2 Feni neiꞌa i dinaa aꞌa ei lofu rona oafagugu^a ma fafaꞌarai aꞌa Christ yei Colosse.

Fei rawaniꞌa ma gutafarawania i dinaa aꞌa hamuꞌou, noramiaa lagua aꞌa mei Haidaa, mei Amaa oꞌou.^b

3 Ranimai haiꞌouna ware ‘ta’ ma lafulafunaa hamuꞌou aꞌa mei Haidaa, mei hia Amaa mei Fasuu oꞌou, Jesus Christ, 4 uaa, haiꞌouna guainia ba na weꞌi naranaraa hamuꞌou aꞌa Christ Jesus ma fei haguaa hamuꞌou minaa ei apunaiaa mei Haidaa— 5 fei weꞌiaa naranara ma fei hagua, noramiaa lagua aꞌa fei oꞌonaia unu—fei na ude omaꞌaa hamuꞌou i pafea, fei hamona guaidigia laloo fei faꞌuai warea, fei rawaniꞌa warea, 6 fei na dinaa aꞌa hamuꞌou. Aꞌa minaa ei gufu tadiweꞌai, fei rawaniꞌa warea ana fi fufuailao ma gipelao, ana aleꞌei aꞌa hamuꞌou aꞌa fei arewaa hamonadoꞌo guainia ma apaꞌaa fei rawaniꞌaa mei Haidaa fininaa minaa ei faꞌuai warea wagina. 7 Hamona to feroia aꞌa Epaphras, mei rawaniꞌa nafi rarafii oꞌou, mei na bigiꞌoafagugu wagii fei bigiꞌaa Christ aꞌa oꞌou,^c 8 mei ana na warefanaa haiꞌou fei haguaa hamuꞌou fininaa fei Spiriti.

9 Sifei fei paꞌafina ba wagii fei rawarawa arewaa haiꞌouꞌaa guainaa uꞌugaa hamuꞌou, lomi haiꞌouna fafaa lafulafunaa hamuꞌou ma iꞌiginaa mei Haidaa ba hamoneimina paꞌi minaa ei onaꞌonai apaꞌa ma apaꞌifarawaninaa ei manumanu wagii fei Spiriti uaa ba hamonei apaꞌifarawaninaa fei nunumiana. 10 Ma ei haiꞌou lafulafu aleꞌei, sifei ba hamonei talaifarawani ua i pudaa mei Fasu ma faniꞌeniꞌeia aꞌa minaa ei mau tatalaiaa hamuꞌou ba hamoꞌaa paꞌi fua aꞌa minaa ei rawaniꞌa bigiꞌa ma nei nogipelao fei apaꞌaa hamuꞌou mei Haidaa 11 ma tonaa minaa ei faufau na puduaa fei rawaniꞌa faufauna ba hamoꞌaa apitai ma ofasiꞌia. Ma fininaa niꞌeniꞌea 12 hamoꞌaa ware ‘ta’ aꞌa mei Ama, mei na uga ba hamoꞌaa^d tonaa fei gutana fipui aꞌa ei apunaiaa mei Haidaa wagii fei haparaiaa fei weꞌai. 13 Uaa, ina fatelaꞌanaa oꞌou aꞌa fei haparaiaa fei roromaa ma na dugaa oꞌou, waduꞌainaa fei haparaiaa mei Naꞌu, mei hia na haguia, 14 mei i aꞌana ona paꞌi fei ponohadiweꞌia,^e fei i futoaa ei hafeloꞌa.

15 Hia mei haduoo mei Haidaa, mei lomi o fanunupaꞌia ma hia mei rawarawa waninia wagii minaa ei manumanu na mamaraimai. 16 Siꞌei ba hia, ei manumanu, rona mamaraimai: ei manumanu i pafea ma yeni malagufu, manumanu ona fanunupaꞌia ma ei na tapu, ei gutanaa hapara, ei manumanu faufaua, ei bauaniaa gufu, ei forafora; minaa ei manumanu famamarana ma ana manumanuna. 17 Hia maꞌaa minaa ei manumanu ma i aꞌana minaa ei manumanu na hupiꞌifipui. 18 Hia tabaa fei hudi unu, fei losuu. Hia mei rawarawa ma umaꞌua aꞌa ei maꞌea ba aꞌa minaa ei manumanu, hia nei pafeai. 19 Uaa mei Haidaa na niꞌeniꞌe ba minaa ei maumauna na oa i laloo iaa mei naꞌuna. 20 Ma ba hia mei i fafirawaninaa watolaa minaa ei manumanu ma mei Haidaa—ei manumanu yeni pu ma i pafea, uaa ina fawanewaneaa eꞌei aꞌa fei namona, fei na wigii pafoo fei hawafolo.

21 Mina, hamona raua aꞌa mei Haidaa ma na paꞌi bidibidi unu laloo naranaraa hamuꞌou uaa^f fei hafeloꞌa bigiꞌaa hamuꞌou. 22 Maꞌuaa eꞌeni lomi watolana ma hamuꞌou uaa fei hudi unuu Christ wagii fei maꞌeana ba i faꞌugaa hamuꞌou fininaa fafaꞌaraia i pudana. Ma fai lomi maꞌida lolo ma warea ba hamona tata 23 nabaa fei narafaweꞌiaa hamuꞌou i udelao ma hamoꞌaa ofafaufau ma lomi na asisi fei oꞌonaia unuu hamuꞌou, fei na norai aꞌa fei rawaniꞌa warea. Sifei fei rawaniꞌa warea, fei hamona guaidigia, fei rona uꞌugia aꞌa minaa ei manumanu i haroo pafea, fei yau, Paul, na oanaa nafi wagina.

24 Siꞌei, una niꞌeniꞌe aꞌa tamanu fiꞌia una tonia uaa hamuꞌou. Ma una tonia aꞌa fei unuu tamanudiai atawe tonia Christ wagii fei hudi ununa ma fei, aleꞌei fei losuu. 25 Yau nawe aleꞌei nafina aꞌa fei rafeiaa mei Haidaa ba a uꞌufapedufanaa hamuꞌou fei wareaa mei Haidaa 26 fei manumanu opaꞌai, fei na ude opaꞌai aꞌa ei pai mina ma aꞌa ei au na didii, fei nawe udeꞌareꞌare aꞌa ei apunaiaa mei Haidaa eꞌeni. 27 Aꞌa roꞌou, mei Haidaa na nunuminia ba famaꞌamaꞌaa ei Gentile fei rawaniꞌa hawera wagii feni manumanu opaꞌaia, sifei ba Christ, hia na oa laloo iaa hamuꞌou. Ma fei, aleꞌei fei oꞌonaia unuu fei hawera.

28 Haiꞌouna uꞌu ba hia hini ma wagiꞌinaa minaa ei ramaꞌa ma feroinaa roꞌou aꞌa minaa ei onaꞌonai apaꞌa ba haiꞌouꞌaa faꞌugaa minaa ei aꞌa Christ, ba lomi tataa roꞌou. 29 Ba uꞌa bigipedugaa fei, una bigimaguhagu ma hapafugoi fininaa minaa ei faufauna, fei namina faweꞌiau.