Bigifarawani aꞌa Minaa ei Ramaꞌa
6
Ena lofuu, nabaa nemea na pasipaꞌai aꞌa ei hafeloꞌa, hamuꞌou ena hamona oa aꞌa fei Spiriti, hamonei nofagigilao ma faꞌufalarainia, maꞌuaa omaꞌaa hamuꞌou uaa nabaa lomi, ana hamoꞌaa pasi. 2 Harefipuinaa ei rarabaa hememea ma aꞌa fei, hamopowe fafaꞌuainaa fei law Christ. 3 Hini i nara ba na paꞌi harana, maꞌuaa lomi harana, ina sifiꞌaa anaia. 4 Hememea nei fanunumaꞌaiaa ei bigiꞌana. Te, nene iwe faꞌupeꞌupei ma loꞌe ba i fihawawaginaa anaia aꞌa nemeadiai, 5 uaa hememea nei harenaa awataa anaia. 6 Hini i tonaa feroia aꞌa fei Buꞌu Apuna, nei alaginaa minaa ei rawaniꞌa manumanu aꞌa mei feroiana.
7 Apuna atetea: lomi nemea ba i falalasipaꞌaa mei Haidaa. Hemea ramaꞌa iwe hufuꞌaa tamanu na faroia. 8 Mei i faro aꞌa ei nunumiaa fei maumau hafeloꞌa, aꞌa fei maumau fei,a i paꞌaa arena; mei na faro aꞌa ei nunumiaa fei Spiriti, aꞌa fei Spiriti, i hufuꞌaa fei harenua lomi i pedutoo. 9 Oneiꞌaa fatatarere aꞌa ei rawaniꞌa manumanu uaa aꞌa fei paꞌaa au, opowe hufuꞌaa ei fua nabaa lomi ona fapedu ua bigiꞌa. 10 Siꞌei ba na paꞌi au oꞌou, onei bigifarawani aꞌa minaa ei ramaꞌa, paꞌaa aꞌa ei maroaa fei narafaweꞌia.
Abaa Moroꞌaa Hudii Wawanei, maꞌuaa Manufau Famamaraia
11 Maꞌaiaa ei baua neꞌia a neꞌinaa aꞌa hamuꞌou wagii fei paniu!
12 Ena ba roꞌaa hofeaa hamuꞌou rona nunuminia ba hamonei moroꞌaa hudii wawanei hamuꞌou. Fei paꞌaa paꞌafina sifei ba roꞌaa farapa wagii fei haperaraia, fei i nofininamii fei hawafoloo Christ. 13 Ei rona moroꞌaa hudii wawanei roꞌou, ana lomi ba rona neneraa fei law, maꞌuaa rona nunuminia ba hamonei moroꞌaa hudii wawanei hamuꞌou ba roꞌaa famamagugui ba hamuꞌou i aꞌa roꞌou. 14 Nunumiau ba a famamagugu aꞌa hepalo ua manumanu—fei hawafoloo mei Fasuu oꞌou, Jesus Christ. Aꞌa fei,b feni ano na fatawa aꞌau ma yau aꞌa feni ano. 15 Fei moroꞌaa hudii wawanei, o lomi, lomi hanuna; fei na paꞌi hanuna sifei, fei manufau famamaraia. 16 Fei gutafarawania ma faloloaꞌia i dinaa aꞌa minaa ei rona neneraa feni warea feni ma ana i dinaa aꞌa ei Israel, ei rona oa aꞌa mei Haidaa.
17 Ma fapopoꞌii wareau, nemea neiꞌaa fahafeloau hamatee na paꞌi dibaa loralora unuu uaa Jesus.
18 Ena lofuu, fei rawaniꞌaa mei Fasuu oꞌou Jesus Christ, i oafipui aꞌa ei spiritii hamuꞌou. Amen.