Paul, mei Uꞌuga aꞌa ei Gentile
3
Sifei, fei paꞌafina ba yau Paul na boboꞌai aꞌa Christ Jesus uaa ba a hadumaa hamuꞌou ena Gentile.2 Woro ba hamona guaidigaa fei bigiꞌaa fei rawaniꞌaa mei Haidaa, fei ina fanau ba unei uꞌufanaa hamuꞌou. 3 Sifei ba, hefei nadoꞌo udeꞌopaꞌai, inawe foiginia ma faꞌarewaia aꞌau, aleꞌei maꞌidei doꞌo neꞌiau famaꞌa. 4 Ena hamona igoaa feni, hamopowe apaꞌifarawaninaa fei apaꞌau aꞌa fei uꞌugaa Christ, fei nadoꞌo opaꞌai, 5 fei lomi na faꞌarewaia aꞌa ei ramaꞌaa ei tawe i didii, aleꞌei i faꞌarewaia fei Spiriti aꞌa ei apostle ma ei mamamaꞌa, ei rona apunai aꞌa mei Haidaa. 6 Fei manumanu inadoꞌo opaꞌai, sifeni ba, aꞌa fei rawaniꞌa warea, ei Gentile, roꞌou aleꞌei paꞌaa naꞌu fipui aꞌa ei Israel aleꞌei maroaa hepalo ua unu ma rona tofipuinaa fei faꞌunaia aꞌa Christ Jesus.
7 Unawe oanaa nafii feni rawaniꞌa warea uaa fei rawaniꞌaa mei Haidaa, fei na fanau aꞌa fei bigiꞌaa fei faufauna. 8 Paꞌaa faꞌua ba unamina oanaa pu laraa minaa ei apunaia, maꞌuaa, ina fanau feni rawaniꞌa: ba unei uꞌufanaa ei Gentile ei watauda rawaniꞌa manumanuu Christ ei na waiwai ba o labagipaꞌia 9 ma ba unei famaꞌaiaa minaa ei ramaꞌa fei bigiꞌa aꞌa fei manumanu nadoꞌo opaꞌai, fei na udeꞌopaꞌai aꞌa mei Haidaa famaꞌa, mei na famamaraiaa minaa ei manumanu. 10 Fei naranarana, sifei ba eꞌeni, aꞌa ei losuia, ei watauda mau apaꞌaa mei Haidaa nei arewa aꞌa ei hapara mawe ei bauana inamoaa fei haroo pafea, 11 aleꞌei ba i neneraa fei nunumiana, fei na ude ranimai, fei inawe bigidigia aꞌa Christ Jesus, mei Fasuu oꞌou. 12 I aꞌana ma wagii fei narafaweꞌia aꞌana, ina rawani ba oꞌaa nofarafiꞌilao aꞌa mei Haidaa fininaa mamalawiaa naranara ma lauguꞌua. 13 Siꞌei, a iꞌiginaa hamuꞌou ba hamoneiꞌaa fanunuta aꞌa ei awatau uaa hamuꞌou, hamatee manumanu i farawaninaa hamuꞌou.
Na Lafulafunaa ei Ephesus
14 Sifei fei paꞌafina ba una oꞌoꞌui aꞌa mei Ama, 15 mei, minaa ei maroana i pafeaa ma yeni malagufu rona to haraa roꞌou aꞌana. 16 Una lafulafu ba aꞌa ei watauda rawaniꞌana i faweꞌiaa hamuꞌou laloo ei naranaraa hamuꞌou aꞌa fei faufau noranamai aꞌa fei Spiriti 17 ba i aꞌa fei narafaweꞌia, Christ i oa laloo iaa hamuꞌou. Ma una lafulafu ba hamuꞌou, ena ina gugudii waraa fei hagua laloo iaa hamuꞌou, 18 hamonei paꞌi faufau fipui aꞌa minaa ei apunaiaa mei Haidaa, hamonei aida ba batanai fei haguaa Christ—fei larena, malana, tarena ma walalona 19 ma ba hamonei aida fei hagua fei, fei na muainaa fei apaꞌa—ba hamonei pepesu aꞌa minaa ei maumau mei Haidaa.