2 Omaꞌaa hamuꞌou aꞌa ena ponoto, ena ramaꞌa bigiꞌaa hafeloꞌa, ena rona moroꞌaa hudi unu. 3 Uaa fei paꞌaa moroꞌaa hudii wawanei sifei ba oꞌou eni na losui aꞌa fei Spiritii mei Haidaa, na uduginaa Christ Jesus ma lomi ona oꞌugaa raraa unuu oꞌou— 4 maꞌuaa, nabaa una nunumai, na paꞌi paꞌafina aꞌau ba a oꞌugaa raraa unuu.

Nabaa nemeadiai na nara ba na paꞌi paꞌafina ba i oꞌugaa raraa ununa, yau na muainia: 5 Na moro hudii wawaneiu i laloo fei fafainaroaa arewaa, yau hemea ramaꞌaa Israel, yau pai Benjamin, hemea paꞌaa Hebrew; ma i aꞌa fei law, yau Pharisee; 6 aꞌa fei patarefurefua, una haperaraiaa ei losuia; aꞌa fei wanewaneaa fei law, lomi hepalo tatau.

7 Maꞌuaa wagii ei unadoꞌo to fararawaniu, eꞌeni una nara ba lomi awataa roꞌou laraa Christ. 8 Hepalodiai, una nara ba minaa ei manumanu, manumanuu paꞌaia laraa fei rawaniꞌa, fei napaꞌaa mua ba unei apaꞌifarawa-ninaa Christ Jesus, mei Fasuu, mei una fapaꞌainaa minaa ei manumanu uaa hia. Una nara ba ei manumanu ei, aleꞌei meme laraa fei ba unei tonaa Christ 9 ma oafipui aꞌana. Ma lomi ba a tonaa fei wanewanea ana yau, fei i nomai aꞌa fei law, maꞌuaa fei i nofipuimai wagii fei narafaweꞌia aꞌa Christ—fei wanewanea noranamai aꞌa mei Haidaa, fei ba otonia aꞌa fei narafaweꞌia. 10 Yau ba a minaa apaꞌaa Christ ma fei faufau fei asiꞌanana ma porofipui aꞌana ei fiꞌina ba unei aleꞌei hia aꞌa fei maꞌeana 11 ma ba unei tonaa fei asiꞌana aꞌa ei maꞌea.

12 Aꞌa ba una todigaa ei manumanu ei, o ba una fafaꞌaraidii, maꞌuaa ufimina ofasiwaiwai ba a panarofaa fei na panaronaa yau wagina Christ Jesus. 13 Ena lofuu, lomi una nara ba una panarodigia. Maꞌuaa hepalo ua manumanu ba unei bigiꞌia sifeni: Unei madiꞌinaa ei na ude i mugiu ma roaipanarofaa fei i ude i maꞌau. 14 Una didigiwaiꞌualao wagii fei nunumiau ba a muai tonaa fei ponoꞌa, fei i haronaa yau pafea mei Haidaa uaa Christ Jesus.

15 Minaa oꞌou eni na aꞌu, nei paꞌi fei naranara aleꞌei. Ma nabaa fei naranaraa hamuꞌou na uꞌugai aꞌa hepalo manumanu, fena, ana mei Haidaa iwe faꞌarewaia aꞌa hamuꞌou. 16 Maꞌuaa ei mau gutanaa oꞌou nei fiboꞌii wagii ei ona todigia.

17 Ena lofuu, hamonei nofipuimai aꞌa ei rona neneraa fei maumauu ma naramaꞌaiaa fei mau gutanaa ei rona neneraa fei maumau haiꞌouna fanidigaa hamuꞌou. 18 Uaa ana aleꞌei unaꞌaida warefanaa hamuꞌou mina, eꞌeni a warediai fininaa ranuu pudau ba watauda, rona guta aleꞌei bidibidii unuu fei hawafoloo Christ. 19 Fei ba ro dinaa wagina, maꞌea. Fei pahanaa roꞌou, haidaniaa roꞌou ma ei manumanu mamafaa, rona mamagugu ua wagina. Ei naranaraa roꞌou na ude wagii ei manumanuu feni malagufu. 20 Maꞌuaa fei paꞌaa gufuu oꞌou, i pafea. Ma eni, ona refu ma gutaꞌomaꞌaiaa mei Fatelaꞌana noramiana yei, mei Fasu, Jesus Christ, 21 mei wagii fei faufau, fei i augaa minaa ei manumanu haroo panina, iwe filoginaa ei hafeloꞌaa hubee oꞌou ba ronei aleꞌei fei hubena, fei na paꞌi hawera.