4 Cornelius na fanunufaꞌuꞌuia ma na maꞌau. Ina iꞌigai, “Tani mena Fasu?”

Na ware mei aloꞌalo, “Ei lafulafuamu ma ei fanamu aꞌa ei lomi manumanuu roꞌou na aununaa aꞌa mei Haidaa pafea ma ina narapaꞌio. 5 Ma eꞌeni, aloaa hefiꞌa dinaa Joppa ba ronei dugamai mei harana Simon, mei ana harana Peter. 6 Hia na guta humuu Simon, mei naꞌaida naraiaa hudii manulelele ma fei humuna, i papaa agi.”

7 I aunudii mei aloꞌalo, mei i wareware aꞌana, Cornelius na harofaa helagui tameloina ma hemeadiai tameloina, hemea ramaꞌaa foꞌaa, hemei na maꞌauaa mei Fasu. 8 Ina warefanaa roꞌou minaa ei manumanu na fanunuia ma na alonaa roꞌodu Joppa.

9 Hepalodiai arewaa nenee fei ma i nohaloainalao, roꞌei talaifarafiꞌinaa fei gufu, Peter na fanenaa pupuaa fei humu ba i lafulafu aꞌa mei Fasu. 10 Ina bao ma ba i hanana. Fi babagii ei duꞌua, hia na mefi. 11 Ma laloo fei mefina na fanunupaꞌaa fei pumanugawe na gigi ma hefaa manumanu aleꞌei baua lawalawa na tausisigaigio malagufu aꞌa obaoei supuna. 12 Ma lalona na paꞌi watauda ei maumau manulelele, ei rona paꞌi obao pine mawe ei mau manulelele ro ataꞌata i malagufu aleꞌei waꞌa mawe waꞌi ma ei manufidufidu haroo pafea. 13 Ma na ware hefaa lao aꞌana, “Asiꞌaa Peter. Foꞌafamaꞌeia ma hanana.”

14 Na ware Peter ba, “Paꞌaa lomi, mena Fasu! Atawepoꞌo hana ena abaa duꞌua, ena na loloa.”

15 Fei lao na ware faguapoaidiai aꞌana, “Nabaa hefaa manumanu ma mei Haidaa na waredii ba na rawani, oneiꞌaa ware ba na loloa.”

16 Feni lao guaiana na faꞌodupoai ma ana ei ua, fei lawalawa na hadiweꞌainaa pafea.

17 Fi naranara watauda Peter ba tamanu hanuu fei fanunuana, ei ramaꞌa aloaa Cornelius, ana rona bapaꞌaa fei humuu Simon ma u i papaa fei gigei. 18 Rona haroꞌiꞌigai ba, “Simon, mei ana harana Peter, hia, yena?”

19 Fi naranara Peter ba tamanu hanuu fei fanunua, fei Spiriti na warenaa aꞌana, “Simon, oꞌodui ramaꞌa, roi labaginio.^a 20 Hee, asiꞌaa ma upunaa pu. Apuna nara ba oꞌadii o lomi, uaa, yau meni a aloawii roꞌou.”

21 Peter na upulao ma warenaa aꞌa ei ramaꞌa, “Yau meni hamoꞌei labaginia. Tani hamuꞌou nomai?”

22 Ei ramaꞌa na ware, “Noramiaa haiꞌodu aꞌa Cornelius, centurion. Hia hemea na wanewane ma na maꞌauaa mei Haidaa. Ma minaa ei Jew, rona maꞌauaa mei ramaꞌa mei. Hemea aloꞌalo, mei na apunai, na warefania ba yoi onei dinaa humuna ba i guainaa tamanu o wareia.” 23 Siꞌei, Peter na ware ba ronei waduꞌainaa humu ma guta aꞌana.

Heai arewadiai, Peter na aunuhugiaa roꞌodu ma hefiꞌa ramaꞌaa Joppa, hefiꞌa narafaweꞌia, ana rona aunu. 24 Heai arewadiai, ina sufudai i Caesarea. Cornelius na apaꞌia ba i nomai ma ina harofamii ei gufuna mawe ei tafina. 25 I waduꞌainaa fei humu Peter, Cornelius na nomai i maꞌana ma oꞌoꞌui i pinee Peter. 26 Maꞌuaa, Peter na faꞌasiꞌania. Ina ware, “Ufalarai. Yau ana ramaꞌa ua.”

27 Laguna fiwarewarei ma Peter na waduꞌai ma fanunupaꞌaa hefaa baua gupuu ramaꞌa. 28 Ina warenaa aꞌa roꞌou, “Hamona apaꞌifarawaninia ba na apunainaa fei law haiꞌodu ba hemea Jew i guta o oafipui aꞌa hemea Gentile. Maꞌuaa mei Haidaa na famaꞌau ba neiꞌaa ware ba nemea na hafelo o na loloa. 29 Siꞌei, roꞌaa laꞌau, una noꞌuamai lomi na paꞌi naranarau. Na rawani ba a iꞌiginaa hamuꞌou ba tani hamuꞌou lalaꞌau?”

30 Cornelius na ware, “Obao arewaa ididii, yau laloo humuu ma lafulafu ana aleꞌeni feni au feni, aleꞌeni oduꞌai idoꞌo fafi. Ma aꞌa fei au fei, una maduofo hamatee hemea ramaꞌa, hemea na agime lawalawana na u i maꞌau 31 ma na ware ‘Cornelius, mei Haidaa na guainaa ei lafulafuamu ma fanunupaꞌaa ei fanamu aꞌa ei ramaꞌa lomi manumanuu roꞌou. 32 Alo aloꞌalomu dinaa Joppa ba ronei dugamii Simon, mei harana Peter. Hia na guta humuu hemeadiai Simon, mei naꞌaida naraiaa hudii manulele, mei fei humuna i papaa agi.’ 33 Siꞌei, una ponilaꞌamii yoi ma na rawani ba ona nomai. Ma eꞌeni, minaa haiꞌou yeni inamoaa mei Haidaa ba haiꞌouꞌaa guainaa minaa ei manumanu mei Fasu na warefanio ba onei warefanaa haiꞌodu.”

34 Ma siꞌei, Peter naꞌaa ware, “Yau eni, nawe fanunuꞌapaꞌia ba paꞌaa faꞌua ba mei Haidaa, lomi na paꞌi papaꞌaa ununa, 35 maꞌuaa na dugiꞌuaiaa ei ramaꞌa aꞌa minaa ei gufu, ei rona maꞌauia ma neneraa tamanu ei na rawani. 36 Hamona aida fei rawaniꞌa warea, fei mei Haidaa na alonaa aꞌa ei Israel, warefanaa roꞌou fei rawaniꞌa wareaa fei gutafarawania, uaa Jesus Christ, mei Fasuu minaa ei manumanu. 37 Hamona aida tamanu ei na asiꞌaa yei Judea, tamanu ei nadoꞌo asiꞌaa farawarawa yei Galilee, nenee fei pudugufaia, fei John na uꞌugia. 38 Hamona aida ba mei Haidaa na papaditainaa Jesus mei Nazareth aꞌa fei Spiriti Apuna ma wagii fei faufau na talaibigifarawani, farawaninaa ei rona oa wagii fei faufau mei haniꞌu, uaa mei Haidaa aꞌana.

39 “Ona maꞌadigaa minaa ei bigiꞌana yei gufuu ei Jew ma yei Jerusalem. Rona fatawaia aꞌa fei haihai ma na maꞌe, 40 maꞌuaa mei Haidaa na faꞌasiꞌania aꞌa fei maꞌea laloo fei faꞌoduaiaa arewaa ma ina faꞌarewaia aꞌa ei ramaꞌa. 41 Abaa minaa ei ramaꞌa rona fanunuia. Maꞌuaa, mei Haidaa nadoꞌo uniaa hini ei rowe fanunuia, aleꞌena haiꞌodu, haiꞌouna hanana ma hunufipui aꞌana nenee fei i asiꞌaa aꞌa ei maꞌea. 42 Ina ware ba haiꞌounei uꞌufanaa ei ramaꞌa ma warefaꞌuai ba unaiaa mei na rafeinia mei Haidaa ba nei dududuaa ei rona guta ma ei rona maꞌe. 43 Minaa ei mamamaꞌa, rona warefaꞌuai wagina ba hini i narafaweꞌi aꞌana, aꞌa fei harana, mei Fasu i futoaa ei hafeloꞌana.”

44 Fi wareware Peter, fei Spiriti Apuna fi pasigio pafoo minaa ei rona guainaa fei warea. 45 Ei rona narafaweꞌi ma moro hudii wawanei, rona nohugiamii Peter. Rona baꞌarofo ba fei fanaa mei Haidaa fei Spiriti Apuna na pasinaa pafoo ei Gentile anaa. 46 Uaa, ei ro nohugiamiaa Peter rona guainaa eꞌei ramaꞌa eꞌei, rona warenaa wareaa hepapa gufu ma uduginaa mei Haidaa.

Ma na ware Peter, 47 “Na paꞌi nemea i nara ba eni ramaꞌa eni, roneiꞌaa pudugufai aꞌa fei ranu? Na rawani ba roꞌaa pudugufai, hamatee rona todigaa fei Spiriti Apuna ana aleꞌei oꞌodu.” 48 Siꞌei, ina ware ba ronei pudugufai aꞌa fei haraa Jesus Christ. Ma rona warefanaa Peter ba nei gutafipui aꞌa roꞌodu hefiꞌadiai arewaa.