Fei Harenua aꞌa Christ
2
Mina, hamuꞌou aleꞌei maꞌea aꞌa eꞌei tata ma eꞌei hafeloꞌaa hamuꞌou, 2 eꞌei hamona tatalai wagina ei hamoꞌaa neneraa ei maumau feni ano mawe ei maumau mei haparaa fei haroo pafea. Fei spiritina fei fi bigi aꞌa ei rona barafe. 3 Minaa haiꞌou anaa, haiꞌounadoꞌo guta inamoaa roꞌou famaꞌa; fahoꞌoaa ei hafeloꞌa maumaua haiꞌou ma neneraa ei nunumiana ma ei naranarana. Ana aleꞌei roꞌou, wagii ei paꞌaa maumau haiꞌou, haiꞌouꞌaa tonaa sibana. 4 Maꞌuaa, sifei ba fei baua haguana oꞌou, mei Haidaa, mei na rata fei faloloaꞌiana, 5 na fani harenuaa oꞌou i aꞌa Christ, ei oꞌaa oa aleꞌei maꞌea fininaa ei hafeloꞌaa oꞌou—na fatelaiaa oꞌou fei rawaniꞌana. 6 Ma mei Haidaa na faꞌasiꞌanaa oꞌou fipuinaa Christ ma fagutanaa oꞌou i aꞌana wagii fei gufu pafea i aꞌa Christ Jesus 7 ba aꞌa ei arewaa i nomai hinene, i famaꞌaa fei rawaniꞌana, fei lomi tawiꞌana, i famaꞌaiaa oꞌodu fei rawaniꞌana, i aꞌa Christ Jesus. 8 Uaa aꞌa fei rawaniꞌa, hamona tela uaa fei narafaweꞌia—ma fei, abaa noramiana aꞌa hamuꞌou—uaa hepalo fanaa mei Haidaa, 9 abaa bigiꞌuaa ramaꞌa, siꞌei, lomi nemea ba i mamagugu wagina. 10 Uaa hamuꞌou auꞌau panii mei Haidaa, hamona mamaramai aꞌa Christ Jesus ba hamoꞌaa bigiꞌaa ei rawaniꞌa bigiꞌa, ei dii pagiꞌaugaa mei Haidaa ba bigiꞌaa oꞌou. Hemea Ua aꞌa Christ
11 Siꞌei, hamonei nonominia ba hamona waninimai aleꞌei Gentile. Ma rona ware ba lomi hamona moroꞌaa hudii wawanei—aleꞌei wareaa ei rona moroꞌaa hudii wawanei (fei rona bigiꞌia aꞌa ei hudi unuu ei wawane)— 12 Naraia ba mina, hamona farapa aꞌa Christ ma aꞌa ba hamuꞌou Israel ma hamona raua aꞌa fei fiꞌugaiaa fei faꞌunaia, lomi oꞌonaia unu ma ana lomi Haidaniaa hamuꞌou yeni malagufu. 13 Maꞌuaa eꞌeni, aꞌa Christ Jesus, hamuꞌou ena hamonadoꞌo gutafaraua, hamonawe nofarafiꞌimai uaa fei namoo Christ.
14 Uaa ana hia mei i farawaninaa oꞌou, mei na bigiꞌia ba helagui, aleꞌei hemea ua ma na birosiaa fei na fafihafeloinaa pafoo lagua 15 aꞌa fei pigiona na fapedugaa fei law, fei na fafisibainaa lagua fininaa ei warea ma feroia wagina. Fei nunumiana sifei ba i famamaraa hemea manufau ramaꞌa aꞌa laguei, ba i fagutafarawaninaa lagua, 16 ma aꞌa hepalo ua hudi unu ina fagutafipuidinaa lagua i aꞌa mei Haidaa uaa fei hawafolo, fei ina fapedugaa fei fisibaiaa lagua. 17 Ina nomai ma uꞌugaa fei gutafarawania aꞌa hamuꞌou ena hamona gutafaraua mawe eꞌei rona gutafarafiꞌi. 18 Uaa i aꞌana minaa agua na paꞌi tala i dinaa aꞌa mei Ama wagii hepalo ua Spiriti.
19 Siꞌei, eꞌeni, fai loꞌe ba hamuꞌou ramaꞌaa rauaa, o ramaꞌaa hepapa gufu, maꞌuaa, hamuꞌou aleꞌei paꞌaa ramaꞌa gufuu mei Haidaa fipuinaa ei apunaia ma ei maroaa fei humuu mei Haidaa, 20 fei na fadu pafoo fei fasuꞌufufugoi ei apostle ma ei mamamaꞌa, fei ba Christ Jesus, ana hia, fei paꞌaa fafasui fei fasuꞌufufugoi. 21 I aꞌana, minaa fei humu na fadufitanai ma aꞌa mei Fasu na ufalarai aleꞌei hepalo apunai humuu mei Haidaa. 22 Ma i aꞌana, hamuꞌou ana aleꞌei finefine ina fadufipuinaa hamuꞌou ba aleꞌei hepalo humu ba wagii fei Spiritina, mei Haidaa i oa i lalona.