2 Tonaa fei mau lafulafua fininaa fei mau ofafaufau ma fei mau warea ‘ta’. 3 Ma ana lafulafunaa haiꞌou ba mei Haidaa i fani talaa fei uꞌuga ba haiꞌouꞌaa uꞌugaa fei manumanuu Christ, fei na ude opaꞌai, fei una boboꞌai wagina eni. 4 Lafulafu ba unei uꞌufaꞌarewainia. 5 Naramaꞌaia ba ei mau hamuꞌou aꞌa ei ramaꞌaa roromaa batanai; hamonei rofaa minaa ei tala i nomai aꞌa hamuꞌou. 6 Ranimai ei warewareaa hamuꞌou nei rawani ua, aleꞌei duꞌua na paꞌi maꞌida agina ba hamoꞌaa aida batanai suhadumaa hini i iꞌiginaa hamuꞌou.

7 Tychicus i warefanaa hamuꞌou ba yau batanai. Hia hemea rawaniꞌa lofu, hemea wewea nafii mei Fasu. 8 A aloiawau aꞌa hamuꞌou ba hamonei^a aida ba batanai fei gutanaa haiꞌou ma i faꞌunuwenuweaa naranaraa hamuꞌou. 9 I nogiawii Onesimus, hemea wewea ma rawaniꞌa lofuu oꞌou, mei gufuu hamuꞌou. Laguꞌaa warefanaa hamuꞌou minaa eni manumanu na nomai aꞌa haiꞌou yeni.

10 Meni i boboꞌai i aꞌau, Aristarchus na famafufuoinaa hamuꞌou ma Mark anaa, meni lofuu Barnabas. (Hamona guaidigia ba nabaa i nomai aꞌa hamuꞌou, taufaꞌugia.) 11 Jesus, mei ana harana Justus, ana na aloawii fei famafufuoiana. Roꞌou ua, ei Jew yeni ba rona bigifipui aꞌau wagii fei haparaiaa mei Haidaa ma rona famaꞌaia ba roꞌou, aleꞌei palarau. 12 Epaphras, mei gufuu hamuꞌou ma ana nafii Christ Jesus, na aloawii fei famafufuoiana. Ranimai inaꞌaida lafulafufaweꞌi ba hamonei ofafaufau aꞌa minaa ei nunumiaa mei Haidaa ma hamonei aꞌu ma oꞌugi ua. 13 Uꞌeipaꞌaa warefaꞌuai ba hia, hemea weweaa aꞌa ei bigiꞌaa hamuꞌou ma ei yei Laodicea ma yei Hierapolis. 14 Mei paꞌaa tafii oꞌou Luke, mei loꞌotaa mawe Demas, laguna aloawii fei famafufuoiaa lagua. 15 Fanaa fei famafufuoiau aꞌa ei lofu yei Laodicea ma aꞌa Nympha mawe ei losuia yei humuna.

16 Ena rona igofanidigaa hamuꞌou feni neꞌiau, te, fanaa ei losuia yei Laodicea ba ronei igoia ma hamonei igoaa fei neꞌiau aꞌa roꞌou.

17 Warefanaa Archippus ba neidii fapedugaa fei bigiꞌa, fei na fania mei Fasu.

18 Yau, Paul, na neꞌinaa feni aꞌa feni paniu. Nonominia ba yau boboꞌaia. Fei rawaniꞌa i ude i aꞌa hamuꞌou.