4
Una ware aleꞌei ba mei ba i tonaa poduu amana, faꞌua ba iwe tonaa minaa ei poduu amana, maꞌuaa ei ifi badui, hia aleꞌei hemea nafi ua. 2 Inei oa haroo ei oanananaa ma ei omaꞌamaꞌaa nopaꞌaloo fei au diꞌaugaa amana. 3 Ana aleꞌei oꞌou, ei oi badui, oꞌou aleꞌei humuwa haroo ei maumau feni ano. 4 Maꞌuaa ei ipowe nomai fei au, mei Haidaa na aloagii mei Naꞌuna, mei na waninimai aꞌa hemea pifine, mei na waninimai haroo fei law, 5 ba i ponohadiweꞌinaa ei rona oa haroo fei law, ba oꞌou nei tonaa minaa ei manumanu aleꞌei ei paꞌaa naꞌu. 6 Siꞌei ba hamuꞌou naꞌu, mei Haidaa na aloagii fei Spiritii mei Naꞌuna i laloo iaa oꞌou, fei Spiriti na haroharo ba, “Abba,a Oꞌama.” 7 Siꞌei, lomidiai ba yoi humuwa eꞌeni, maꞌuaa yoi hemea naꞌu; ma siꞌei ba yoi hemea naꞌu, mei Haidaa na faꞌoanio ana aleꞌei hemea tonaa poduu amana. Paul na Naranara Watauda aꞌa ei Galatia
8 Famaꞌa, ei hamotaa apaꞌaa mei Haidaa, hamuꞌou humuwa aꞌa ei abaa aleꞌei maumau haidaa. 9 Maꞌuaa eꞌeni, hamona apaꞌaa mei Haidaa—o, a ware ba mei Haidaa na apaꞌaa hamuꞌou—siꞌei, tani ei ba hamoꞌaa momoꞌainaa aꞌa ei maumau lomi faufauna ma lomi hanuna? Haa, hamona nunumai ba hamoꞌaa humuwaidiai haroo roꞌou? 10 Hamoꞌei fanimaꞌaiaa hefiꞌa baua arewaa, puda, au ma igisimasi! 11 Na faharehareaa pepeau ei maumau hamuꞌou, ba tamanu ei una bigiꞌia aꞌa hamuꞌou, lomi hanuna.
12 Uꞌei wareꞌaiꞌai aꞌa hamuꞌou ena lofuu ba hamonei aleꞌeni yau, uaa yau nadoꞌo aleꞌei hamuꞌou mina. Lomi hamona fahafeloau aꞌa hepalo manumanu. 13 Hamona aida ba ei a uꞌugaa fei rawaniꞌa warea aꞌa hamuꞌou famaꞌa siꞌei ba fei funua na paꞌau. 14 Faꞌua ba fei funuau na fani rarabaa aꞌa hamuꞌou, maꞌuaa, lomi hamona fanunu o nara fafelo aꞌau. Agia, hamona faguta farawaninau banaꞌaa yau hemea aloꞌaloo mei Haidaa, o banaꞌaa paꞌaa yau Christ Jesus. 15 Ina dinaia ei niꞌeniꞌeaa hamuꞌou? Apaꞌaa ware ba mina, hamona bigiꞌaa tamanu ei nunumiau, aleꞌei nabaa una ware ba hamonei wenuꞌaa pudaa hamuꞌou ma fanau, lomi manumanu aꞌa hamuꞌou. 16 Haa, eni unawe oanaa bidibidii unuu hamuꞌou uaa ba una warefanaa hamuꞌou fei faꞌuaia?
17 Hefiꞌadiai ramaꞌa na refurefu unuu roꞌou ba roꞌaa muaitonaa hamuꞌou aꞌa roꞌou, maꞌuaa, na paꞌi hafeloꞌa wagina. Nunumiaa roꞌou, sifei ba oꞌounei fidiꞌinii ba hamonei pasirefurefu aꞌa roꞌou. 18 Ina rawani ba hamoꞌaa farefurefu nabaa fei paꞌafina na rawani ma ba hamuꞌou minaa aleꞌei ua ranimai ma abaa uniaa fei ba una nomai hamuꞌou. 19 Hamuꞌou ena naꞌuu, hamuꞌou ena na faꞌagiꞌaidinaa iau aleꞌei hemea pifine ba i wanini nopaꞌaloo fei ba fei maumau Christ na oafipui aꞌa hamuꞌou. 20 Unapaꞌaa nunuminia ba yau aꞌa hamuꞌou eꞌeni ma filoginaa fei lao fababagianau aꞌa hamuꞌou, uaa na bibiyei naranarau aꞌa hamuꞌou.
Hagar ma Sarah
21 Warefanau, hamuꞌou ena hamona nunumai ba hamuꞌou oa haroo fei law. Lomi hamona aida tamanu na wareia fei law? 22 Uaa na udedii fei neꞌia ba Abraham na paꞌi helagui naꞌuna, baduu wawane. Hemea naꞌu aꞌa mei humuwa pifine ma hemea aꞌa mei abaa humuwa. 23 Mei naꞌuna aꞌa mei humuwa pifine, ina waninimai aleꞌei ei baduu ua; maꞌuaa mei naꞌuna aꞌa mei abaa humuwa, ina waninimai uaa fei faꞌunaiaa mei Haidaa.
24 Ei manumanu ei, una warehanunuinia, uaa laguei pifine, lagua aleꞌei guapaloei fiꞌugaia. Hepalo fiꞌugaia, noranamai Maugeni Sinai ma ina wanininaa ei baduu, ei ba roꞌou humuwa: Hemeni Hagar. 25 Ma Hagar, hia aleꞌei Maugeni Sinai yei Arabia ma aleꞌei fei baua gufu Jerusalem eꞌeni, uaa hia mawe ei naꞌuna, rona oa aꞌa fei humuwai. 26 Maꞌuaa fei Jerusalem pafea, lomi humuwa wagina ma hia mei inaa oꞌou. 27 Uaa na udedii fei neꞌia ba:
“Onei niꞌeniꞌe mena paꞌabeu,
mena lomi ona wawanini baduu;
asiꞌalao ma aifabauana,
yoi, mena lomi na nanamuinaa fei fiꞌiaa fei waninia;
uaa ei naꞌuu mei paꞌabeu na watauda
laraa mei na paꞌi harona.”
28 Ma hamuꞌou ena lofuu, aleꞌei Isaac, hamuꞌou naꞌu wagii fei faꞌunaia. 29 Aꞌa fei au fei, mei baduu i waniniꞌuamai na haperaraiaa mei baduu na wanini aꞌa fei faufau fei Spiriti. Ana aleꞌeni eꞌeni. 30 Maꞌuaa tamanu ei wareaa fei Buꞌu Apuna? “Alofatatalainaa mei humuwa pifine ma mei naꞌuna, uaa mei naꞌuu mei humuwa, lomi ba iwe tonaa hesuwi podu aꞌa mei naꞌuu mei abaa humuwa.” 31 Siꞌei, ena lofuu, abaa oꞌou naꞌuu mei humuwa, maꞌuaa naꞌuu mei abaa humuwa.