I dinaa aꞌa ei losuu i Galatia:

3 Ina ude i pafoo hamuꞌou fei rawaniꞌa ma gutafarawaniaa mei Haidaa, mei hia Ama mawe mei Fasu Jesus Christ, 4 mei na fanaa anaia uaa ei hafeloꞌaa oꞌou ba i fatelaꞌanaa oꞌou aꞌa feni hafeloꞌa au eꞌeni, aleꞌei nunumiaa mei Haidaa, mei Amaa oꞌou. 5 Fei hawera i ude i aꞌana ranimai ranimai. Amen.

6 Una baꞌarofo ba lomi na madii ma hamona ponidiꞌininaa mei na lalaꞌaa hamuꞌou wagii fei rawaniꞌaa Christ ma hamona momoꞌainaa aꞌa hepalo uꞌugai rawaniꞌa warea— 7 fei abaa paꞌaa rawaniꞌa warea. Na fafanunu aleꞌei ba hefiꞌa, ba roꞌaa fapoapoainaa hamuꞌou ba roꞌaa haduaa fei rawaniꞌa wareaa Christ. 8 Maꞌuaa, nabaa ana haiꞌou o nemea aloꞌalo noramiana pafea i uꞌugaa hepalo rawaniꞌa warea, hepalo na uꞌugai laraa fei haiꞌounadoꞌo uꞌufanaa hamuꞌou, ana hia ipaꞌaa tonaa fei arena lomi i pedutoo! 9 Aleꞌei haiꞌouna waredii, hee, eꞌeni a warediai: nabaa nemea i uꞌufanaa hamuꞌou hepalo rawaniꞌa warea na uꞌugai aꞌa fei hamona todigia, ipaꞌaa tonaa fei arena lomi i pedutoo!

10 Haa, eꞌeni ba a tonaa fei ugaiaa ramaꞌa, o ugaiaa mei Haidaa? O, ba a faniꞌeniꞌeaa ramaꞌa? Nabaa yau ana fi faniꞌeniꞌeaa ramaꞌa, yau abaa hemea nafii Christ.

11 Ena lofu, nunumiau ba hamonei aida ba fei rawaniꞌa warea, fei a uꞌugia, abaa bigiꞌuaa ramaꞌa. 12 Abaa tonau aꞌa hemea ramaꞌa, ana abaa feroiaa roꞌou yau; agia, una tonia aꞌa fei faꞌarewaiaa Jesus Christ.

13 Uaa hamona guaidigaa fei mau talaiau aꞌa fei mau losuu ei Jew ba batanai a haperaraiaa fei losuu mei Haidaa ma birosia. 14 Yau namina fanimaꞌaiaa fei mau losuu ei Jew ma muainaa watauda ei rorou aꞌa ei Jew ma unamina pasirefurefu aꞌa ei maumau ei amau. 15 Maꞌuaa wagii fei rawaniꞌana, mei Haidaa na niꞌeniꞌe ma na rafeinau ei fi waniniꞌuamai^a 16 ba i faꞌarewaiaa mei Naꞌuna i aꞌau ba unei uꞌugia aꞌa ei Gentile, lomi una faꞌiꞌiginaa hemea ramaꞌa. 17 Ana lomi una dinaloo Jerusalem ba aree maꞌa ei roꞌou doꞌo apostle famaꞌa laraa yau, maꞌuaa unadoꞌo adigupenaa Arabia ma hinene na hadiweꞌinaa Damascus.

18 I dii, nenee oduai igisimasi, una dinaa Jerusalem ba adoꞌo apaꞌifarawaninaa Peter^b ma na gutafipui aꞌana hefua ma haipani arewaa. 19 Lomi una maꞌa hemeadiai apostle—uniaa James, mei lofuu mei Fasu. 20 Uꞌeipaꞌaa warefafaꞌuai aꞌa hamuꞌou i pudaa mei Haidaa ba tamanu ei neꞌiau, abaa sifisifi. 21 Nene na dinaa Syria ma Cilicia. 22 Lomi ronamina apaꞌau ei losuu yei Judea, ei rona oa aꞌa Christ. 23 Rona guai ua fei warea ba: “Mei ramaꞌa, mei nadoꞌo haperaraiaa oꞌou mina, eꞌeni ifi uꞌugaa fei narafaweꞌia, fei ba i doꞌo fapedugia.” 24 Ma rona uduginaa mei Haidaa uaa yau.