Paul na Dinaa Jerusalem
21
Haiꞌouꞌaa diꞌinidigaa roꞌou, haiꞌouna ala ma tamafawanewanenaloo Cos. I arewadiai, haiꞌouna aununaa Rhodes ma yei haiꞌouna aununaa Patara. 2 Haiꞌouna labagipaꞌi hepalo baua wa ba i dinaa Phoenicia. Haiꞌouna hugi ma tamaꞌaunu. 3 Haiꞌouꞌaa fanunupaꞌaa Cyprus, fatalediꞌininaloo fipepei amaꞌanaloo puna ma haiꞌouna tamanaloo Syria. Haiꞌouna peꞌi yei Tyre ba haiꞌouree faꞌasiꞌanaa ei manumanu pafona. 4 Haiꞌouꞌaa labagipaꞌaa ei otalai nenera yei, haiꞌouna gutafipui aꞌa roꞌou oloromeai arewaa. Fei Spiriti na bigi naranaraa roꞌou ma rona ware aꞌa Paul ba neiꞌaa dinaa Jerusalem. 5 Maꞌuaa i nopaꞌaloo fei au ba haiꞌou aunu, haiꞌouna aunu ba haiꞌou tamadilao. Minaa ei otalai nenera ma ei haroo roꞌou mawe ei naꞌuu roꞌodu, rona talaisusuninaa haiꞌou diꞌininaa fei baua gufu ma yei piye, haiꞌouna unaa duꞌuu haiꞌou ma lafulafu. 6 Haiꞌouꞌaa rapudigaa panii roꞌou, haiꞌouna hugi aꞌa fei baua wa ma roꞌou, rona wanonaa gufuu roꞌou.7 Haiꞌouna tamadiꞌininaa Tyre ma re peꞌi yei Ptolemais. Ma haiꞌouna bapaꞌaa ei lofu ma gutafipui aꞌa roꞌou heai arewaa. 8 I arewadiai, haiꞌouna dinaa Caesarea ma guta humuu Philip, mei inaꞌo wareaa fei rawaniꞌa wareaa mei Fasu ma hia hemea ei Oloromea. 9 Ina paꞌi gunaroa naꞌuna pifine rotaa haroa ma ronaꞌaida diwareꞌaugaa ei ba i nomai nene.
10 Haiꞌouꞌaa gutadii hefiꞌadiai arewaa, hemea mamamaꞌa, harana Agabus, noranamai Judea. 11 Iꞌa nomai aꞌa haiꞌou, na faugaa panina ma pinena aꞌa fei adii Paul ma ware, “Fei Spiriti Apuna na ware, ‘Ana aleꞌeni, ei Jew yei Jerusalem, rowe faugaa mei amaa feni adi ma rowe fifaninaa hia panii ei Gentile.’”
12 Haiꞌouꞌaa guainia, haiꞌou ma ei ramaꞌa yei, haiꞌouna wareꞌaiꞌai aꞌa Paul ba ineiꞌaa dinaa Jerusalem. 13 Ma Paul na ware, “Tani hamuꞌou aiꞌai ma fawaguꞌuaa haꞌeu? Lomi manumanu aꞌau nabaa roꞌaa faugau ma ana na rawani aꞌau nabaa a maꞌe yei Jerusalem uaa fei haraa mei Fasu Jesus.” 14 Lomi haiꞌouna filogipaꞌaa fei naranarana ma siꞌei haiꞌouna ware, “Inei nomai fei nunumiaa mei Fasu.”
15 Nenee fei, haiꞌouna paiaa ei manumanuu haiꞌou ma aununaa Jerusalem. 16 Hefiꞌa ei otalai nenera yei Caesarea, rona nohugiaa haiꞌou ma noduginaa haiꞌou humuu Mnason ma haiꞌouna guta aꞌana. Noramiana Cyprus ma hia hemea rawarawa otalai nenera.
Paul na Maua yei Jerusalem
17 Haiꞌouꞌaa maua yei Jerusalem, ei lofu, rona taufagutanaa haiꞌou. 18 Heaidiai arewaa Paul ma minaa haiꞌou, haiꞌouna aunu ba haiꞌouree maꞌa James. Ma minaa ei bauaniaa losuu, roꞌou, yei. 19 Paul na famafufuoinaa roꞌou ma warefaꞌaiaa roꞌou minaa ei manumanu na bigiꞌia aꞌa ei Gentile mei Haidaa wagii fei bigiꞌana.
20 Roꞌaa guainia, rona uduginaa mei Haidaa. Ma rona warenaa aꞌa Paul, “Mena lofuu haiꞌou, maꞌaia watauda pufabaꞌa Jew rona narafaweꞌi ma refu unuu minaa roꞌou aꞌa fei law. 21 Rona guainia ba yoi, ona feroinaa ei Jew, ei rona guta inamoaa ei Gentile ba ronei ofadugaa Moses ma roneiꞌaa moroꞌaa hudii wawanei ei naꞌuu roꞌodu, o neneraa ei maumau oꞌodu. 22 O bigiꞌaa tamanu? Te, ana rowepaꞌaa guainia ba yoi na nodigimai. 23 Siꞌei, bigiꞌaa tamanu haiꞌouna warefanio. Na paꞌi gunaroa wawane aꞌa haiꞌou, ei ronadii faꞌunai aꞌa mei Fasu ba ropaꞌaa bigiꞌaa hepalo manumanu. 24 Dugaa eni ramaꞌa eni ma aꞌa roꞌou, onei bigiꞌaa fei maumau roꞌou, fei ba roꞌaa fafafaꞌarai i pudaa mei Fasu ma onei fani ponoꞌaa roꞌou ba roꞌaa sisigaa hugoo tabaa roꞌou. Ma minaa ei ramaꞌa, rowe aida ba na tata fei uꞌuga, fei roꞌaa uꞌugio ma rowe aida ba yoi na neneraa fei law. 25 Ma haiꞌouna neꞌidii aꞌa ei Gentile narafaweꞌia ba roneiꞌaa hana duꞌua hefiꞌa rona faninaa aꞌa ei haidaa sifisifi, o hunu namo, o hanaiaa pigio ei manulelele, ei rona guafifigia, o fitatafipaꞌai.”
26 Heaidiai arewaa, Paul na dugaa ei ramaꞌa ma fafafaꞌarainaa anaia mawe roꞌou, aleꞌei mau losuu roꞌou. Ma ina waduꞌainaa fei humuu mei Haidaa ba i warefaꞌaiaa roꞌou tamanu arewaa iwe pedu ei arewaa fafaꞌaraia ma nahaiga roꞌaa fani fanaa hememea roꞌou.
Rona Panarofaa Paul
27 Ba anaa i pedu ei oloromeai arewaa, hefiꞌa ei Jew noramiaa roꞌou i laloo Asia, rona fanunupaꞌaa Paul yei aꞌa fei humuu mei Haidaa. Rona fawesuaa iaa minaa ei ramaꞌa ma rona panarofia. 28 Rona pararai, “Ena Israel hamonei hadumaa haiꞌodu! Meni ramaꞌa meni, hia mei na feroinaa minaa ei ramaꞌa i tadiweꞌaia ma faweleni ba ronei fadugeaa oꞌodu, fei law oꞌou. Ma ana, ina dugifawaduꞌainamii ei Greece malalaa fei humuu mei Haidaa ma rona faloloaa faweleni na apunai.” 29 (Ronadoꞌo fanunupaꞌaa Trophimus, mei Ephesus, aꞌa Paul i aꞌa fei baua gufu ma rona nara ba Paul na nodugia ma waduꞌainaa malalaa fei humuu Haidaa.)
30 Minaa ei ramaꞌaa fei gufu, rona sibaꞌasiꞌaa ma ponimai aꞌa minaa ei tala. Rona panarofaa Paul ma foraneneneinia auguu fei humuu mei Haidaa. Ma ana ei ua rona fareꞌaa ei baua gigei. 31 Ei roꞌei panarofia ma nananara ba roꞌaa famaꞌeia, mei bauaniaa ei foꞌaa Rome na guainia ba minaa ei ramaꞌaa Jerusalem, namina bibiyei tabaa roꞌou. 32 Ina dugibatafainaa hefiꞌa foꞌaa ma hefiꞌa bauaniaa roꞌou ma rona poninaa aꞌa ei ramaꞌa. Roꞌaa fanunupaꞌaa ei foꞌaa mawe mei bauaniaa roꞌou, ei ramaꞌa na fapedugaa fei hafugaa roꞌou Paul.
33 Mei bauaniaa foꞌaa na nomai, panarofia ma warenaa aꞌa roꞌou ba ronei faugia aꞌa guapalo alatai. Ma ina iꞌiginaa roꞌou ba hia hini ma na bigiꞌaa tamanu. 34 Hefiꞌa ei, rona haroharo ba aleꞌei ma hefiꞌa ba aleꞌei. Ma mei bauana, lomi na topaꞌaa fafasui fei, uaa ronamina waigi. Ma siꞌei, ina ware ba ronei duginaa hia humuu ei foꞌaa. 35 Paul, i nopaꞌaloo fei eꞌea, fei gupuu ramaꞌa ronamina sibafafelo ma ronawe poroꞌuaia ei foꞌaa. 36 Fei gupuu ramaꞌa, rona nenegia ma memewai, “Foꞌafamaꞌeia!”
Paul na Warenaa aꞌa Fei Gupuu Ramaꞌa
37 Ei foꞌaa ba ana roꞌaa waduꞌainoduginaa Paul aꞌa fei humu foꞌaa, ina iꞌiginaa mei bauaniaa foꞌaa, “Na rawani ba a iꞌiginio hepalo manumanu?”
Ina ware, “Onaꞌaida warea Greece? 38 Woro ba yoi mei Egypt, mei mina maꞌida na faꞌasiꞌanaa fei fisibaia ma augaa poree gunaroa pufabaꞌa ramaꞌa hafelo ma dinaa yei fawelei lomi haihai ma guana.”
39 Ina ware Paul, “Yau hemea Jew noramiau Tarsus yei Cilicia. Yau hemea ramaꞌaa hepalo baua rawaniꞌa gufu. Na rawani ba a warenaa aꞌa ei ramaꞌa?”
40 I ugadii mei bauaniaa foꞌaa, Paul na ufalarai pafoo fei eꞌea ma piꞌinaa panina aꞌa ei ramaꞌa. Roꞌaa babanini, ina warenaa warea Arameaa aꞌa roꞌou: