Narafaweꞌia laraa fei Law
3
Hamuꞌou ena poapoa Galatia! Hini na finefineinaa hamuꞌou? I maꞌaa ei pudaa hamuꞌou napaꞌaa arewa ba Jesus Christ na fatawa. 2 Nunumiau ba a apaꞌaa hepalo manumanu aꞌa hamuꞌou: Hamona tonaa fei Spiriti wagii fei neneraa hamuꞌou fei law, o wagii fei narafaweꞌia aꞌa tamanu hamona guainia? 3 Haa, hamonamina poapoai? Famaꞌa hamonadoꞌo paꞌi fei Spiriti, maꞌuaa eꞌeni hamona nara ba hamoꞌaa fapedugaa ei bigiꞌaa hamuꞌou aꞌa fei faufau ramaꞌa. 4 Haa, hamona tonaa baua fiꞌiaa hamuꞌou ma lomi hanuna? Narau ba na paꞌi hanuna. 5 Haa, mei Haidaa na fanaa hamuꞌou fei Spiritina ma bigiꞌaa ei foigia aꞌa hamuꞌou uaa ba hamona neneraa fei law, o ba hamona narafaweꞌi aꞌa tamanu hamona guainia?6 Naramaꞌaia Abraham: “Ina narafaweꞌi aꞌa mei Haidaa ma aꞌa fei, hia na wanewane.” 7 Siꞌei, hamonei apaꞌifarawaninaa feni ba ei roꞌaa narafaweꞌi, roꞌou, naꞌuu Abraham. 8 Fei Buꞌu Apuna nadii wareia ba mei Haidaa, iwe fawanewaneaa ei Gentile aꞌa fei narafaweꞌia ma inadii ufugaa fei rawaniꞌa warea aꞌa Abraham ba: “Minaa ei gufu, rowe to hawegia uaa yoi.”a 9 Siꞌei, ei narafaweꞌia, rona paꞌi hawegiaa roꞌou fipui aꞌa Abraham, mei ramaꞌaa narafaweꞌia.
10 Minaa ei rona nara ba ronei neneraa fei law, rona oa aꞌa fei umua, uaa na udedii fei neꞌia ba: “Fei umua i dinaa aꞌa hini lomi na bigiꞌaa minaa ei manumanu laloo fei Buꞌuu Law.” 11 Na arewa ba lomi nemea ba i wanewane i pudaa mei Haidaa wagii fei law, uaa “Ei wanewanea, rona tatalai fininaa fei narafaweꞌia.” 12 Fei paꞌafii fei law, abaa manumanu narafaweꞌia; agia, “Mei i bigiꞌaa ei manumanu ei, inei neneraa eꞌei.” 13 Christ na ponohadiweꞌinaa oꞌou aꞌa fei umuaa fei law, hamatee ina tonaa fei umuaa oꞌou i aꞌana, uaa na udedii fei neꞌia ba: “Fei umua i dinaa aꞌa hini i fatawa aꞌa fei haihai.” 14 Ina ponohadiweꞌinaa oꞌou ba fei hawegia, fei na dinaa aꞌa Abraham nei nofipuimai aꞌa Jesus Christ ma dinaa aꞌa ei Gentile ba wagii fei narafaweꞌia, oꞌaa tonaa fei faꞌunaia ba oꞌaa tonaa fei Spiriti.
Fei Law ma fei Warefaꞌunaia
15 Ena lofu, adoꞌo famaꞌaia hepalo tala aꞌa feni gutagutanaa oꞌou wagieni. Ana aleꞌei ba nemea lomi ba i putotogi o pafoinaa hepalo fiꞌugaia, hepalo rona fiꞌugaidigia, ana aleꞌei aꞌa feni. 16 Ei faꞌunaia na dinaa aꞌa Abraham mawe fei fuana. Fei Buꞌu Apuna, lomi na ware ba, “i dinaa aꞌa ei fuamu,” aleꞌei ba watauda ramaꞌa, maꞌuaa, “i dinaa aꞌa fei fuamu,”b hanuna aleꞌei hemea ua, mei Christ. 17 Fei hanui yau sifeni: Fei law, fei nawe nomai 430 igisimasi nenee fei warea, lomi na putotoginaa fei fiꞌugaia, fei doꞌo bigiꞌaa mei Haidaa ma fapaꞌainaa fei faꞌunaia. 18 Uaa nabaa fei uga pinemu i nomai aꞌa fei law, lomi ba i nomai aꞌa fei faꞌunaia; maꞌuaa mei Haidaa aꞌa fei rawaniꞌana na fania aꞌa Abraham wagii fei faꞌunaia.
19 Ma nabaa aleꞌei, tamanudiai bigiꞌaa fei law? Ina nomai uaa ei hafeloꞌa nopaꞌaloo fei ba na nodigimai fei Fua, fei na unia fei faꞌunaia. Hemei fawanewaneaa watola nawe faꞌasiꞌanaa fei law aꞌa ei aloꞌalo. 20 Maꞌuaa hemei fawanewaneaa watola, lomi i umuinaa hepalo ua gupuu ramaꞌa; maꞌuaa mei Haidaa, hia hemea.
21 Hanuna ba fei law i fadugeaa ei faꞌunaiaa mei Haidaa? Paꞌaa lomi. Uaa, nabaa na hawia ba fei law i fani harenua, fei wanewanea ana i nofipuimai aꞌa fei law. 22 Maꞌuaa fei Buꞌu Apuna na ware ba minaa feni ano na boboꞌai aꞌa ei hafeloꞌa ba tamanu ei faꞌunaia, ei i nofininamii fei narafaweꞌia aꞌa Jesus Christ, inei dinaa aꞌa ei rona narafaweꞌi.
23 Ei atawe nomai fei narafaweꞌia fei, oꞌouna boboꞌai aꞌa fei law nopaꞌaloo fei ba ina arewa fei narafaweꞌia. 24 Siꞌei, fei law na ude aleꞌei hemea famamoa i tauduginaa oꞌou aꞌac Christ ba onei wanewane aꞌa fei narafaweꞌia. 25 Siꞌei ba eꞌeni, nawe nomai fei narafaweꞌia, fai lomi ba ona oa haroo fei law.
Ei Naꞌuu mei Haidaa
26 Minaa hamuꞌou, naꞌuu mei Haidaa uaa fei narafaweꞌia aꞌa Christ Jesus, 27 uaa minaa hamuꞌou, ena hamona pudugufai aꞌa Christ, hamona hufai aꞌa Christ. 28 Lomi Jew, Greece, humuwa, abaa humuwa, wawane, pifine, uaa minaa hamuꞌou, hemea ua aꞌa Christ Jesus. 29 Nabaa hamuꞌou aꞌa Christ, te, hamuꞌou fuaa Abraham ma aleꞌei hemea i tonaa poduu amana uaa fei faꞌunaia.