Rona ware, “Lomi. Ana lomi haiꞌouna guai ba na paꞌi hepalo Spiriti Apuna.”

3 Siꞌei, Paul na ware, “Hama tamanu pudugufaia hamona tonia?”

Rona ware, “Fei pudugufaiaa John.”

4 Paul na ware, “Fei paꞌafii fena pudugufaiaa John, sifei ba ei ramaꞌa nei filoginaa naranaraa roꞌodu. John na warefanaa ei ramaꞌa ba ronei narafaweꞌi aꞌa mei iwe nomai nenena, Jesus.” 5 Roꞌaa guainaa fei, ronawe pudugufai aꞌa^b fei haraa mei Fasu Jesus. 6 Paul, i augaa guei panina pafoo roꞌou, fei Spiriti Apuna na pasi pafoo roꞌou ma rona warenaa wareagufuu hefiꞌa gufu ma dii wareaa tamanu i nomai nene. 7 Puduu ei ramaꞌa, aleꞌena hefua ma helagui.

8 Paul na waduꞌainaa fei synagogue ma warefaweꞌi yei laloo oduai puda. Ma fi warewareaa fei haparaiaa mei Haidaa aꞌa roꞌou. 9 Maꞌuaa namina waiwai tabaa hefiꞌa roꞌodu; lomi rona uga ba faꞌua fei ma rona warefafeloaa fei Tala i pudaa ramaꞌa. Siꞌei, Paul na diꞌininaa roꞌodu. Ina nodugaa ei otalai nenera ma minaa ei arewaa na fiwarewarei aꞌa ei ramaꞌa yei laloo fei baua humuu feferoi Tyrannus. 10 Aleꞌei fei mau bigiꞌana laloo heguai igisimasi. Ma siꞌei, minaa ei Jew ma Greece, ei roꞌaa guta yei fawelei Asia, rona guainaa fei wareaa mei Fasu.

11 Mei Haidaa na bigiꞌaa hefiꞌa baua foigia aꞌa Paul 12 aleꞌei ba nabaa hepalo huguu nuge o lawalawa na idoaa Paul ma rona tonalao aꞌa ei rona funu, ei funuaa roꞌou na pedu ma ei hafeloꞌa spiriti na diꞌininaa roꞌou.

13 Hefiꞌa Jew na tatalai ma fawalaꞌanaa ei hafeloꞌa spiriti aꞌa ei na waduꞌaa roꞌou pigea. Rona lalaꞌaa fei haraa mei Fasu Jesus aꞌa ei na waduꞌaa roꞌou pigea. Rona ware aleꞌei, “Aꞌa fei haraa Jesus, mei na uꞌugia Paul, a warefanio asiꞌamai.” 14 Hemea ramaꞌa, harana Sceva, hia hemea famamoaa humuu mei Haidaniaa ei Jew. Ma na paꞌi oloromea naꞌuna, baduu wawane. Ma ei naꞌuna ei, ronaꞌaida bigiꞌia aleꞌei. 15 Heai arewaa hepalo hafeloꞌa spiriti na warenaa aꞌa roꞌodu, “Jesus, una apaꞌia. Ma una aida tamanu na bigiꞌia Paul, maꞌuaa hamuꞌou hini?” 16 Ma mei na waduꞌia hefaa hafeloꞌa spiriti, ina rofonaa aꞌa roꞌou ma fugoinaa minaa roꞌou. Namina hafufanimaꞌaa roꞌou ma siꞌei rona poniꞌalaꞌalaꞌasiꞌaa aꞌa fei humu fininaa raraa unuu roꞌou.

17 Ro guainia ei Jew ma ei Greece yei Ephesus, ronamina maꞌaufafelo ma fei haraa mei Fasu Jesus na dinaa pafea fininaa honua. 18 Watauda ei narafaweꞌia, ronawe nofalelefomai ba ro wareaa tamanu ei bigifafeloaa roꞌodu. 19 Hefiꞌa, ronaꞌaida bigiꞌaa ei siafa, rona tonamai ei buꞌuu siafaa roꞌodu ma faguꞌaa roꞌou i pudaa ramaꞌa. Ma puduu ponoꞌaa ei buꞌuu siafa aleꞌei haipani paꞌania pufabaꞌa drachma.^c 20 Siꞌei ba rona fanunuaa ei manumanu ei, fei wareaa mei Fasu namina talainaa watauda gufu ma gipe fininaa fei faufaua.

21 Nenee minaa eꞌei, Paul na nara ba i dinaa Jerusalem ma na aunulao yei Macedonia ma Achaia. Ina ware, “Nenee fei gutanau yei, unei aunuꞌailao Rome anaa.” 22 Ina aloaa helaguei hadumana, Timothy ma Erastus, dinaa Macedonia ma hia, nadoꞌo gutadilao yei laloo fei baua gufu Asia.

23 Aꞌa fei au fei, na paꞌi hefaa baua fisibaia aꞌa fei Tala. 24 Hemea naꞌaida bigiꞌaa silver, harana Demetrius. Hia naꞌaida bigiꞌaa ei paꞌaa pusuꞌo humuu losuu Artemis. Ma aꞌa fei bigiꞌaa mei ramaꞌa mei, hefiꞌadiai anoꞌano, ronaꞌaida to watauda mugoo poꞌi. 25 Ma ina harofamii roꞌou mawe hefiꞌa rona paꞌi apaꞌaa roꞌou aꞌa fei bigiꞌa fei ma na warenaa aꞌa roꞌou, “Meꞌo, hamonaꞌaidadii ba onaꞌaida to watauda mugoo poꞌi aꞌa feni bigiꞌa feni. 26 Ma eꞌeni hamona fanunuia ma guainia ba hemeni Paul na uꞌufadiaginaa watauda ramaꞌa yeni Ephesus ma minaa ei ramaꞌa yeni faweleni Asia. Ina ware ba ei haidaniaa roꞌou, ei bigiꞌaa ramaꞌa, abaa paꞌaa haidaa. 27 Hepalo hafeloꞌa wagina sifei ba i fafeloaa fei haraa fei bigiꞌaa oꞌou, fei ba o to mugoo poꞌi wagina ma hepalodiai, fei humuu losuu Artemis, hemei pifine haidaa, ana ropowe nara ba na hafelo ma mei pifine haidaa, mei ronaꞌaida losuinia faweleni Asia ma feni ano, ana iwe pasi fei baua harana, fei ba hia paꞌaa rawaniꞌa haidaa.”

28 Roꞌaa guainia, ronamina siba ma haroharo, “Paꞌaa bauana Artemis, mei haidaniaa ei Ephesus!” 29 Ataa madii ma minaa ei ramaꞌaa fei gufu rona siba. Rona panarofaa Gaius ma Aristarchus, laguei laguꞌaa noneneramii Paul yei Macedonia ma ponifipui aleꞌei hemea ramaꞌa ma duginaa lagua aꞌa fei ronaꞌaida figupui wagina. 30 Paul ba i ufalarai i maꞌaa ei ramaꞌa maꞌuaa ei otalai nenera, rona lawagia. 31 Ma hefiꞌa bauaniaa fei gufu, hefiꞌa tafii Paul, ana rona iꞌigifaweꞌi aꞌana ba ineiꞌaa dinaa aꞌa fei ronaꞌaida figupui.

32 Fei gupuu ramaꞌa na hamamagua: Hefiꞌa rona mewainaa hepalo manumanu ma hefiꞌa rona mewainaa hepalodiai manumanu. Ma watauda ana loꞌe rona aida ba tani roꞌaa nolao yei. 33 Ei Jew na susuninaa Alexander i maꞌa ma hefiꞌa na harofani wareana. Ina piꞌinaa panina ba ronei babanini ba i warefaꞌaiaa ei ramaꞌa tamanu na faꞌua. 34 Maꞌuaa roꞌaa fanunuꞌapaꞌia ba hia Jew, rona iwamemewaifipui, laloo aleꞌei guai hour, “Paꞌaa bauana Artemis, mei haidaniaa ei Ephesus!”

35 Mei paniaa panii mei bauaniaa gufu na fababaninaa ei ramaꞌa ma ware, “Hamuꞌou ena Ephesus, ei naraa hamuꞌou ba minaa ei aꞌa feni ano lomi rona apaꞌia ba feni gufu Ephesus na omaꞌaa feni humuu losuu Artemis ma fei bigiꞌaa ramaꞌa fei haduona, fei pasianagio pafea? 36 Siꞌei ba lomi hemea i nara ba na tata fei, hee hamonei babanini. Apuna bigireꞌereꞌeinaa hepalo manumanu. 37 Hamona duginamii yeni eni ramaꞌa eni, maꞌuaa lomi rona topaꞌainaa manumanuu humuu ei haidaa ma ana lomi rona warefafeloaa mei pifine haidaniaa oꞌou. 38 Siꞌei, nabaa Demetrius ma ei anoꞌano ro bigi aꞌana na paꞌi bidiꞌaa unuu roꞌou aꞌa hini roꞌou, te na paꞌi humuu dududua ma fadududua ma ronei dududuaa roꞌou. 39 Nabaa hamona paꞌi hepalodiai manumanu ba hamona nara ba ina tata, hamonei fawanewaneia aꞌa fei dududua. 40 Eꞌeni, na fafanunu ba nabaa roꞌaa dududuaa oꞌou ei famamoaa fei baua gufu aꞌa feni fisibaia ma tamanu ona bigiꞌia wagieni, paꞌaa loꞌe ugaa pinee oꞌou.” 41 I waredigaa fei, ina famatalaiaa ei ramaꞌa.