Ma feni neꞌiaa haigua i dinaa aꞌa minaa ei apunaiaa mei Haidaa, ei rona oafipui aꞌa Christ Jesus yei Philippi mawe ei bauaniaa losuu^a ma ei paniaa panii roꞌou:

2 Fei rawaniꞌa ma gutafarawania i dinaa aꞌa hamuꞌou noranarai aꞌa mei Haidaa, mei Amaa oꞌou ma mei Fasu, Jesus Christ.

3 Una ware ‘ta’ aꞌa mei Haidaa, ranimai, ena unaꞌo narapaꞌaa hamuꞌou. 4 Aꞌa minaa ei lafulafuau minaa hamuꞌou, unaꞌaida lafulafu fininaa niꞌeniꞌea, 5 uaa hamona harefipui aꞌau fei rawaniꞌa warea aꞌa fei rawarawa arewaa nopaꞌamii wagieni 6 ma una oꞌugaa fei ba mei i faꞌasiꞌanaa fei rawaniꞌa bigiꞌa i aꞌa hamuꞌou, i bigifapedugaa fei bigiꞌa nopaꞌaloo fei arewaa Christ Jesus.

7 Ina wanewane ba una nara aleꞌei aꞌa hamuꞌou, uaa minaa hamuꞌou i naranarau; uaa nabaa una boboꞌai, o una wareaa pepei ba faꞌua fei rawaniꞌa warea, minaa hamuꞌou, hamona tofipui aꞌau fei rawaniꞌaa mei Haidaa. 8 Mei Haidaa i u neneu aꞌa fei ba yau, napaꞌaa nunuminaa minaa hamuꞌou wagii fei haꞌeiaa Christ Jesus.

9 Ma feni lafulafuau sifeni: ba fei haguaa hamuꞌou nei nogipelao fininaa fei apaꞌa ma nei lamalamai ei naranaraa hamuꞌou ma hamoꞌaa fanunupaꞌaa ei na walalo 10 ba hamoꞌaa fanunuꞌapaꞌaa ei naminapaꞌaa rawani ma hamoꞌaa fafaꞌarai ma lomi hepalo tataa hamuꞌou nopaꞌaloo fei arewaa Christ 11 ba nei pepesu fei fuaa fei wanewanea, fei noranarai aꞌa Jesus Christ—ba nei fabauaninaa fei haraa mei Haidaa ma fei udugiana.

12 Nunumiau ena lofuu ba hamonei aida ba ei na bapaꞌau, napaꞌaa fatalainaa fei rawaniꞌa warea. 13 Ma aꞌa fei, inawe arewa aꞌa minaa ei oanananaa fei humuu mei hapara^b mawe minaa ei ramaꞌa ba yau, na boboꞌai hamatee Christ. 14 Wagii fei boboꞌaiau, watauda ei lofu aꞌa mei Fasu, na rawanidiai naranaraa roꞌou ba roꞌaa uꞌufaweꞌi ma lauguꞌua aꞌa fei rawaniꞌa wareaa mei Haidaa.

15 Paꞌaa faꞌua ba hefiꞌa, rona uꞌugaa Christ aꞌa fei wawaꞌaia poa ma fei ba minaa roꞌou ua, maꞌuaa hefiꞌa, aꞌa fei rawaniꞌa maumau. 16 Ei i rawani maumau roꞌou, rona bigi fininaa fei hagua ma rona aida ba yau yeni uaa una u nenee fei rawaniꞌa warea. 17 Ei abaa paꞌaa naranaraa roꞌou, rona uꞌugaa Christ aꞌa fei wawaꞌaia poa ma nara ba roꞌaa fahafeloau eꞌeni aꞌa feni boboꞌaiau.^c 18 Maꞌuaa lomi manumanu, na? Sifeni, feni baua manumanu ba wawaꞌaia poa, o loꞌe, siꞌei ba ona uꞌugaa Christ. Ma aꞌa fei, una niꞌeniꞌe.

Hiꞌi, ma amina niꞌeniꞌeꞌualao, 19 uaa una aida ba wagii ei lafulafuaa hamuꞌodu ma fei hadumaa fei Spiritii Jesus Christ, tamanu na nomai aꞌau iwe alarau.^d 20 Unamina refurefu ma na oꞌonai unuu ba lomi a mamafa ma unei lauguꞌai ba eꞌeni ana aleꞌei ranimai unei uduginaa Christ aꞌa fei hudi unuu nabaa una werawera, o una maꞌe. 21 Uaa, aꞌau, fei una werawera, manumanuu Christ ma nabaa a maꞌe, una mua wagina. 22 Nabaa a gutadilao aꞌa fei hudi unuu, i watauadilao fuaa ei bigiꞌau. Maꞌuaa afaia guapaloei? Lomi na aida! 23 Ina hamamaguaa fei naranarau aꞌa guapaloeni: nunuminau ba a aunu ma oafipui aꞌa Christ, fei namina pafeai laraa fei ba a gutalao, 24 maꞌuaa i farawaninaa hamuꞌou nabaa yau ana aꞌa feni hubeu. 25 Siꞌei ba unapaꞌaa aida fei, una aidadii ba yau, a oa ma a gutafipuilao aꞌa minaa hamuꞌou ba hamonei bigipaꞌilao ma niꞌeniꞌe aꞌa fei narafaweꞌia. 26 Ma aꞌa feni oanau aꞌa hamuꞌou, fei niꞌeniꞌeaa hamuꞌou aꞌa Christ Jesus, inei bauanai apoidiai.

27 Ma tamanu na nomai, ei maumau hamuꞌou nei wanewaneinaa fei rawaniꞌa wareaa Christ. Ma nabaa a nomai maꞌa hamuꞌou, o na gutafaraua ma guaiꞌuaia ba hamona batanai, una aida ba hamona ufaweꞌi aꞌa hepalo ua spiriti ma bigibigi aleꞌei hemea ua ramaꞌa wagii fei narafaweꞌiaa fei rawaniꞌa warea 28 ma paꞌaa lomi hamona maꞌau aꞌa ei roꞌaa fadugeaa hamuꞌou. Fei, aleꞌei hepalo lala aꞌa roꞌou ba rowe fagiana, maꞌuaa hamuꞌou, hamowe tela—ma fei, bigiꞌaa mei Haidaa. 29 Uaa aꞌa Christ, ina fifaninia aꞌa hamuꞌou ba abaa uniaa fei ba hamonei narafaweꞌi ua aꞌana, maꞌuaa ana hamonei to fiꞌia aꞌana 30 hamatee eꞌeni, hamonawe tonaa fei awataa, fei hamona fanunupaꞌia ba unadoꞌo tonia, fei hamoꞌei guainia ba ana i aꞌau eꞌeni.