2 Uꞌei wareꞌaiꞌai aꞌa Euodia ma Syntyche ba lagunei famamonaa hepalo ua naranara aꞌa mei Fasu. 3 Hiꞌi, ma a iꞌiginio, mena paꞌaa faꞌua tafiu,^a mena ona hupiꞌai aꞌa fei bigiꞌa, hadumaa laguei pifine laguei, laguna fasifipui aꞌau uaa fei rawaniꞌa warea mawe Clement ma minaa ei rafirafiu wagii fei bigiꞌa, ei na pana haraa roꞌou laloo fei buꞌuu harenua.

4 Niꞌeniꞌe aꞌa mei Fasu ranimai. A waredinia: Niꞌeniꞌe! 5 Fei madumuaa hamuꞌodu, minaa ei, ronei fanunuꞌapaꞌia. Mei Fasu na rafiꞌi. 6 Apuna naranara watauda aꞌa hepalo manumanu, maꞌuaa, wagii minaa ei manumanu, hamonei lafulafu ma iꞌigai fininaa warea ‘ta’ ma fanaa ei iꞌigaiaa hamuꞌou aꞌa mei Haidaa. 7 Ma fei gutafarawaniaa mei Haidaa, fei na pafeainaa minaa ei apaꞌaa oꞌou, iwe wagiꞌinaa laloo iaa hamuꞌou mawe ei naranaraa hamuꞌou aꞌa Christ Jesus.

8 Fapopoꞌii wareau, ena lofuu, tamanu na faꞌuai, o na honua, o wanewane, o fafaꞌarai, o fananamai, o na faꞌalarainaa puda—nabaa hepalo manumanu napaꞌaa wanewane, o na rawani ba oꞌaa uduginia, hamonei naranaraiaa ei manumanu ei. 9 Tamanu una feroinaa hamuꞌou wagina, o hamona tonia, o guainia aꞌau, o fanunuia aꞌau—bigiꞌia. Ma mei Haidaniaa fei gutafarawania, iwe oafipui aꞌa hamuꞌou.

10 Naminapaꞌaa niꞌeniꞌe aꞌa mei Fasu ba hamonawe falanaa huoo hamuꞌou yau. Faꞌua ba hamona naranaraiau, maꞌuaa lomi hamona paꞌi tala ba hamoꞌaa hadumau. 11 Abaa eni a wareaa fei ba una nunuminaa hepalo manumanu, uaa tamanu na nomai aꞌau wagii tamanu tala, unei fahoꞌo ua wagina. 12 Una aidadii fei mau gutana, fei ba una paꞌi watauda manumanu o loꞌe. Una tatalaidii aꞌa minaa ei tala ma na gutafarawani ua wagii roꞌou nabaa una magu, o loꞌe, watauda manumanuu, o loꞌe. 13 Uꞌa bigiꞌaa minaa ei manumanu aꞌa mei na fani faufau aꞌau.

14 Maꞌuaa ei maumau hamuꞌou na rawani, uaa hamona fapapaiau aꞌa hefiꞌa awatau. 15 Hepalodiai, hamuꞌou ena Philippi, hamona aida ba aꞌa ei rawarawa arewaa, ei hamoꞌadoꞌo tonaa fei rawaniꞌa warea, ei a asiꞌaa Macedonia, lomi hepalo aꞌa ei losuu na alagifani manumanu aꞌau, ana uniaa hamuꞌou; 16 uaa ei a guta yei Thessalonica, hamonaꞌu aloꞌuamai manumanu aꞌau ei a gutafafelo. 17 Aꞌa ba una nunuminaa hepalo fana, maꞌuaa, una nunuminia ba wagii ei rawaniꞌa bigiꞌaa hamuꞌou, hamowe to rawaniꞌa ponoꞌa wagina. 18 Una topedugaa ei ponoꞌau ma wataudadiai; ina hawidigau eni manumanu eni, uaa eꞌeni unawe todigaa ei fana, ei hamona fanamiaa Epaphroditus. Ei manumanu ei, aleꞌei dufaa fana ma hepalo rawaniꞌa fana na faniꞌeniꞌeaa mei Haidaa. 19 Ma mei Haidaniau, iwe fafanunu ma fanaa minaa ei nunumiaa hamuꞌou, wagii ei watauda rawaniꞌa manumanuna aꞌa Christ Jesus.

20 Fei hawera i ude aꞌa mei Haidaa, mei Amaa oꞌou, ranimai, ranimai. Amen.

21 Famafufuoinaa minaa ei apunaiaa mei Haidaa, ei rona oa aꞌa Christ Jesus. Eni lofu aꞌau, rona aloaa ei famafufuoiaa roꞌou aꞌa hamuꞌou. 22 Minaa ei apunaiaa mei Haidaa, rona aloaa ei famafuoiaa roꞌou aꞌa hamuꞌou, minapaꞌaa aꞌa ei ramaꞌa laloo fei humuu Caesar.

23 Fei rawaniꞌaa mei Fasu Jesus Christ, i oafipui aꞌa ei spiritii hamuꞌou. Amen.^b