Saul na Filoginaa Naranarana
9
Maꞌuaa Saul, ana fi fifiꞌi ununa ba i foꞌafamaꞌeaa ei otalai neneraa mei Fasu. Na dinaa aꞌa mei paꞌaa bauaniaa humuu mei Haidaa 2 ma iꞌiginia ba nei neꞌinaa aꞌa ei synagogue yei Damascus ba nabaa i labagipaꞌaa hini maroaa fei Tala—pifine o wawane—nei panarofaa roꞌou ma boboꞌainaa roꞌou Jerusalem. 3 I norafiꞌinaloo Damascus aꞌa fei tatalaiana, ana ei ua, hepalo weꞌai noramiana pafea na weꞌafaweloinia. 4 Ina pasinaa malagufu ma guainaa hepalo lao na warenaa aꞌana ba, “Saul, Saul, tani o haperararaiau?”5 Saul na iꞌigai, “Yoi hini, mena Fasu?”
Ina ware, “Yau Jesus, mei o haperararaia. 6 Nadii. Asiꞌaa ma aununaa aꞌa fei baua gufu ma we guainaa tamanu ba nei bigiꞌia.”
7 Ei ro talaihugiaa Saul rona u hawainaa poaa roꞌou; rona guainaa fei lao, maꞌuaa, lomi na fanunupaꞌaa hemea ramaꞌa. 8 Saul na asiꞌaa aꞌa fei malagufu, maꞌuaa, ba i werainaa pudana, lomi na fanunupaꞌi. Siꞌei, rona tauaa panina ma duginaa hia Damascus. 9 Laloo oduai arewaa ina wera pudana ma lomi na hanana o hunu.
10 Yei Damascus na paꞌi hemea otalai nenera, harana Ananias. Mei Fasu na harofia aꞌa fei mefina, “Ananias!”
Ina ware, “Tani, mena Fasu?”
11 Mei Fasu na warenaa aꞌana, “Dinaa aꞌa fei humuu Judas yei Tala Wanewane ma labaginaa hemea Tarsus harana Saul, uaa, ifi lafulafu eni. 12 I aꞌa fei mefina na fanunupaꞌaa hemea ramaꞌa, harana Ananias na nomai augaa panina pafona ma faweradinaa pudana.”
13 Na ware Ananias, “Mena Fasu, yau na guainaa watauda uꞌugaa mei ramaꞌa mei ma minaa ei hafeloꞌa bigiꞌana aꞌa ei apunaiaa mei Haidaa yei Jerusalem. 14 Ina nomai yeni uaa ei famamoaa humuu mei Haidaa rona faninaa panina ba nei panarofaa hini i lalaꞌaa haramu.”
15 Maꞌuaa, mei Fasu na warenaa aꞌa Ananias, “Aunu ua! Mei ramaꞌa mei, una rafeinia ba waduu paniu talaitonaa harau i aꞌa ei Gentile ma ei haparaa roꞌou mawe ei Israel. 16 Ba a famaꞌaia batanai fiꞌia i tonia aꞌa fei harau.”
17 Siꞌei, Ananias na dinaa aꞌa fei humu ma waduꞌai. Na augaa panina pafoo Saul ma ware, “Mena lofuu Saul, mei Fasu—Jesus, mei i faꞌarewa aꞌamu i maꞌaa tala ei oi fi nomai yeni—na aloamiau ba onei fafanunudiai ma fei Spiriti Apuna neimina didifio.” 18 Ana ei ua, hefiꞌa manumanu aleꞌei huna na pasileleꞌaa pudaa Saul ma na fanunupaꞌidiai. Ina asiꞌaa ma rona pudugufainia 19 ma i hananadii, na faufaudiai.
Saul Yei Damascus ma Jerusalem
Saul na gutafipui aꞌa ei otalai nenera yei Damascus aleꞌei hefiꞌa arewaa. 20 Ana ei ma na uꞌu laloo ei synagogue ba Jesus, hia Naꞌuu mei Haidaa. 21 Minaa ei rona guainia na baꞌarofo ma iꞌigai, “Haa, ana simeni, meni i faꞌaguꞌagu ma foꞌaiaa ei roꞌaa lalaꞌaa fei hara yei Jerusalem? Ma abaa eni i nomai yeni ba i pataroboboꞌinaa roꞌou ma duginaa roꞌou aꞌa ei famamoaa humuu mei Haidaa?” 22 Maꞌuaa, Saul na toꞌapoidiai faufauna ma fapoapoainaa ei Jew roꞌaa guta yei Damascus, uaa, na faꞌarewaia ba Jesus, hia mei Christ.a
23 I nodigilao aleꞌena hefiga arewaa, ei Jew na fiwarewareipaꞌai ba roꞌaa foꞌafamaꞌeia. 24 Maꞌuaa Saul na guainia ba aleꞌei warewareaa roꞌou. Arewaa ma poi, ronamina pupudainaa ei poaa fanefanee fei gufu ba roꞌaa foꞌafamaꞌeia. 25 Maꞌuaa, ei neneraa Saul na dugia poi ma faꞌuꞌupuia laloo hepalo pa aꞌa fei walawalaa fei nono.
26 I nodigimai Jerusalem ba i bigifipui aꞌa ei otalai nenera, maꞌuaa, minaa roꞌou na maꞌauia ma nara ba hia abaa paꞌaa otalai nenera. 27 Maꞌuaa, Barnabas na duginaa hia aꞌa ei apostle. Ina warefanaa roꞌou batanai Saul ei i talaimai maꞌaa tala na fanunupaꞌaa mei Fasu ma mei Fasu na warenaa aꞌana ma batanai ba yei Damascus ina lauguꞌua ei i wareaa fei haraa Jesus. 28 Siꞌei, Saul na gutafipui aꞌa roꞌou ma tatalai yei Jerusalem ma uꞌulauguꞌuai aꞌa fei haraa mei Fasu. 29 Ina fiwarewarei ma fiharei aꞌa ei Jew Greece, maꞌuaa, ba roꞌaa foꞌafamaꞌeia. 30 Roꞌaa guainaa fei ei lofu, rona duginaa hia Caesarea ma alonaa hia Tarsus.
31 Ma ei losuia yei Judea, Galilee ma Samaria, ronawe gutafarawani. Fei Spiriti Apuna na faweꞌia ma faꞌunuwenuweaa naranaraa roꞌou ma na apoidiai puduu roꞌou ma rona gutamaꞌauaa mei Fasu.
Aeneas ma Dorcas
32 Fi talai aꞌa ei gufu sugutataꞌaia Peter, na dinaa Lydda ba i maꞌa ei apunaiaa mei Haidaa yei. 33 Yei ina bapaꞌaa hemea harana Aeneas, mei na maꞌe raraa ununa na haino pafoo tawa aleꞌei fainaroa igisimasi. 34 Peter na warenaa aꞌana, “Aeneas, Jesus Christ, i fapedugaa funuamu. Asiꞌatonaa fei hafenaa nopamu.” Ana ei, na asiꞌaa Aeneas. 35 Minaa ei Lydda ma Sharon na fanunupaꞌaa mei ma neneraa mei Fasu.
36 Yei Joppa na paꞌi hemea pifine otalai nenera, harana Tabitha (fei, ana fei hara Dorcas).b Ma hia nafane bigiꞌaa ei rawaniꞌa bigiꞌa ma hadumaa ei ramaꞌa lomi na paꞌi manumanu. 37 Aꞌa fei au fei, hia na funumaꞌe ma rona nunufia ma fahainopia aꞌa hepalo tarea humu. 38 Lydda na rafiꞌinaa Joppa; siꞌei, roꞌaa guainia ei otalai nenera ba Peter yei Lydda, rona aloaa helagui aꞌana ma laguna roroninia ba, “Nobatafamai eꞌeni!”
39 Na aunuhugiaa lagua Peter ma roꞌaa nodigilao, rona duginaa hia aꞌa fei tarea humu. Minaa ei pifine maꞌesuabea, rona u i aꞌana. Rona aiꞌai ma famaꞌaia ei hawaa ugu ma ei susu, ei tawiꞌaa Dorcas ei fidoꞌo guta aꞌa roꞌou.
40 Peter na faꞌasiꞌanaa minaa roꞌou i ano ma na faꞌunaa duꞌuna ma lafulafu. Omaꞌanaa aꞌa mei pifine maꞌea ma ware, “Tabitha, asiꞌaa!” Ina werainaa pudana ma i fanunupaꞌaa Peter, na asiꞌaguta. 41 Ina tauaa panina ma faꞌufalarainia. I dii, na lalaꞌamii ei apunaia mawe ei maꞌesuabea ma faꞌugia fininaa harenuana i pudaa roꞌou. 42 Minaa ei Joppa, rona guainaa fei ma watauda na narafaweꞌi aꞌa mei Fasu. 43 Peter na guta yei Joppa aleꞌei hefiga arewaa aꞌa hemea naꞌaida naraiaa ei hudii manulelele, harana Simon.