Fihupiꞌii wagii fei Hudi Unuu Christ
4
Siꞌei ba yau hemea na boboꞌai uaa mei Fasu, uꞌei wareꞌaiꞌai aꞌa hamuꞌou ba wagii ei tatalaiaa hamuꞌou, inei rawani ua aꞌa fei rafeia hamona tonia. 2 Hamoneimina fafafaunaa pu ma madumui; hamonei fawiwiꞌai ma fafirawaninaa pafoo hememea hamuꞌou fininaa hagua. 3 Aꞌa minaa ei faufau hamuꞌou, hamonei panarofaweꞌia fei hupiꞌiaa fei Spiriti wagii fei maumau gutafarawania. 4 Na paꞌi hepalo ua hudi unu ma hepalo ua Spiriti—ana aleꞌei hamona tonaa hepalo ua oꞌonaia unu ei i rafeinaa hamuꞌou— 5 hemea ua Fasu, hepalo ua narafaweꞌia, hepalo ua pudugufaia; 6 hemea ua Haidaa, mei Amaa minaa ei ramaꞌa, mei na pafeainaa minaa ei manumanu ma i aꞌa minaa eꞌei ma i laloo minaa eꞌei.7 Maꞌuaa ina alaginaa fei rawaniꞌana aꞌa hememea oꞌou ana aleꞌei nunumiaa Christ. 8 Siꞌei, ia ware aleꞌei ba:
“Ei i dinaa pafea,
ina tauduginaa ei boboꞌaia laloo fei wana
ma ina fani fana aꞌa ei ramaꞌa.”
9 (Mei “ina dinaa pafea” ana na dinaa waduhero.b 10 Mei na dinaa pu, ana simei mei na dinaa pafoo fei pumanugawe ba nei oa aꞌa minaa ei manumanu hitani.) 11 Ana hia mei i alaginia ba hefiꞌa apostle, hefiꞌa mamamaꞌa, hefiꞌa uꞌugaa fei rawaniꞌa warea ma hefiꞌa pasta ma feroia, 12 ba ronei faweꞌiaa ei apunaia aꞌa ei bigiꞌa ba fei paꞌafii Christ neipaꞌaa weꞌi 13 nopaꞌaloo fei fihupiꞌiaa minaa oꞌou wagii fei narafaweꞌia ma fei apaꞌaa mei Naꞌuu mei Haidaa ma opowe aꞌu ba opowe tonaa minaa ei maumau Christ.
14 Ma nabaa aleꞌei, lomidiai ba oꞌou baduu ua ba o lafelao ma lafemai wagii ei mamaua ma waniwanii fei lalarenaa ei feroia ma ei manitoai sifisifii ei ramaꞌa ba roꞌaa sifiꞌaa oꞌou. 15 Maꞌuaa owe wareaa fei faꞌuaia fininaa fei hagua, aꞌa minaa ei manumanu opowe noꞌaꞌulao aꞌa mei hia Fasu, mei Christ. 16 I aꞌana minaa fei paꞌafi na udefipuinaa minaa ei wao hudi unu ma nogipelao ma nomaꞌualao fininaa fei hagua ei fi bigiꞌaa fei bigiꞌana hepapalo finefinee unu.
Guta Aleꞌei ei Naꞌuu fei Weꞌai
17 Siꞌei, a warefanaa hamuꞌou feni ba hamonei bigiꞌia aꞌa mei Fasu ba hamoneiꞌaa tatalai aleꞌei ei mau talaiaa ei Gentile, aleꞌei fei mau hafeloꞌaa naranaraa roꞌou. 18 Na roroma ei naranaraa roꞌou ma rona diꞌininaa fei harenuaa mei Haidaa uaa ina polai tabaa roꞌou hamatee na waiwai tabaa roꞌou. 19 Lomi rona fai nanamuipaꞌaa unuu roꞌou, siꞌei, rona fifaninaa roꞌou aꞌa ei nunumiaa unuu roꞌou ba roꞌaa bigiꞌaa minaa ei mau toai hafeloꞌa ma na ude sisii ua haraa roꞌou.
20 Maꞌuaa hamuꞌou, lomi hamona apaꞌaa Christ aleꞌei. 21 Hamonapaꞌaa guainaa fei uꞌugana ma hefiꞌa, rona feroinaa hamuꞌou fei faꞌuaia aꞌa Jesus. 22 Rona feroinaa hamuꞌou wagii fei tatalaiaa hamuꞌou mina ba hamonei siminaa ei maumau hamuꞌou mina, ei na tauia loasi aꞌa ei sifisifi nunumiana; 23 ma ba hamonei tonaa fei manufau naranara 24 ma hamonei fahawaiaa fei manufau maumau, fei na mamaramai ba i aleꞌei mei Haidaa aꞌa fei paꞌaa wanewanea ma fafaꞌaraia.
25 Siꞌei, hememea hamuꞌou nei siminaa fei mau sifisifi ma warefaꞌuai aꞌa mei gufumu, uaa minaa oꞌou, maroaa hepalo ua unu. 26 “Fapedugaa fei sibamu, apuna bigifafelo”: Inei pedu fei sibamu ei atawe lolo fei halo 27 ma apuna fani ugaa pinee mei Haniꞌu. 28 Mei naꞌaida topaꞌai, ineiꞌaa bigidinia, maꞌuaa inei biginaa panina ba i paꞌi manumanu ba i fani aꞌa ei lomi rona paꞌi.
29 Ineiꞌaa leleꞌaa poamu ei hafeloꞌa warea, maꞌuaa tamanu i hadumaa hefiꞌa aꞌa tamanu ona aida ba i farawaninaa roꞌou ba inei hadumaa ei rona guai. 30 Ma apuna fanunutaa fei Spiriti Apuna mei Haidaa, fei na oa aꞌa hamuꞌou aleꞌei hepalo tamatama nopaꞌaloo fei arewaa ponohadiweꞌia. 31 Fapedugaa minaa ei paraꞌaa maumau, ei mau fifiꞌii unu, ei sibasibaa, ei mau balaꞌafigii unu, ei mau uꞌufafeloaa ramaꞌa ma watauda ei mau ei bidibidii unu. 32 Fafirawanii ma fifaloloaꞌinaa hememea ma futoaa ei tataa hememea hamuꞌou ana aleꞌei ba aꞌa Christ, mei Haidaa na futoaa ei tataa hamuꞌou.