Ei Apostle, Rona Ugainaa Paul
2
Nenee hefua ma obao igisimasi, una hadiweꞌidinaa Jerusalem ma eni poꞌo haigua Barnabas. Ana una nodugaa Titus. 2 Una aunu uaa una tonaa hepalo faꞌarewaia ma una fanaa roꞌou fei rawaniꞌa warea, fei a uꞌufanaa ei Gentile. Maꞌuaa una aunufagiginaa aꞌa ei una nara ba roꞌou famamoa, uaa una nara ba hefiꞌa roꞌou, rona nara ba lomi hanuu fei uꞌugau. 3 Maꞌuaa Titus, meni hia aꞌau, faꞌua ba hia Greece, maꞌuaa ana lomi na nara ba inei moroꞌaa hudii wawaneina. 4 Fei i faꞌasiꞌanaa fei manumanu fei, siꞌei ba hefiꞌa sifisifi lofu, rona waduꞌaa fei gupuu haiꞌou ba roꞌaa fanunupaꞌainaa fei alara haiꞌouna paꞌi aꞌa Christ Jesus ma ba roꞌaa fahumuwainaa haiꞌou. 5 Paꞌaa lomi haiꞌouna fafefenaa roꞌou maꞌida ba tamanu na faꞌuai laloo fei rawaniꞌa warea nei oafipui aꞌa hamuꞌou.6 Aꞌa eꞌei rona nara ba roꞌou bauana—o, roꞌou tamanu, lomi hanuna aꞌau; abaa i fanununaa fei augu mei Haidaa—ma ei ramaꞌa ei, lomi rona pafoinaa hepalo manumanu aꞌa fei uꞌugau. 7 Agia, rona fanunupaꞌia ba una tonaa fei bigiꞌa ba unei uꞌugaa fei rawaniꞌa warea aꞌa ei Gentile,a ana aleꞌei Peter aꞌa ei Jew.b 8 Uaa mei Haidaa, mei i oa wagii fei bigiꞌaa Peter aleꞌei ba hia hemea apostle aꞌa ei Jew, ana ina oa aꞌa fei bigiꞌau ba yau apostle aꞌa ei Gentile. 9 James, Peterc ma John, ei rona ware ba roꞌou bauana, rona ugainaa haigua Barnabas ei roꞌaa fanunuꞌapaꞌia ba una todigaa fei rawaniꞌa. Rona ugainia ba haigunei dinaa aꞌa ei Gentile ma roꞌou aꞌa ei Jew. 10 Fei iꞌigaiaa roꞌou, sifei ua ba haiguneiꞌo naraiaa ei lomi rona paꞌi, ana fei na farefuau ba a bigiꞌia.
Paul na Fiharei aꞌa Peter
11 Iꞌa nonamii Antioch Peter, una hotaꞌia i pudana, uaa inapaꞌaa tata. 12 Ei roꞌatadoꞌo nomai ei maroaa James, inafaneree hananafipui aꞌa ei Gentile. Maꞌuaa, roꞌaa nomai, inaꞌaa momoꞌai ma guta uꞌugai aꞌa ei Gentile uaa ina mamaꞌau aꞌa ei maroaa fei moroꞌaa hudii wawanei. 13 Hefiꞌadiai Jew, rona neneraa fei wareꞌonina ma aꞌa fei wareꞌonii roꞌou, ana na faꞌasisiaa Barnabas.
14 Uꞌa fanunuꞌapaꞌia ba lomi rona neneraa tamanu na faꞌuai laloo fei rawaniꞌa warea, una warenaa aꞌa Peter i pudaa minaa roꞌou, “Yoi hemea Jew, maꞌuaa, ei mau gutanamu aleꞌei Gentile ma abaa aleꞌei hemea Jew. Tani opoꞌo susunaa ei Gentile ba ronei neneraa ei maumau ei Jew?
15 “Oꞌou na waninimai aleꞌei Jew ma abaa aleꞌei ei ‘Hafeloꞌa Gentile’, 16 ona aida ba hemea ramaꞌa, lomi ba i wanewane uaa ba ina neneraa fei law, maꞌuaa wagii fei narafaweꞌia aꞌa Jesus Christ. Siꞌei, oꞌou anaa, ona narafaweꞌi aꞌa Christ Jesus ba oꞌaa wanewane wagii fei weꞌiaa naranara aꞌa Christ ma abaa aꞌa fei neneraa oꞌou fei law, uaa wagii fei ba o neneraa fei law, lomi nemea ba i wanewane.
17 “Nabaa oꞌaa nunuminia ba onei wanewane aꞌa Christ ma ona fanunuꞌapaꞌia ba oꞌou, ramaꞌa hafelo, hanuu fei ba Christ na tenaa ei hafeloꞌa? Paꞌaa lomi. 18 Nabaa una fadudinaa tamanu unadoꞌo birosia, una famaꞌaia ba yau, hemea barafeaa fei law. 19 Uaa una maꞌe wagii fei law ba unei paꞌi harenua aꞌa mei Haidaa. 20 Una fatawafipuidii aꞌa Christ ma lomi una gutadimai, maꞌuaa Christ na oa laloo iau. Fei gutanau aꞌa feni hudi unuu, una gutafininaa fei weꞌiaa naranara aꞌa mei Naꞌuu mei Haidaa, mei na haguau ma na fanaa anaia uaa yau. 21 Aꞌa ba una putotoginaa fei rawaniꞌaa mei Haidaa, uaa nabaa fei wanewanea o tonia wagii fei law, paꞌaa lomi hanuu fei maꞌeaa Christ!”d