Neneraa fei Mau Fapududuaa Christ
2
Nabaa na faꞌunuwenuweaa naranaraa hamuꞌou fei fihupiꞌiau hamuꞌou aꞌa Christ, o na farawaninaa hamuꞌou fei haguana, o hamoꞌaa guta farawani aꞌa fei Spiriti, o na famagigiaa naranaraa hamuꞌou, o na fafaloloaꞌinaa hamuꞌou, 2 te, hamonei faꞌaꞌapoidinaa fei niꞌeniꞌeau wagii fei ba hamoꞌaa paꞌi hepalo ua naranara ma hepalo ua hagua ma hepalo ua spiriti ma hepalo ua nunumia. 3 Apuna bigiꞌaa hepalo manumanu aꞌa ei mau wawaꞌaia poa, o ei mau mamagugua lomi paꞌafina, maꞌuaa aꞌa fei mau pududua hamonei nara ba hefiꞌadiai, rona pafeai aꞌa hamuꞌou. 4 Hememea hamuꞌou neiꞌaa naranaraꞌuaiaa ei nunumiana, maꞌuaa ana inei naranaraia ei nunumiaa hefiꞌadiai.5 Ei mau naranaraa hamuꞌou nei fiminaꞌei aꞌa fei mau naranaraa Christ Jesus:
6 Mei anaiaa paꞌaa Haidaa,
maꞌuaa lomi ina nara ba fei ba ana hia Haidaa, manumanu ba i urofia,
7 maꞌuaa ina faꞌupuaa anaia,
ba i tonaa fei maumau ei nafi,
ma na toro aleꞌei hemea ramaꞌa ua.
8 Ma fei mau fafanunuana aleꞌei hemea ramaꞌa,
ma na fafafaunaa hia pu
ma na ugainaa fei maꞌeana pafoo fei hawafolo!
9 Siꞌei, mei Haidaa na poronaa hia aꞌa fei na pafeai
ma fania fei hara, fei na pafeainaa minaa ei hara,
10 ba aꞌa fei haraa Jesus minaa ei duꞌu nei fafefe,
yei pafea ma yeni malagufu ma i haroo malagufu,
11 ma minaa ei ramaꞌa, rowe ware ba Jesus Christ, hia Fasu,
ba i fani hawera aꞌa mei Haidaa, mei hia Ama.
Weꞌa Aleꞌei ei Piꞌu
12 Siꞌei, ena paꞌaa rawaniꞌa tafiu, hamatee hamonaꞌaida guaiawarea—abaa uniaa fei ba una guta aꞌa hamuꞌou, maꞌuaa fei guaiaa hamuꞌou warea na muadiai ena lomi yau yena. Hee, hamonei filogimaꞌaiaa fei telaꞌana hamuꞌou fininaa maꞌaua ma funufunuaa unu, uaa 13 Mei Haidaa, hia mei fi bigi laloo iaa hamuꞌou ba hamonei paꞌi rawaniꞌa naranara ba hamoꞌaa bigiꞌaa ei rawaniꞌa nunumiana.
14 Aꞌa minaa ei bigiꞌaa hamuꞌou, apuna ware watauda ma fiharei 15 ba nemea lomi i guguinaa unuu hamuꞌou hafeloꞌa ma ba hamuꞌou aleꞌei fafaꞌaraia naꞌuu mei Haidaa ma lomi tataa hamuꞌou aꞌa eꞌei ramaꞌa hafelo, eꞌei na loloa naranaraa roꞌou aꞌa feni au feni ma dupuaa eꞌei, hamona weꞌa aleꞌei ei piꞌu haroo pafea 16 ei hamoꞌei arereinaab fei warea, fei i fani harenua—ba uꞌa warefaꞌagu aꞌa fei arewaa Christ ba fei ponau ma fei bigiꞌau na paꞌi hanuna. 17 Rona igiau aleꞌei numa apunaia pafoo fei fana ma pafoo fei bigiꞌa wagii ei narafaweꞌiaa hamuꞌou. Ma unaminapaꞌaa niꞌeniꞌefipui aꞌa minaa hamuꞌou. 18 Siꞌei, hamuꞌou anaa, hamonei niꞌeniꞌe ma unuwenuwefipui aꞌau.
Timothy ma Epaphroditus
19 Ina oꞌonai unuu aꞌa mei Fasu Jesus ba lomi i madii ma a aloawii Timothy aꞌa hamuꞌou ba ana awe niꞌeniꞌe ena una guainaa uꞌugaa hamuꞌou. 20 Lomi hemeadiai i aꞌau ba na narapaꞌaa hamuꞌou. 21 Uaa watauda ramaꞌa, rona fafanunuꞌuaiaa ei nunumiaa roꞌou ma abaa ei nunumiaa Jesus Christ. 22 Maꞌuaa hamona aida ba Timothy na famaꞌadigaa hamuꞌou ba hia na rawani, uaa ana aleꞌei hemea naꞌu aꞌa mei amana, ina bigifipui aꞌau aꞌa fei bigiꞌaa fei rawaniꞌa warea. 23 Siꞌei, na oꞌonai unuu ba a aloiawau ena na fanunuia ba yau batanai. 24 Ma na paꞌi oꞌugau aꞌa mei Fasu ba lomi i madii ma ana a nomai.
25 Maꞌuaa una nara ba unei alohadiweꞌinawii aꞌa hamuꞌou Epaphroditus, mei lofuu, mei i bigifipui aꞌau aleꞌei foꞌaa, mei talaitonaa wareaa hamuꞌou, mei hamona aloiamai ba nei roinau. 26 Uaa inapaꞌaa naranaraiaa minaa hamuꞌou ma faloloaꞌi uaa hamona guainia ba hia na funu. 27 Paꞌaa faꞌua ba inadoꞌo funu ma anaa i maꞌe. Maꞌuaa mei Haidaa na faloloaꞌinaa minaa haigua, abaa unaia, siꞌei ba fei faloloaꞌia neiꞌamina fuaꞌonau. 28 Siꞌei, unamina niꞌe ba a aloiawau ba ena hamona fanunudinia hamoꞌaa niꞌeniꞌe ma lomi a minaa naranara watauda. 29 Taufagutania aꞌa fei maumau mei Fasu fininaa baua niꞌeniꞌea ma fani honua aꞌa ei ramaꞌa aleꞌei hia, 30 uaa anaa i maꞌe aꞌa fei bigiꞌaa Christ aleꞌei ba ina nigoaa ei manumanu na famamaꞌau ei ba i bigihadumau aꞌa tamanu lomi ba hamoꞌaa bigipaꞌia aꞌau.