Siꞌei, Paul na piꞌinaa panina ma wareaa pepei aꞌana: 2 “Mena Hapara Agrippa, unamina niꞌe wagieni ba una u i pudamu ma wareaa pepei aꞌau wagii minaa ei tata ei Jew rona ware ba una bigiꞌia. 3 Ma una niꞌediai uaa yoi, ona apaꞌifarawaninaa minaa ei maumau ei Jew ma tamanu rona fiharenii wagina. Siꞌei, amina iꞌiginio ba onei guaifarawaninau.

4 “Minaa ei Jew, ronamina apaꞌifarawaninaa fei maumau ui badui nopaꞌamii wagieni, fei rawarawa maumau yei gufuu mawe yei Jerusalem anaa. 5 Apaꞌaa roꞌou yau ana fiwaniniꞌuamai nopaꞌamii wagieni ma nabaa ro nunuminia, roꞌaa warefaꞌuai ba na paꞌi hepalo maroa laloo fei losuu haiꞌou namina waiwai nenerana ma yau hemea Pharisee wagina. 6 Na oꞌonai unuu aꞌa tamanu mei Haidaa nadii faꞌunainia aꞌa ei amaa haiꞌodu. Ma siꞌeni a u maꞌaa feni dududua wagieni. 7 Ma fei nadii faꞌunainia mei Haidaa aꞌa ei hefua ma guapaloei pai Israel, ronamina neneraa mei Haidaa arewaa ma poi ba roꞌaa fanunuaa tamanu mei Haidaa nadii faꞌunainia ba i bigiꞌia. Mena hapara, wagii feni oꞌonaia unuu, ei Jew rona ware ba una bigifatata. 8 Tani hamoꞌaa hamamagua wagii fei ba mei Haidaa i faꞌasiꞌanaa ei maꞌea?

9 “Yau ana na nara ba uneimina bigiꞌaa tamanu ba i fadugeaa fei haraa Jesus, mei Nazareth. 10 Ma sifei fei bigiꞌau yei Jerusalem. Ei famamoaa humuu mei Haidaa na ugainau ma una boboꞌainaa watauda ei apunaiaa mei Haidaa ma ana una uga ba ronei maꞌe. 11 Watauda arewaa una dinaa aꞌa hepapalo synagogue ba a panarofaa roꞌou ma maniaa roꞌou ba ronei warefafeloaa mei Haidaa. Fei fifiꞌii unuꞌuau aꞌa roꞌou ma ana una aununaa hefiꞌa gufu raua ba a haperaraiaa roꞌou.

12 “I aꞌa hepalo tatalaia aleꞌei, ei famamoaa humuu mei Haidaa, rona fani forafora aꞌau ma aloau ba nei dinaa Damascus. 13 Mena hapara, aleꞌei haloaina, ei fi talailao tala, una fanunupaꞌaa hepalo weꞌai i pafea na muainaa weꞌaa fei halo, namina weꞌafaweloinau ma ei tafiu. 14 Haiꞌounamina pasinaa pu ma una guainaa hepalo lao na warenaa aꞌau warea Aramea,^a ‘Saul, Saul, tani o haperaraiau? Napaꞌaa waiwai aꞌamu ba oꞌaa putotoraa ei nunumiau.’

15 “Unawe iꞌigai, ‘Yoi hini, mena Fasu?’

“Na ware mei Fasu, ‘Yau Jesus, mei ona haperaraia. 16 Nadii, asiꞌaꞌufalarai. Una faꞌarewa aꞌamu ba a rafeinio aleꞌei nafi ba onei uꞌugaa ei fanunuamu aꞌau ma tamanu awe famaꞌaio. 17 Uꞌa fatelaio aꞌa ena gufumu mawe ena Gentile. A alonaa yoi aꞌa roꞌou 18 ba onei faꞌarewaiaa pudaa roꞌou ma famomoꞌainaa roꞌou aꞌa fei roromaa, foisinamii roꞌou aꞌa fei weꞌai ma famomoꞌainaa roꞌou i aꞌa fei faufau Satan, foisinamii roꞌou aꞌa mei Haidaa ba i futoaa ei hafeloꞌaa roꞌou ma ropowe oafipui aꞌa ei una papaditainaa roꞌou uaa rona narafaweꞌi aꞌau.’

19 “Ma siꞌei, mena Hapara Agrippa, lomi una barafeaa fei fanunuau noranamai pafea. 20 Famaꞌa nadoꞌo uꞌu aꞌa ei yei Damascus, nenee fei, yei Jerusalem ma tadiweꞌaiaa Judea mawe ei Gentile anaa. Una uꞌu ba ronei filoginaa naranaraa roꞌou ma foisinaa aꞌa mei Haidaa ma famaꞌaia ba ronapaꞌaa filoginaa naranaraa roꞌou aꞌa ei bigiꞌaa roꞌou. 21 Sifei fei paꞌafina ba ei Jew, rona panarofau yei malalaa fei humuu mei Haidaa ba roꞌaa foꞌafamaꞌeau. 22 Maꞌuaa fei hadumaa mei Haidaa na oa i aꞌau nopaꞌamii wagieni ma siꞌei, una u yeni ba a uꞌufanaa ei lomi haraa roꞌou mawe ei baua ramaꞌa. Ei wareau, lomi na pafoinaa ei wareaa ei mamamaꞌa ma Moses ba iwe nomai 23 mei Christ^b ma tonaa fiꞌina ma hia, mei rawarawa asiꞌana aꞌa fei maꞌea ba i uꞌugaa fei weꞌai aꞌa ei gufuna mawe ei Gentile.”

24 Aꞌa fei, Festus na baꞌofaa wareaa Paul. Ina pararai, “Paul, yoi, ona poapoai. Fena baua apaꞌamu na fapoapoainio.”

25 Paul na ware, “Lomi una poapoai, mena rawaniꞌa Festus. Tamanu eni wareau, paꞌaa faꞌua ma na wanewane. 26 Mei hapara na apaꞌidigaa ena manumanu ena ma a warefaꞌaꞌaꞌua i aꞌana. Unapaꞌaa aida ba tamanu ei una wareia, hia na aidadii uaa abaa manumanu opaꞌaia. 27 Mena hapara Agrippa, ona nara ba faꞌua ei wareaa ei mamamaꞌa? Una aidadii ba ona nara ba faꞌua.”

28 Siꞌei, Agrippa na warenaa aꞌa Paul, “Naramu ba maꞌideni au aleꞌeni o foranotonaa naranarau ba yau hemea Christian?”

29 Paul na ware, “Na madii, o loꞌe, a iꞌiginaa mei Haidaa ba yoi ma minaa ei rona guainaa ei warea, ronei aleꞌei yau, maꞌuaa hamoneiꞌaa paꞌi eni alatai.”

30 Mei hapara na asiꞌaa ma mei gavanaa ma Bernice mawe ei rona gutafipui aꞌa roꞌodu. 31 Rona asiꞌadiꞌininaa fei laloo humu ma roꞌei fiwarewareilao, rona ware, “Meni ramaꞌa meni, lomi na bigiꞌaa hepalo manumanu ba ponoꞌana maꞌea o boboꞌaia.”

32 Agrippa na warenaa aꞌa Festus, “Meni ramaꞌa meni, ana ipaꞌaa ala nabaa lomi na ainaa aꞌa Caesar.”