2 Roꞌaa guainia ba ina warenaa warea Aramea aꞌa roꞌou, ronamina babanini.

Ma na ware Paul, 3 “Yau hemea Jew, waniniau Tarsus yei Cilicia, maꞌuaa gipeau yeni aꞌa feni baua gufu feni. Gamaliel na feroifarawaninau aꞌa fei law ei amaa oꞌou ma na pasirefurefu unuu aꞌa mei Haidaa ana aleꞌei minaa hamuꞌou wagieni. 4 Una foꞌafamaꞌe ma haperaraiaa ei rona neneraa fei Tala. Na panarofaa ei wawane ma pifine ma boboꞌainaa roꞌou 5 ma mei paꞌaa bauaniaa humuu mei Haidaa ma minaa ei bauaniaa gufu roꞌaa warefanaa hamuꞌou ba paꞌaa faꞌua fei. Ma una tonaa neꞌiaa roꞌodu ba a fanaa ei lofuu roꞌodu yei Damascus ma aununaa yei ba a panarofaa ei ramaꞌa ma duginamii roꞌou yeni Jerusalem ba haiꞌouꞌaa fanimaꞌaa roꞌou.

6 “Aleꞌei haloaina una nofarafiꞌilao Damascus, ana ei ua, hepalo weꞌaia noranarai pafea namina weꞌafaweloinau. 7 Una pasinaa pu ma guainaa fei lao na warenaa aꞌau, ‘Saul! Saul! Tani o haperaraiau?’

8 “Ma una iꞌigai, ‘Yoi hini, mena Fasu?’

“Ina ware, ‘Yau Jesus, mei Nazareth, mei ona haperaraia.’ 9 Ei roꞌou aꞌau, rona fanunupaꞌaa fei weꞌai, maꞌuaa lomi rona guaiꞌapaꞌaa fei lao mei na warenaa aꞌau.

10 “Una iꞌigai, ‘Una fetanai eꞌeni, mena Fasu?’

“Ma ina ware, ‘Asiꞌaa ma dinaa Damascus. Hefiꞌa yei, rowe warefanio minaa ei i fanio mei Haidaa ba onei bigiꞌia.’ 11 Ei tafiu, rona tauaa paniu ma noduginaa yau Damascus uaa una pudawerai aꞌa fei weꞌai.

12 “Hemea ramaꞌa harana Ananias na nomai aꞌau. Hia, namina neneraa fei law ma na rawani i pudaa minaa ei Jew rona guta yei. 13 Inamii u papau ma ware, ‘Mena lofuu Saul, onei fanunudiai!’ Ana ei ma una fanunupaꞌia.

14 “Ma ina ware: ‘Mei Haidaniaa ei amaa oꞌou nadii rafeinio ba onei aida ei nunumiana ma fanunuꞌapaꞌaa mei Wanewanea ba onei guainaa ei wareaa umuna. 15 Yoi o uꞌufaꞌuainaa tamanu ona fanunuia ma guainia aꞌa minaa ei ramaꞌa. 16 Ma oi omaꞌaa tamanu eni? Asiꞌaa. Lalaꞌaa fei harana; pudugufai ma fesuaa ei hafeloꞌamu.’

17 “A hadiweꞌinaa Jerusalem ma lafulafu i laloo humuu mei Haidaa ma aleꞌei una mefi 18 ma fanunupaꞌaa mei Fasu na ware ba, ‘Batafa! Diꞌininaa Jerusalem eꞌeni, uaa lomi ba roꞌaa nunuminaa fei uꞌugau, fei ba o uꞌufanaa roꞌou.’

19 “Una ware, ‘Mena Fasu, eni ramaꞌa eni, rona aida ba yau, na dinaa aꞌa hepapalo synagogue ba a boboꞌai ma hafugaa hini ei rona narafaweꞌi aꞌamu. 20 Ma ei i wigii namoo Stephen, mei na maꞌe aꞌa fei haramu,^a yau yei ma ana na ugainia ma na omaꞌaa ei susuu ei rona foꞌafamaꞌeia.’

21 “Ma mei Fasu na warenaa aꞌau, ‘Nowau; Yau a alofarauaninio i aꞌa ei Gentile.’”

22 Ei ramaꞌa rona guainaa fei uꞌugaa Paul maꞌuaa ei i wareaa fei, rona haropararai, “Farauaninia aꞌa feni ano! Ineiꞌaa gutadimai!”

23 Roꞌei memewai ma siminaa lawalawaa roꞌou ma fapepeꞌaiaa ei pora 24 ma mei bauaniaa foꞌaa na ware ba ronei noduginaa Paul yei laloo humuu ei foꞌaa. Ina ware ba ronei babuinia ma iꞌiginia ba tani roꞌaa sibamemewai aꞌana ei ramaꞌa. 25 Roꞌaa fahainofolaginia ba roꞌaa babuinia, Paul na iꞌiginaa mei centurion ba, “Na rawani aꞌa fei law nabaa o babuinaa hemea ramaꞌaa Rome, hemea rotaa dududuia?”

26 I guainaa fei mei centurion, na dinaa aꞌa mei bauaniaa ei foꞌaa ma na warefania, “O bigiꞌaa tamanu aꞌa feni. Uaa mei ramaꞌa mei, hia ramaꞌaa Rome.”

27 Mei bauaniaa foꞌaa na dinaa aꞌa Paul ma iꞌiginia, “Ware fanau, yoi paꞌaa ramaꞌaa Rome?”

Ina ware, “Hiꞌi. Faꞌua.”

28 Ma mei bauaniaa foꞌaa na ware, “Yau, una siminaa watauda mugoo poꞌi ba yau hemea ramaꞌaa Rome.”

Paul na ware, “Maꞌuaa yau, waniniau Rome.”

29 Ma ei ba roꞌaa iꞌiginia ronawe uꞌua. Ma mei bauaniaa foꞌaa ana na maꞌau uaa na aida ba ina faugaa Paul aꞌa ei alatai, hemea ramaꞌaa Rome.

30 I arewadiai, siꞌei ba mei bauaniaa foꞌaa ba ipaꞌaa labaginia ba tani roꞌaa ware ei Jew ba na tata Paul. Ina alagia ma ware aꞌa ei famamoaa humuu mei Haidaa mawe ei bauaniaa gufu ba ronei papaꞌifipuimai. Ma ina dugamii Paul ma faꞌufalarainia pudaa roꞌou.