2 Hamonei tomaꞌaiaa ei wareau. Yau, Paul, a warefanaa hamuꞌou ba nabaa hamona moroꞌaa hudii wawanei hamuꞌou, paꞌaa lomi i paꞌi awataa Christ i aꞌa hamuꞌodu. 3 A warediai aꞌa hememea ramaꞌa, hemei ba ina moroꞌaa hudii wawaneina, inei neneraa minaa ei law. 4 Yoi mena ba o neneraa fei law, ona fidiꞌinii aꞌa Christ; ona pasidiꞌininaa fei rawaniꞌaa mei Haidaa. 5 Maꞌuaa wagii fei narafaweꞌia, ona pasirefurefufipui aꞌa fei Spiritii fei wanewanea, fei ona nunuminia. 6 Uaa aꞌa Christ Jesus, fei ba ona moroꞌaa hudii wawanei, o lomi, lomi hanuna. Hepalo ua na paꞌi hanuna; fei narafaweꞌia, fei na arewa fininaa fei haguana.

7 Famaꞌa hamona poponifaweꞌi aꞌa fei fiwaleia. Hini na oreꞌaa hamuꞌou ma lomi hamona neneraa fei faꞌuaia? 8 Fei mau uꞌugaia aleꞌei, abaa noranamai aꞌa mei i lalaꞌaa hamuꞌou. 9 “Maꞌida ua fafuafua i fihafuinaa minaa fei palaua.” 10 Na paꞌi oꞌugau aꞌa mei Fasu ba lomi hamoꞌaa tonaa hepalodiai naranara. Lomi na aida ba hia hini, maꞌuaa, mei i fapoapoainaa hamuꞌou, iwe tonaa arena. 11 Ena lofuu, nabaa yau ana fi uꞌugaa fei moroꞌaa hudii wawanei, tani ei ba ana roꞌei haperaraiau eni? Nabaa aleꞌei, lomidiai i bidibidi unuu ramaꞌa aꞌa fei hawafolo. 12 Aꞌa ei ramaꞌa rona wareware watauda aleꞌei, narau ba ronei fapedugaa bigiꞌaa roꞌou ma hawihawiꞌaa minaa ei unuu roꞌou!

13 Hamuꞌou ena lofuu, ina rafeinaa hamuꞌou ba hamonei maꞌala. Maꞌuaa apuna tonaa fei maꞌalaa hamuꞌou ba hamoꞌaa bigiꞌaa ei maumau hafeloꞌa;^a agia, pafoo hamuꞌou nei firawanii ua fininaa hagua. 14 Minaa ei law na paꞌi hepalo ua paꞌafina; sifei ba: “Haguaa mei gufumu aleꞌei ona haguio.” 15 Nabaa ana hamoꞌei fibibiyenii ma fihafeloinii, omaꞌaiaa hamuꞌou, nabaa lomi, hamoꞌaa fifagianainaa ana hamuꞌou.

16 Siꞌei, a ware ba nabaa hamoꞌaa oa aꞌa fei Spiriti, lomi ba hamowe bigiꞌaa tamanu ei nunumiaa fei maumau hafeloꞌa. 17 Uaa fei maumau hafeloꞌa na nunuminaa tamanu na fadugeaa fei Spiriti ma fei Spiriti na nunuminaa tamanu na fadugeaa fei maumau hafeloꞌa. Laguna fifadugii ma siꞌei ba lomi oꞌaa bigiꞌaa tamanu nunumiamu. 18 Maꞌuaa, nabaa o neneraa fei Spiriti, lomi ba ona oa haroo fei law.

19 Ei bigiꞌaa fei maumau hafeloꞌa na arewaꞌuamai: fitatafipaꞌaia, ei abaa fafaꞌaraia ma fafeloaa ana yoi; 20 losuinaa ei haidaa sifisifi ma fifinesi; bidibidii unu; lomi firawania; punepunea, fifiꞌii unu, wawaꞌai poai, fiharenii, hefaa gupu na fifalagii, 21 nanamaia; hunu poapoai, hefaa gupuu fiharoharoipaꞌaia; ma ei maumau aleꞌei. A aweinaa hamuꞌou aleꞌei una warefanaa hamuꞌou mina ba hini i bigiꞌaa ei manumanu ei, lomi ba i tonaa fei haparaiaa mei Haidaa.

22 Maꞌuaa, siꞌeni eni fuaa fei Spiriti: hagua, niꞌeniꞌea, gutafarawania, fawiwiꞌaia, farawani aꞌa ramaꞌa, ei maumau rawani, fei mau oafagugua, 23 madumuaa ramaꞌa ma apitaia. Aꞌa ei manumanu ei, lomi na paꞌi law. 24 Ei rona oa aꞌa Christ Jesus, rona fatawaiaa ei maumau hafeloꞌa fipuinaa ei nunumiaa unu. 25 Siꞌei ba ona oafipui aꞌa fei Spiriti, onei tatalaifipui aꞌa fei Spiriti. 26 Oneiꞌaa faꞌupeꞌupei ba ona rawani ma fawesuaa iaa nemea ma fibaꞌibaꞌinaa hememea hamuꞌou.