Fei Dududua i Pudaa Felix
24
Haipanidiai arewaa mei paꞌaa bauaniaa humuu mei Haidaa, Ananias na dinaa Caesarea fipui aꞌa hefiꞌa bauaniaa fei gufu ma hemea ramaꞌaa law harana Tertullus ma rona dududuaa Paul i pudaa mei gavanaa. 2 Rona lalaꞌaa Paul ba nei waduꞌaimai ma Tertullus na dududuia aꞌa Felix: “Haiꞌouna gutafamalaa ma gutafarawani ua i haroo iamu. Ma fei apaꞌamu na fawanewaneaa watauda manumanu i laloo feni baua gufu feni. 3 Naranaraa haiꞌou ma minaa ei gufu tadiweꞌai, hepalo ua ba yoi hemea paꞌaa rawaniꞌa ramaꞌa Felix ma haiꞌounamina niꞌeniꞌe aꞌamu. 4 Maꞌuaa loꞌe ba haiꞌoumina fatarereio, siꞌei haiꞌouꞌaa iꞌiginio ba na rawani ba odoꞌo guainaa maꞌida wareaa haiꞌodu wagii tamanu ei tataa Paul?5 “Haiꞌouna fanunupaꞌia ba meni ramaꞌa meni na faꞌasiꞌanaa hefiꞌa hafeloꞌa ma na fawesuaa iaa ei Jew tadiweꞌaiaa minaa feni ano. Hia mei bauaniaa fei maroaa fei losuu ei Nazarene 6 ma ana na mania ba i faloloaa fei humuu mei Haidaa. Siꞌei, haiꞌouna panarofia. 7\f + \fr 24:6-8 \ft Hefiꞌa neꞌia ba haiꞌouna panarofia ba haiꞌouꞌaa dududuia aleꞌei fei mau law haiꞌou. 7 Maꞌuaa, mei bauaniaa ei foꞌaa, Lysias, namii tarafia panii haiꞌou 8 ma ware ba ei ro ware ba hia na tata, roneimii u maꞌamu. Nabaa ana yoi\f* 8 Nabaa ana yoi, oꞌaa iꞌiginia, oꞌaa labagipaꞌaa fei fafasuii ei warea haiꞌouna dududuia wagina.”
9 Ei Jew ana rona ware ba ina bigifatata ma ware ba faꞌua ei manumanu ei.
10 I piꞌinaa panina mei gavanaa ba nei ware, na ware Paul, “Una aida ba laloo watauda igisimasi, yoi hemea fadududua aꞌa feni gufu feni. Siꞌei, una niꞌeniꞌe ba a wareaa pepei aꞌau. 11 Na maduta ua nabaa o labaginia ba na faꞌua fei wareau, fei ba laloo hefua ma guai arewaa ididii, una dinaa Jerusalem ba a losui. 12 Eꞌei rona ware ba una bigifatata, lomi rona guainau una fiharenii aꞌa hemea i humuu mei Haidaa, o fawesuaa iaa ramaꞌa laloo ei synagogue, o hitani laloo fei baua gufu yei. 13 Ma lomi rona faꞌarewapaꞌia aꞌamu ba una tata. 14 Maꞌuaa faꞌua ba unaꞌaida losuinaa mei Haidaniaa ei amaa haiꞌou, uaa una neneraa fei maroaa fei Tala, fei rona wareia ba na tata. Ma una neneraa minaa ei manumanu laloo fei Law ma tamanu rona neꞌinia ei mamamaꞌa. 15 Ma ana na paꞌi oꞌonaia unuu aꞌa mei Haidaa ana aleꞌei eni ramaꞌa eni ba iwe faꞌasiꞌanaa ei maꞌea, ei rona wanewane ma ei rona hafelo. 16 Siꞌei, ranimai unaꞌo fanimaꞌaia ba i pudaa mei Haidaa mawe ei ramaꞌa, paꞌaa lomi i marapu ei naranarau.
17 “Nene aleꞌei hefiga igisimasi, lomi una guta yei Jerusalem, unawe nomai ba a fani fana aꞌa ei gufuu ba ronei fanaa ei lomi rona paꞌi ma ba a fani fanau aꞌa mei Fasu. 18 A bigiꞌaa fei ma roꞌaa fanunupaꞌau i malalaa fei humuu mei Haidaa, aꞌa ba una loloa aꞌa fei maumau ba haiꞌounei fafaꞌarai. Lomi ba na paꞌi watauda ramaꞌa aꞌau ma ana lomi ba una bigiꞌaa manumanu na fafeloaa ei ramaꞌa. 19 Maꞌuaa na paꞌi hefiꞌa Jew noramiaa roꞌou Asia ma na rawani ba ronei nomai yeni i maꞌamu ma nabaa una bigifatata, te, ronei wareia. 20 O eni, roꞌou yeni, ronei wareaa tamanu fei tatau rona labagipaꞌia ei a u i maꞌaa ei bauaniaa gufu. 21 Narau ba sifeni. Ei a ufalarai i maꞌaa roꞌou, una haroharo ba: ‘Fei fafasui fei ba hamoꞌaa dududuau wagieni, sifei ba una nara ba i paꞌi asiꞌana aꞌa fei maꞌea.’”
22 Ma Felix, hemei na apaꞌifarawaninaa fei Tala, na doꞌo baꞌofaa fei dududua. Ma na ware, “Ena na nomai Lysias, mei bauaniaa foꞌaa, uꞌapowe dududuio.” 23 Ina ware aꞌa hemea centurion ba nei omaꞌafarawaninaa Paul, maꞌuaa inei fatalainia maꞌida ma neiꞌo fanoramiaa ei tafina mi roiana.
24 Hefiꞌa arewaa ididii Felix na nofipuimai aꞌa mei harona Drusilla, hemea Jew. Ina lalaꞌamii Paul ma na gutaguainia fi uꞌugaa fei weꞌiaa naranara aꞌa Christ Jesus. 25 I noꞌuꞌupaꞌaloo tamanu na wanewane, batanai onei apitai ma batanai fei dududua iwe nomai, Felix na maꞌau ma ware, “Doꞌo hiꞌei eꞌeni! Nowau. Nabaa na paꞌidiai rawaniꞌa au, te awe lalaꞌidinio.” 26 Ma ana ina nunuminia ba Paul nei fanipaꞌai mugoo poꞌi aꞌana, siꞌei ina lalaꞌiꞌuaiamai ranimai ma fiwarewarei aꞌana.
27 I didii heguai igisimasi, na tonaa bigiꞌaa Felix meni Porcius Festus, maꞌuaa Felix na nara ba idoꞌo farawaninaa ei Jew ma siꞌei, lomi na alaraa Paul humuu boboꞌaia.