6 I gutadii aꞌa roꞌou aleꞌei fainaroa o hefua arewaa, ina upuꞌaunulao yei Caesarea. Ma heaidiai arewaa na faꞌasiꞌadinaa fei dududua ma warenaa aꞌa roꞌou ba ronei faꞌugaa Paul i maꞌana. 7 I nodigimai Paul, ei Jew, noramiaa roꞌou Jerusalem, rona ufaweloinia ma wareaa watauda manumanu namina raraba ba hia na bigifatata wagina. Ma lomi na paꞌi ugaa pinee roꞌou.

8 Siꞌei, Paul na ufalarai ma wareaa fipepei aꞌana, “Lomi una bigiꞌaa heꞌa tata wagii fei law ei Jew, o aꞌa fei humuu mei Haidaa, o aꞌa Caesar.”

9 Nunumiaa Festus ba i farawaninaa ei Jew, siꞌei, na iꞌiginaa Paul, “Na rawani aꞌamu ba oꞌaa dinaa pafea yei Jerusalem ma ufalarai ba unei dududuio yei wagii eꞌei wareaa roꞌou?”

10 Na ware Paul, “Eꞌeni ufi u aꞌa hepalo humuu dududuaa Caesar. Ma paꞌaa sifeni feni humuu dududua ba hamoꞌaa dududuau. Yoi, ona aidadii ba lomi una bigiꞌaa hepalo tata aꞌa ei Jew. 11 Maꞌuaa nabaa hamona labagipaꞌaa hepalo baua tatau ba fei ponoꞌana maꞌea, te, hamonei foꞌafamaꞌeau. Maꞌuaa nabaa lomi na faꞌua ei wareaa ei Jew aꞌau, paꞌaa lomi na wanewane ba hemea i fifaninau aꞌa roꞌou. Yau na ainaa aꞌa Caesar!”

12 I warewarefipuidii aꞌa ei maroana Festus, na ware, “Yoi, ona ainaa aꞌa Caesar, te owe aununaa aꞌa Caesar!”

13 Hefiꞌadiai arewaa i didii, mei Hapara Agrippa ma Bernice, laguna sufudai yei Caesarea ba laguꞌaa taufagutanaa Festus. 14 Siꞌei ba laguna guta famadii maꞌida yei, Festus na warewareaa fei dududuaa Paul aꞌa mei hapara. Ina ware, “Na paꞌi hemea ramaꞌa yeni, hemea na boboꞌai uaa Felix. 15 Ei a dinaa Jerusalem, ei famamoaa humuu mei Haidaa ma ei bauaniaa ei Jew, rona ware ba ina paꞌi tatana ma rona iꞌigainau ba unei ware ba na paꞌaa tata ma unei fanimaꞌaia.

16 “Una warefanaa roꞌou ba abaa aleꞌei maumau Rome ba haiꞌou fifaninaa mei rona ware ba na tata nabaa loꞌe nadoꞌo uwareaa fipepei aꞌana, aꞌa ei rona ware ba hia na bigifatata. 17 Ei roꞌaa nomai aꞌau, lomi ba una famadinaa fei dududua. Heaidiai arewaa ma una faꞌasiꞌanaa fei dududua ma warenaa aꞌa roꞌou ba ronei dugamai mei. 18 Roꞌaa ufalarai, ei roꞌaa ware ba ina bigifatata, lomi rona wareaa tamanu bigifatatana yau una naraia. 19 Maꞌuaa, roꞌou ma hia, rona fiharenii wagii fei mau losuu roꞌou ma hemea maꞌea harana Jesus, hemea na ware Paul ba ina werawera eꞌeni. 20 Nawe puloto tabau ma una nara ba, ‘Haa, a fadududubatanainia eni manumanu aleꞌeni feni.’ Siꞌei una iꞌiginia ba na rawani aꞌana ba i dinaa Jerusalem ma ufalarai aꞌa fei dududua yei aꞌa eꞌei wareaa roꞌou.” 21 Iꞌa ware ba fei dududuana nei fifaninaa panii Augustus, una ware ba roneidoꞌo panarofia hawina na alonaa hia aꞌa Caesar.”

22 Siꞌei, na ware Agrippa aꞌa Festus ba, “Ba adoꞌo guai wareaa mei ramaꞌa mei yau.”

Ina ware, “Nadii, owe guainia.”

23 Heaidiai arewaa, Agrippa ma Bernice, laguna nofipuimai aꞌa ei bauaniaa foꞌaa mawe ei bauaniaa gufu ma ei ramaꞌa rona taufagutanaa lagua. Iꞌa ware Festus, rona dugamii Paul. 24 Festus na ware, “Mena Hapara Agrippa ma minaa hamuꞌou eni yeni wagieni, hamuꞌou fanunuia meni ramaꞌa meni! Minaa ei Jew, ronamina iꞌiginau aꞌana yei Jerusalem ma yeni Caesarea ma harofafifiꞌi ba hia nei maꞌe. 25 Lomi una labagipaꞌaa hepalo tatana ba ponoꞌana maꞌea. Maꞌuaa, hamatee ina ainaa aꞌa Augustus una waredii ba a alonaa hia Rome. 26 Maꞌuaa lomi na aida ba a neꞌinaa tamanu aꞌa Caesar wagina. Siꞌei, una faꞌufalarainia yeni pudaa hamuꞌou ma ana napaꞌaa rawani ba yoi yeni, mena Hapara Agrippa, ba wagii feni fiwarewareia, ipowe paꞌi paolaa neꞌiau aꞌa Caesar. 27 Uaa lomi na rawani aꞌau nabaa o aloaa nemea boboꞌaia ma lomi odoꞌo warefaꞌarewainaa fei tatana.”