Ei Baduu, ei Ama ma ei Ina
6
Ena baduu, guainaa wareaa ei ama ma inaa hamuꞌou aꞌa mei Fasu; uaa fei, ina wanewane. 2 “Maꞌauaa amamu ma inamu”—sifei fei rawarawa warea laloo fei law, fei i nofipuimai aꞌa fei warefaꞌunaia— 3 “ba oꞌaa gutafarawani ma gutafamalaa yeni malagufu.” 4 Ena ama, apuna fasibaiaa ei naꞌuu hamuꞌou; agia, hamonei feroinaa roꞌou aꞌa ei feroia ma wareaa mei Fasu.
Ei Humuwa mawe ei Fasu
5 Ena humuwa, guainaa wareaa ei fasuu hamuꞌou yeni malagufu fininaa maꞌaua ma honua ma rawaniꞌa naranara, ana aleꞌei ba hamona guainaa ei wareaa Christ. 6 Guainaa wareaa roꞌou abaa una fei ba rona fanunuaa hamuꞌou, maꞌuaa, aleꞌei humuwaa Christ, hamonei bigiꞌaa ei nunumiaa mei Haidaa noranamai i naranaraa hamuꞌou. 7 Siꞌei, bigifaweꞌi, aleꞌei ba hamona bigibigi aꞌa mei Fasu ma abaa aꞌa ramaꞌa, 8 uaa hamona aida ba mei Fasu i fani ponoꞌa aꞌa hememea wagii tamanu rawaniꞌa na bigiꞌia nabaa hia humuwa, o loꞌe.
9 Ma ena fasu, ei rawaniꞌaa hamuꞌou nei fiminaꞌei aꞌa ei humuwaa hamuꞌou. Apuna fararaoaa roꞌou, uaa hamona aida ba mei Fasuu hamuꞌou ma roꞌou, hia i pafea ma lomi papaꞌaa ununa.
Ei Finefinee Foꞌaa aꞌa mei Haidaa
10 Fei fapopoꞌii wareau sifei ba hamonei oafaweꞌi aꞌa mei Fasu ma aꞌa fei baua faufauna. 11 Fahawaiaa minaa ei finefinee foꞌaa aꞌa mei Haidaa ba hamoꞌaa ufadugepaꞌaa ei manitoai mei haniꞌu. 12 Uaa fei oteꞌoteiaa oꞌou abaa fi fadugeaa ei aꞌa pigio ma raraa, maꞌuaa fi fadugeaa aꞌa ei hapara ma bauana mawe ei faufau feni ano, feni na roroma ma aꞌa ei hafeloꞌa spiriti inamoaa fei haroo pafea anaa. 13 Siꞌei, hamonei fahawaiaa minaa ei finefinee foꞌaa aꞌa mei Haidaa ba ena ina nomai fei arewaa hafelo, hamoꞌaa ufaweꞌipaꞌi ma ena hamona bigipedugaa minaa ei manumanu, hamoꞌaa ufawegipaꞌi. 14 Siꞌei, hamonei ofafaufau aꞌa fei adii faꞌuaia, fei na adinaa walaa hamuꞌou, aꞌa fei papanii niniwai fei wanewanea 15 ma rafe supinee hamuꞌou aꞌa fei rawaniꞌa wareaa fei gutafarawania. 16 Ma fahononoo minaa ei, tonaa fei rapirapii fei narafaweꞌia, fei ina pereaa minaa ei hioo mei haniꞌu, ei na paꞌi hafii umuna. 17 Fahawainaa fei tao telaꞌana ma waduu fei Spiriti, fei wareaa mei Haidaa. 18 Ma lafulafu aꞌa fei Spiriti ranimai aꞌa watauda ei mau lafulafua ma iꞌigaia. Ei hamoꞌei naranaraiaa eꞌei, hamonei omaꞌamaꞌa ma u lafulafunaa ei apunaiaa mei Haidaa.
19 Lafulafunau anaa ba ena una gigiaa umuu, i fani paolaa wareau ba a lauguꞌai ena na faꞌarewaiaa ei na ude opaꞌai aꞌa fei rawaniꞌa warea, 20 fei uꞌei guta boboꞌai wagina aleꞌei hemea umuiaa mei Haidaa. Lafulafu ba unei wareia fininaa fei lauguꞌaia.
Ei Aꞌapoo Aloana Warea
21 Tychicus, mei paꞌaa lofuu oꞌou, mei weweaa nafi aꞌa mei Fasu, iwe warefanaa hamuꞌou minaa ei manumanu ba hamonei aida ba yau batanai ma fi bigiꞌaa tamanu. 22 Sifei fei paꞌafina ei a aloiawau aꞌa hamuꞌou ba hamonei aida ba haiꞌou batanai ma ba i faweꞌiaa ei naranaraa hamuꞌou.