2
Apaꞌaa warefaꞌaiaa hamuꞌou ba unamina tonaa awatau uaa hamuꞌou ma ei roꞌou yei Laodicea mawe minaa ei rotawe apaꞌau. 2 Fei nunumiau, sifei ba unei faꞌunuwenuweaa naranaraa roꞌou ma oafipui aꞌa fei hagua ba roneimina apaꞌifarawaninaa fei manumanu opaꞌaiaa mei Haidaa. Ma Christ, ana hia fei opaꞌaia fei. 3 Ma na ude opaꞌai i aꞌana minaa ei rawaniꞌa manumanuu onaꞌonaia apaꞌa ma apaꞌifarawania. 4 Una warefanaa hamuꞌou fei ba lomi nemea i sifiꞌaa hamuꞌou aꞌa ei hofeia warea. 5 Uaa faꞌua ba yau lomi napaꞌaa gutafipui aꞌa hamuꞌou yena, maꞌuaa fei naranarau, i aꞌa hamuꞌou ma una niꞌeniꞌe ba ei manumanuu hamuꞌou na udefarawani ua ma naminapaꞌaa weꞌi naranaraa hamuꞌou aꞌa Christ.Fei Oafipuia aꞌa Christ i Alaraa Oꞌou
6 Siꞌei, ana aleꞌei hamona tonaa Christ Jesus ba hia Fasu, ana hamonei oafipuiwau aꞌana. 7 Nei gugu waraa hamuꞌou ma habefarawani aꞌana ma faweꞌiaa naranaraa hamuꞌou ana aleꞌei fei feroia hamona todigia fininaa baua warea ‘ta’.
8 Omaꞌaa hamuꞌou ba lomi nemea i boboꞌainaa hamuꞌou aꞌa ei naranara lomi paꞌafina aleꞌei ba i sifiꞌaa hamuꞌou ba hamoꞌaa neneraa ei maumau ramaꞌa ma fei maumau feni ano ba lomi hamoꞌaa neneraa Christ.
9 Uaa aꞌa Christ, minaa ei maumau mei Haidaa na oa laloo fei hudi ununa. 10 Ma hamona todigaa minaa ei manumanu aꞌa Christ, mei na pafeai laraa minaa ei faufaua ma ei forafora. 11 Aꞌa ba hamona moroꞌaa hudii wawanei aꞌa ei panii ramaꞌa, maꞌuaa i aꞌana hamona siminaa ei hafeloꞌa maumaua ma tonaa fei mau moroꞌa, fei Christ na bigiꞌia aꞌa hamuꞌou. 12 Ma hamona iꞌifaifipui aꞌana wagii fei pudugufaia ma asiꞌafipui aꞌana wagii fei weꞌiaa naranara aꞌa fei faufau mei Haidaa, mei i faꞌasiꞌania aꞌa fei maꞌea.
13 Mei Haidaa na famamaꞌaa hamuꞌoub aꞌa Christ ma na bigiꞌia ei hamona oa aleꞌei maꞌea wagii ei hafeloꞌaa hamuꞌou ma fei hafeloꞌa maumau,c fei aleꞌei ba lomi hamona moro. Ina futoaa minaa ei hafeloꞌaa oꞌou. 14 Ina fapedugaa ei neꞌia wagii ei law ba onei maꞌe, ei na lawaraa oꞌou ma ei na fadugeaa oꞌou ma na fadufitaninia aꞌa fei hawafolo. 15 Ina todigaa ei finefinee foꞌaa ei faufaua, ei forafora ma fafafanunuaa roꞌou pudaa ramaꞌa ei i muainaa roꞌou aꞌa fei hawafolo.d
16 Siꞌei, nemea neiꞌaa warefabiyeinaa hamuꞌou wagii tamanu hamona hanaia, o hunumia, o manumanu losuia, o hamamani aꞌa fei sufuaa puda, o hepalo arewaa Sabbath. 17 Eꞌei, hanunu ua tamanu ba i nomai. Maꞌuaa fei paꞌafina ana Christ ua. 18 Nabaa nemea na niꞌeniꞌe aꞌa fei mau sifisififafefenaa pu o ba i losuinaa ei aloꞌalo, mei ramaꞌa mei neiꞌaa lawaraa hamuꞌou aꞌa fei rawaniꞌa, fei ba hamoꞌaa tonia. Mei ramaꞌa aleꞌei, namina uꞌuwewesinaa tamanu na fanunuia ma fei hafeloꞌa naranarana na famamaguguia aꞌa hefiꞌa naranara lomi paꞌafina. 19 Ina mora fei hupupuꞌina aꞌa mei hia Taba, mei i aꞌana minaa fei paꞌafi na panaroo ma hupuꞌai aꞌa ei wao hudi unu ba nei gipelao aleꞌei i fagipeia mei Haidaa.
20 Siꞌei ba aꞌa Christ hamona maꞌediꞌininaa ei maumau feni ano, tani ei banaꞌaa hamuꞌou manumanuna, te ana hamuꞌou fi neneraa ei mau wareana ba 21 “Apuna panarofia! Apuna hanaia! Apuna idoia!”? 22 Minaa eꞌei, ropowe apaꞌai, uaa fafasuii roꞌou, ei warea ma feroiaa ramaꞌa. 23 Eꞌei warea ba nei bigi aleꞌei, fei maumauna aleꞌei manumanuu apaꞌa fininaa fei maumau losuia ana bigiꞌuaa roꞌou naranaraa roꞌou, fei mau sifisififafefenaa pu ma fei mau omaꞌaa roꞌou hudi unu, maꞌuaa eꞌei manumanu eꞌei, paꞌaa lomi ba roꞌaa paunaipaꞌaa ei nunumiaa unu.