Aunuꞌailao Macedonia ma Greece
20
I pedu fei fisibaia, Paul na lalaꞌamii ei otalai nenera. I warehadudigaa roꞌou, na ware ba maꞌadinaa hamuꞌou ma na diꞌininaa roꞌou ba i dinaa Macedonia. 2 Ina tatalai yei ma wareaa watauda warea, ina nohadumaloo ei ramaꞌa ma nawe nopaꞌaloo Greece 3 ma guta yei oduai puda. Paul ba i taleꞌaununaa Syria, maꞌuaa siꞌei ba ei Jew rona fiwarewarei ba roꞌaa fafeloia, ina nara ba i hadiweꞌainaloo Macedonia. 4 Rona aunuhugiaa Sopater, hia naꞌuu Pyrrhus, baduu wawane, mei Berea ma Aristarchus ma Secundus noramiaa lagua Thessalonica ma Gaius, gufuna Derbe ma Timothy mawe Tychicus ma Trophimus noramiaa lagua fawelei Asia. 5 Ei ramaꞌa ei, ronadoꞌo nonoo ma omaꞌaa haiꞌodu yei Troas. 6 Maꞌuaa haiꞌouna aladiꞌininaa Philippi nenee fei Hananaa fei Faraa Pidaua loꞌe Fafuafua. Ma nenee haipanidiai arewaa, haiꞌouna bapaꞌaa roꞌodu yei Troas ma guta yei aleꞌei oloromeai arewaa.Yei Troas Eutychus na Asiꞌaa aꞌa fei Maꞌea
7 Aꞌa fei rawarawa arewaa fei hefapagipagia haiꞌouna nofipuimai ba haiꞌouꞌaa hana faraa pidaua. Paul na wareware aꞌa ei ramaꞌa ma ba i aunu narani, siꞌei ina wareware nopaꞌaloo poidifaꞌuꞌu. 8 Ina watauda ei weꞌai laloo fei tarea humu, fei haiꞌouꞌei gutafiwarewarei lalona. 9 Hemea baubara harana Eutychus na guta i laloo fei pusuꞌo aleꞌei gigei lalarena ma na mamaꞌigu pudana ba ipowe sinoro ei fi warewarelao Paul. I maꞌigusinorolao, ina pasinaloo pu aꞌa fei faꞌoduaiaa eꞌeaa fei tarea humu ma roꞌaa poniporoꞌia, na maꞌedii. 10 Paul na upulao ma fapasihaino pafoo mei baubara, hapiroroꞌia ma ware, “Hamoneiꞌaa baꞌarofo. Ina fawenai!” 11 Ma na tafanedinaa pafea ma na hana faraa pidaua. I wareware nopaꞌaloo asiꞌanaa fei halo, na aunu. 12 Ei ramaꞌa rona noduginaa mei baubara humu, ina fawewenai ma namina rawani naranaraa roꞌou.
Paul na Diꞌininaa ei Bauaniaa Losuu Ephesus
13 Haiꞌounadoꞌo nonolao aꞌa fei baua wa ma tamanaa Assos ba haiꞌou fahuginaa Paul. Ina bigiꞌia aleꞌei ba i talaiꞌuanaa pinena dinaa yei. 14 I bapaꞌaa haiꞌodu yei Assos, haiꞌouna fahuginia ma tamanaa Mitylene. 15 I arewadiai, haiꞌouna ala yei ma re peꞌi yei Kios. I arewadiai haiꞌouna dinaa Samos ma i arewadiai haiꞌouna nopeꞌilao yei Miletus. 16 Paul na nara ba i farapadiꞌininaa Ephesus ba lomi i guta yei Asia, uaa ba i aunubatafanaa Jerusalem nabaa i hawia ba i guta aꞌa fei rawarawa arewaa Pentecost.
17 Yei Miletus, Paul na lalaꞌamiaa ei bauaniaa fei losuu yei Ephesus. 18 Roꞌamii maua, ina warenaa aꞌa roꞌou, “Hamona aidadii fei mau gutanau ranimai aꞌa hamuꞌou, aꞌa fei rawarawa arewaa a guta fawelei Asia nopaꞌamii wagieni. 19 Faꞌua ba ei Jew, ronamina maniau ba roꞌaa fafeloau, maꞌuaa una fafafaunau pu ma pasi ranu pudau ma na bigiꞌuaiaa fei bigiꞌaa mei Fasu. 20 Hamona aida ba lomi una faꞌoaꞌoai uꞌugaa tamanu i hadumaa hamuꞌou, uaa una feroinaa hamuꞌodu i pudaa ramaꞌa ma i aꞌa hepapalo humu. 21 Una warefaweꞌi aꞌa ei Jew ma ei Greece ba ronei filoginaa naranaraa roꞌou ma foisinaa aꞌa mei Haidaa ma narafaweꞌi aꞌa mei Fasuu oꞌou, Jesus.
22 “Ma eꞌeni fei Spiriti Apuna na nunuminia ba unei dinaa Jerusalem, maꞌuaa lomi una aida ba roꞌaa bigiꞌaa tamanu aꞌau yei. 23 Fei apaꞌau, fei ba aꞌa minaa ei gufu, fei Spiriti Apuna na warefaꞌaiau ba fei boboꞌaia ma ei hafeloꞌa na oa maꞌau. 24 Maꞌuaa fei harenuau, lomi rarabana aꞌau nabaa una fapedupaꞌaa fei fiwaleia ma fei bigiꞌa, fei na fanau mei Fasu Jesus, fei ba unei warefaꞌuainaa fei rawaniꞌa wareaa mei Haidaa, fei na faꞌarewainaa fei rawaniꞌana.
25 “Ma eꞌeni una apaꞌia ba hamuꞌou ena hamona guainau eni a uꞌugaa fei haparaia, lomi hemea dupuaa hamuꞌou i fanunudinau. 26 Siꞌei, wagieni a warefaweꞌi aꞌa hamuꞌodu ba lomi a tonaa dududuau nabaa nemea i paꞌai. 27 Uaa, lomi una tamafoi ei a warefaweꞌiaa minaa ei nunumiaa mei Haidaa. 28 Omaꞌaiaa hamuꞌodu ma minaa ei sipsipi, ei na rafeinaa hamuꞌou fei Spiriti Apuna ba omaꞌamaꞌaaa roꞌou. Hamonei aleꞌei omaꞌaa sipsipii ei losuu mei Haidaa,b ei ina pononaa fei namona. 29 Unaꞌaida ba nenee afadugau ena ponotoo podu rowe nomai i tapuu hamuꞌou ma lomi rowe augaa neꞌa sipsipi. 30 Aꞌa hamuꞌou anaa, hefiꞌa rowe asiꞌaa ma fapidawainaa fei faꞌuaia ba roꞌaa fahumanaa hefiꞌa otalai nenera aꞌa roꞌou. 31 Siꞌei, hamonei ofafaufau! Hamonei nonominia ba laloo oduai igisimasi minaa ei poi ma arewaa, lomi fafau warewagiꞌinaa hememea hamuꞌou ma na pasi ranuu pudau.
32 “Eꞌeni una aunaa hamuꞌodu panii mei Haidaa ma fei wareaa fei rawaniꞌana, fei i fagipepaꞌaa hamuꞌou ma fanaa ei manumanu ana aleꞌei i fani aꞌa ei rona papaditai. 33 Lomi una nanamainaa ei silver, o gold, o lawalawaa hemea. 34 Ana hamona aida ba gueni paniu na bigifanaa tamanu yau ma ei tafiu na nunuminia. 35 Aꞌa minaa ei bigiꞌau una famaꞌaa hamuꞌou ba fei mau bigifaweꞌia aleꞌei onei bigifaweꞌi ba oꞌaa hadumaa ei lomi rona faufau ma nonominaa ei wareaa mei Fasu Jesus: ‘Fei ba o fani i muainaa fei ba o to.’”