23
Paul na fanunufawanewanenaa aꞌa ei bauaniaa gufu ma ware, “Ena lofuu, una bigifarawani ua i pudaa mei Haidaa ma na nanamuinia ba lomi tatau nopaꞌamii wagieni.” 2 Aꞌa fei wareana fei, mei paꞌaa bauaniaa humuu mei Haidaa, Ananias na warenaa aꞌa ei rona u papaa Paul ba ronei hafugaa umuna. 3 Ma Paul na warenaa aꞌana, “Mei Haidaa iwe hafugio, yoi mena wareꞌoni! Ona guta yena ba o dududuau aꞌa fei law, maꞌuaa ana yoi na barafeaa fei law uaa ona ware ba ronei hafugau!” 4 Ei roꞌaa u papaa Paul, rona ware, “Haa? Ba o warefafeloaa mei paꞌaa bauaniaa humuu mei Haidaa, mei na rafeinia mei Haidaa?”
5 Paul na ware, “Ena lofuu, lomi una aida ba hia, mei paꞌaa bauaniaa humuu mei Haidaa, uaa na ude fei neꞌia ba, ‘Apuna warefafeloaa hemea bauaniaa gufuu hamuꞌodu.’”
6 Ma Paul na aida ba hefiꞌa roꞌou, maroaa ei Sadducee ma hefiꞌa roꞌou, maroaa ei Pharisee ma na haronaloo aꞌa ei bauaniaa gufu, “Ena lofuu, yau hemea Pharisee, ana yau naꞌuu ei Pharisee. Ma paꞌafii fei ba una ufalarai aꞌa feni dududua, sifei ba na oꞌonai unuu ba ei maꞌea, rowe asiꞌaa.” 7 I wareaa fei, ei Pharisee ma ei Sadducee, rona fiharenii ma na guapaloi naranaraa roꞌou. 8 (Ei Sadducee rona ware ba ei maꞌea loꞌe ba roꞌaa asiꞌaa ma ba ana lomi na paꞌi aloꞌalo o spiriti, maꞌuaa ei Pharisee rona ware ba na paꞌi eꞌei manumanu eꞌei.)
9 Inawemina bauana fei fisibaiaa roꞌou. Ma hefiꞌa ei feroiaa law, hefiꞌa Pharisee, rona ufalarai ma warefaweꞌi, “Lomi ba haiꞌouna labagipaꞌaa hepalo tataa meni ramaꞌa meni. Tani naꞌaa poꞌo hefaa spiriti o aloꞌalo na warenaa aꞌana?” 10 Fei fiwareiaa roꞌou nawemina babaifafelo ma mei bauaniaa foꞌaa na naranara ba ropowemina fagianainaa Paul. Ina warenaa aꞌa ei foꞌaa ba ronei upulao ma rapuforaiamii Paul ma waduꞌainodugia laloo fei humuu ei foꞌaa.
11 Iree poidiai, mei Fasu na ufalarai papaa Paul ma ware, “Onei lauguꞌai! Ana aleꞌei o uꞌugau yei Jerusalem, ana onei uꞌugau yeni Rome.”
Fei Wareꞌopaꞌaia ba nei Maꞌe Paul
12 I mafufuoilao, ei Jew rona fiwarei ma faꞌunai ba paꞌaa lomi ba rowe hanana o hunu hawina rona foꞌafamaꞌeaa Paul. 13 Puduu ei ramaꞌa ei, na muainaa gunaroa paꞌania. 14 Rona dinaa aꞌa ei famamoaa humuu mei Haidaa ma ei bauaniaa gufu ma ware, “Haiꞌouna faꞌunaidii ba paꞌaa lomi ba haiꞌouꞌaa hanaiaa hepalo manumanu hawina haiꞌouna foꞌafamaꞌeaa Paul. 15 Siꞌei, hamuꞌou ma ei bauaniaa gufu, hamonei iꞌigifasifi aꞌa mei bauaniaa foꞌaa ba ronei dugiamai aꞌa hamuꞌou ba hamoꞌaa tofarawani fafasuii feni dududuana. Ma haiꞌouna ofafaufaudii ba haiꞌouꞌaa foꞌafamaꞌeia ena rona nomai.”
16 Maꞌuaa i guainia mei naꞌuu mei agii Paul, ina waduꞌainaa fei humuu ei foꞌaa ma warefanaa Paul.
17 Ma Paul na harofaa mei centurion ma ware, “Dugawii meni baubara aꞌa mei bauaniaa foꞌaa. Na paꞌi hepalo manumanu ba i warefania.” 18 Siꞌei, ina nodugia dinaa aꞌa mei bauaniaa foꞌaa.
Mei foꞌaa na ware, “Paul, mei boboꞌaia, na lalaꞌau ma ware aꞌau ba unei dugamii meni baubara aꞌamu, uaa ina paꞌi manumanu ba uꞌufanio.”
19 Mei bauaniaa foꞌaa na tauaa panii mei baubara, dugia ma iꞌiginia, “Tamanu fei ba o warefanau?”
20 Ina ware: “Ei Jew na fiwarewarei ba roꞌaa sifiꞌio ma iꞌiginio ba onei dugaloo Paul i pudaa ei bauaniaa gufu narani ba roꞌaa tofarawani fafasuii fei dududuana. 21 Oneiꞌaa ugainaa roꞌou, uaa puduu roꞌou na muainaa gunaroa paꞌania ma roꞌei opaꞌai eni ba roꞌaa panarofia. Rona faꞌunaidii ba paꞌaa lomi ba ro hanana o hunu hawina rona foꞌafamaꞌeia. Rona ofafaufaudii ma roi omaꞌaa fei ba oꞌaa ugainaa fei iꞌigaiaa roꞌou.”
22 Mei bauaniaa foꞌaa na aloaa mei baubara ma warefaweꞌi aꞌana, “Apuna warefanaa nemea ba ona warefanau feni.”
Rona Alonaa Paul Caesarea
23 Ma ina lalaꞌaa helagui centurion ma ware aꞌa lagua, “Harofaa enu puꞌu foꞌaa rona talainaa pinee roꞌou ma oloromfua paꞌaniadiai pafoo manulelele ma enu puꞌudiai panarofaa hioa ba ronei dinaa Caesarea poi wagieni aleꞌei faimheai idoꞌo. 24 Fani tawaa Paul manulelele ma omaꞌafarawaninia dinaa aꞌa Gavanaa Felix.”
25 Ma ina neꞌiꞌaloaa feni:
26 Yau Claudius Lysias.
Ma una neꞌinaa feni aꞌa mei Rawaniꞌa, Gavanaa Felix:
Haguꞌu.
27 Meni ramaꞌa meni, ei Jew, rona panarofia ma ana ba roꞌaa foꞌafamaꞌeia, maꞌuaa una nofipuimai aꞌa ei maroau foꞌaa ma haiꞌouna alagia, uaa una guainia ba hia ramaꞌaa Rome. 28 Una nara ba unei tofarawaninaa fafasuina ba tani roꞌaa ware ba ina bigifatata, siꞌei una nodugalao aꞌa ei bauaniaa gufu. 29 Unawe fanunuꞌapaꞌia ba fei wareaa roꞌou ba ina bigifatata, manumanu aꞌa fei law roꞌodu. Maꞌuaa lomi ba na bigiꞌaa hepalo tata ba nei maꞌe, o unei boboꞌainia. 30 Ma a guainia ba rona wareꞌopaꞌai ba roꞌaa foꞌafamaꞌeia, una alobatafanamai aꞌamu. Ma ana na warefanaa ei rona ware ba hia na tata, ba ronei uꞌufanio tamanu ei tatana.
31 Siꞌei, ei foꞌaa, rona bigiꞌaa fei wareaa mei bauaniaa roꞌou ma nodugaa Paul poi ma aunu nopaꞌaloo Antipatris. 32 Heaidiai arewaa rona aloia aꞌa ei foꞌaa pafoo manulelele ma roꞌou, rona hadiweꞌidinaa fei humuu foꞌaa. 33 Roꞌaa nopaꞌaloo Caesarea ei foꞌaa pafoo manulelele, rona fanaa fei neꞌia aꞌa mei Gavanaa ma fifaninia panina. 34 Mei Gavanaa na igoaa fei neꞌia ma iꞌigai ba noranamai hitani gufu. I guainia ba noranamai Cilicia, ina ware, 35 “Awe guainaa fena dududuamu rona nomai yeni ena roꞌaa dududuio.” Ma ina ware ba ronei augaa Paul laloo fei humuu Herod, fei humuu hapara ma omaꞌafarawaninia.