei hafeloꞌaa hamuꞌou. 14 Ma aꞌa minaa eꞌei manumanu eꞌei, lalawainaa fei hagua, fei na hupiꞌifi-puinaa roꞌou aꞌa hepalo paꞌafi.
15 Fei gutafarawaniaa Christ nei famamoaa ei naranaraa hamuꞌou, uaa siꞌei ba hamuꞌou maroaa hepalo ua paꞌafi ba hamonei gutafirawanii ua ma nei paꞌi fei mau wareaa ‘ta’. 16 Fei wareaa Christ neimina oa i naranaraa hamuꞌou ena hamona feroi ma fiwawagiꞌinaa hamuꞌou wagii minaa ei apaꞌa ena hamona laugaa ei psalm ma ei laugaa losuu fininaa niꞌeniꞌeaa ei naranaraa hamuꞌou aꞌa mei Haidaa. 17 Ma tamanu hamona bigiꞌia, nabaa warewarea o bigiꞌa, bigiꞌaa minaa ei wagii fei haraa mei Fasu Jesus ma i aꞌana ware ‘ta’ aꞌa mei Haidaa, mei Ama.
Batanai fei Mau Gutanaa ei Losuia
18 Ena pifine haroo lalai, fafefefanaa ena haroo hamuꞌou, ana aleꞌei tamanu na rawani aꞌa mei Fasu.
19 Ena wawane haroo lalai, haguaa ena haroo hamuꞌou ma apuna paniratarataiaa roꞌou.
20 Ena baduu, guainaa wareaa ei ama ma inaa hamuꞌou aꞌa minaa ei manumanu, uaa fei na faniꞌeniꞌeaa mei Fasu.
21 Ena ama, apuna famamalouaa iaa ena naꞌuu hamuꞌou aleꞌei ba roꞌaa faloloaꞌi.
22 Ena humuwa, aꞌa minaa ei manumanu, guainaa ena fasuu hamuꞌou i pu; ma aꞌa ba i puda ua roꞌou ba roꞌaa nara ba hamona rawani, maꞌuaa paꞌaa guainaa roꞌou fininaa fei maꞌaua aꞌa mei Fasu. 23 Tamanu ei bigiꞌaa hamuꞌou, hamoneimina bigifanimaꞌaia, aleꞌei ba hamoꞌaa bigiꞌia aꞌa mei Fasu ma abaa aꞌa ramaꞌa, 24 uaa, hamona aida ba hamowe to manumanu aꞌa mei Fasu aleꞌei ponoꞌa. Paꞌaa paꞌafii fei bigiꞌaa hamuꞌou, Christ. 25 Hini i bigifatata, ana i tonaa fei arena ma lomi papaꞌaa unu wagii fei.