Uꞌa aloawii feni neꞌiau aꞌa hamuꞌou ena apunaiaa mei Haidaa yena Ephesus,^a hamuꞌou ena hamona oafagugu^b aꞌa Christ Jesus:

2 Fei rawaniꞌa ma gutafarawania i dinawii aꞌa hamuꞌou noranamai aꞌa minaa lagua, mei Haidaa, mei hia Amaa oꞌou mawe mei Fasu Jesus Christ.

3 Fei udugia i dinaa aꞌa mei Haidaa, mei hia Amaa Jesus Christ mei Fasuu oꞌou. Ma mei Haidaa na haweginaa oꞌou inamoaa fei haroo pafea aꞌa minaa ei hawegiaa fei spiriti, ei i nofipuimai aꞌa Christ. 4 Uaa ei itawe famamaraa feni malagufu, ina rafeinaa oꞌou i aꞌana ba onei fafaꞌarai ma ba lomi hepalo tataa oꞌou i pudana. Aꞌa fei hagua,^c 5 inadii bigiꞌia ba i taweaa oꞌou aleꞌei naꞌuna uaa Jesus Christ ba inei wanewaneinaa fei niꞌeniꞌeana ma fei nunumiana— 6 Onei uduginaa mei Haidaa uaa fei rawaniꞌa fana, fei ina faniꞌuaiaa oꞌou aꞌa Mei hia na haguia. 7 Ma mei naꞌuna na ponohadiweꞌinaa oꞌou aꞌa fei namona ba i futoaa ei hafeloꞌa uaa na bauanai fei rawaniꞌaa mei Haidaa, 8 fei namina hawainaa oꞌou fininaa minaa ei apaꞌa ma apaꞌifarawania. 9 Ma inawe^d faꞌarewaia aꞌa oꞌou fei nunumiana, fei nadoꞌo opaꞌai, fei i neneraa fei rawaniꞌa naranarana, fei inadoꞌo nunuminia ba i bigiꞌia aꞌa Christ, 10 fei ba i bigiꞌia ena inawe nomai fei paꞌaa au—ba i pafea ma yeni malagufu i aufipuinaa minaa ei manumanu haroo hemea ua, mei Christ.

11 I aꞌana, ana ina rafeinaa oꞌou,^e ba tamanu fei doꞌo pagipagiana nei neneraa fei naranaraa mei fi bigiꞌaa minaa ei manumanu aꞌa ei nunumiana, 12 siꞌei ba haiꞌou rawarawa paꞌaa fei oꞌonaia unu aꞌa Christ, haiꞌounei uduginia uaa fei hawerana. 13 Ma hamuꞌou anaa, hamonamii oafipui aꞌa Christ ei hamoꞌaa guainaa fei faꞌuai warea, fei rawaniꞌa wareaa fei telaꞌanaa hamuꞌou. Siꞌei ba hamona narafaweꞌi, ina tamaꞌainaa hamuꞌou aꞌa hepalo lala, fei Spiriti Apuna, fei inadii faꞌunainia ba i aloiamai, 14 aleꞌei hepalo uniꞌuni ba napaꞌaa faꞌuai ba na paꞌi ugaa pinee oꞌou nopaꞌaloo fei au ponohadiweꞌiaa ei maroaa mei Haidaa—ba uꞌudugii fei hawerana.

15 Aꞌa ei manumanu ei ma ei uꞌadoꞌo guainaa fei narafaweꞌiaa hamuꞌou aꞌa mei Fasu Jesus ma fei haguaa hamuꞌou aꞌa minaa ei apunaiaa mei Haidaa, 16 lomi una fafaa ware ba ‘ta’ uaa hamuꞌou ma unaꞌo nonominaa hamuꞌou aꞌa ei lafulafuau. 17 Unaꞌaida iꞌigai ba mei Haidaniaa mei Fasuu oꞌou Jesus Christ, mei Ama, mei na bauanai hawerana, ba nei fanaa hamuꞌou fei Spiritii^f apaꞌa, fei ba nei arewa ei manumanu aꞌa hamuꞌou ba hamoꞌaa apaꞌifarawaninia. 18 Ana una lafulafu ba nei arewa ei naranaraa hamuꞌou ba hamoꞌaa aida ba batanai fei oꞌonaia unu wagii fei rafeiana hamuꞌou, ei baua hawegiana aꞌa ei apunaia, 19 ma ba fei faufauna aꞌa oꞌou ei ona narafaweꞌi, lomi tawiꞌana. Fei faufau fei, ina aleꞌei fei bigiꞌaa fei baua faufauna, 20 fei ina bigiꞌia aꞌa Christ, ei i faꞌasiꞌania aꞌa fei maꞌea ma na fagutania maꞌauna aꞌa fei gufu pafea, 21 namina pafeai laraa minaa ei hapara, forafora, faufaua, fasu ma minaa ei hara aꞌa feni au feni mawe fena au ataa nomai. 22 Ma mei Haidaa na augaa minaa ei manumanu haroo pinena ma na unia ba hia fasuu minaa ei manumanu wagii fei losuu, 23 ma fei losuu fei, fei ununa ma aꞌa minaa ei maumauna, ina fapepesunaa minaa ei manumanu tadiweꞌaia.