5
Siꞌei, fei maumau hamuꞌou nei fiminaꞌeinaa fei maumau mei Haidaa, aleꞌei ei baduu, ei ina haguaa roꞌou 2 ma tatalai fininaa fei hagua, ana aleꞌei Christ na haguaa oꞌou ma rawaꞌaꞌafai aꞌa mei Haidaa uaa oꞌou, aleꞌei hepalo fana, hepalo na dufa. 3 Maꞌuaa i aꞌa hamuꞌou, ineiꞌaa paꞌi maꞌida mau fitatafipaꞌaia, o hepalo mau hafelo, o mau bagito, uaa ei maumau ei, lomi na rawani aꞌa ei ramaꞌaa gufuu mei Haidaa, ei rona apunai. 4 Ana hamoneiꞌaa warefafelo, o warefaꞌaꞌafoloi, o hafeloꞌa warefifigaia, ei manumanu abaa rawaniꞌa, maꞌuaa hamonei ware ‘ta’ ua. 5 Uaa aꞌa feni, hamonapaꞌaa aida ba faꞌua: Lomi i paꞌi ramaꞌaa fitatafipaꞌaia, hafeloia, o bagitoia ba i paꞌi gutanana aꞌa fei haparaiaa Christ mawe mei Haidaa,a uaa nemea aleꞌei i haguaa eꞌei manumanu eꞌei. 6 Apuna guaitonaa sifisifi wareaa nemea, uaa aꞌa ei manumanu ei, fei sibaa mei Haidaa, i pasinaa pafoo ei rona barafe. 7 Siꞌei, apuna rarafiaa roꞌou.
8 Uaa mina, hamuꞌou roromaa, maꞌuaa eꞌeni hamuꞌou weꞌai aꞌa mei Fasu. Te, hamonei tatalai aleꞌei ei naꞌuu fei weꞌai 9 (uaa ei fuaa fei weꞌai, minaa ei rawaniꞌa manumanu, ei na wanewane ma faꞌuai) 10 ma hamonei labarainaa tamanu na faniꞌeniꞌeaa mei Fasu. 11 Apuna atetea aꞌa ei bigiꞌaa fei roromaa, ei lomi fuana, maꞌuaa, faꞌarewaiaa roꞌou. 12 Uaa manumanuu mamafaa nabaa hamoꞌaa wareaa tamanu rona bigiꞌopaꞌainia ei barafea. 13 Maꞌuaa minaa ei manumanu na faꞌarewaia fei weꞌai, ona fanunuꞌapaꞌia, 14 uaa fei weꞌai na faꞌarewaiaa minaa ei manumanu. Siꞌei, i ware aleꞌeni:
“Wera, mena maꞌigua,
asiꞌaa aꞌa ei maꞌea,
ma Christ i faweꞌainio.”
15 Siꞌei, hamonei talaiwagiꞌinaa hamuꞌou—abaa aleꞌei ei lomi rona paꞌi apaꞌa, maꞌuaa hamonei aleꞌei ei rona paꞌi apaꞌa. 16 Ma hamonei bigifaweꞌi eni fi paꞌi au, uaa eni arewaa eꞌeni na hafelo. 17 Siꞌei, hamoneiꞌaa poapoai, maꞌuaa hamonei apaꞌifarawaninaa tamanu nunumiaa mei Fasu. 18 Hamoneiꞌaa hunufapoa-poai aꞌa ei wine, ei i notonaloo hamuꞌou aꞌa ei hafeloꞌa. Maꞌuaa inei didifaa hamuꞌou fei Spiriti. 19 Hamonei fiwarewareinaa ei psalm, ei laugaa losuu ma ei laugaa manumanuu fei Spiriti. Lalaugi ma tanu lauga i laloo naranaraa hamuꞌou aꞌa mei Fasu 20 ma ranimai, ware ‘ta’ aꞌa mei Haidaa, mei Ama wagii minaa ei manumanu aꞌa fei haraa mei Fasuu oꞌou Jesus Christ.
21 Siꞌei ba hamona maꞌauaa Christ, hememea hamuꞌou nei fafefe aꞌa nemeadiai.
Pifine ma Wawane Haroo Lalai
22 Hamuꞌou ena pifine, hamonei fafefenaa ena haroo hamuꞌou ana aleꞌei hamona fafefenaa mei Fasu. 23 Uaa mei wawane na haroa, hia mei fasuu mei harona ana aleꞌei Christ, hia Fasuu fei losuu, fei hudi ununa, fei hia ana fatelaꞌana. 24 Ma siꞌei ba fei losuu na fafefenaa Christ, ana aleꞌei ba ei pifine, ronei fafefenaa ei haroo roꞌou aꞌa minaa ei manumanu.
25 Hamuꞌou ena wawane, hamonei haguaa ei haroo hamuꞌou, ana aleꞌei Christ na haguaa fei losuu ma na rawaꞌaꞌafai wagina 26 ba i fafafaꞌarainia, aleꞌei ba ina fesuiab aꞌa fei warea, 27 ma ba i faꞌufalarainia i maꞌana aleꞌei hepalo fananamai losuu, lomi na pidaa, o hafiduꞌuduꞌu, o hepalo lolo, maꞌuaa na fafaꞌarai ma lomi tatana. 28 Ena wawane lalaia, ronei haguaa ei haroo roꞌou ana aleꞌei rona haguaa ei hudi unuu ana roꞌou. Mei na haguaa mei harona pifine na haguaa anaia. 29 Uaa lomi hemea i bidibidi ununa aꞌa fei ana hudi ununa, maꞌuaa ina faguia ma omaꞌaia ana aleꞌei na bigiꞌia Christ aꞌa fei losuu— 30 uaa oꞌou, maroaa fei paꞌafina. 31 Sifei fei paꞌafina ba “Hemea wawane i diꞌininaa amana ma inana ma i tau aꞌa mei harona ma laguꞌawe pigioinaa hepalo.” 32 Fei, hepalo baua manumanu na ude opaꞌai—maꞌuaa, uꞌei warewareaa Christ ma fei losuu. 33 Maꞌuaa hememea hamuꞌou nei haguaa mei harona pifine ana aleꞌei ina haguaa anaia ma mei harona pifine, inei maꞌauaa mei harona.