Yei Corinth
18
Nenee fei, Paul na diꞌininaa Athens dinaa Corinth. 2 Yei, ina bapaꞌaa hemea Jew harana Aquila, gufuna Pontus. Mei we noꞌuanamai Italy lagua mei harona Priscilla, uaa Claudius na ware ba minaa ei Jew, ronei diꞌininaa Rome. Paul na aunu ba iree maꞌa lagua. 3 Siꞌei ba hia naꞌaida bigiꞌaa ei pale poroporo ana aleꞌei lagua, ina guta ma bigifipui aꞌa lagua. 4 Minaa ei Sabbath na waduꞌainaa fei synagogue ma fiwarewarei aꞌa ei Jew ma ei Greece ba ronei nara ba faꞌua wareana.5 Silas ma Timothy, laguꞌaa nodigimai yei Macedonia, Paul na uꞌu ua, namina uꞌufaꞌarewainia aꞌa ei Jew ba Jesus, hia Christ.a 6 Maꞌuaa ei Jew, roꞌaa warefaweꞌi ma harea ba abaa aleꞌei, ina foifoiaa piye susuna, uaa lomi na nunuminaa fei ma na warenaa aꞌa roꞌou, “Fei dududuaa mei Fasu na ude i aꞌa hamuꞌodu! Una bigidigaa fei bigiꞌau aꞌa hamuꞌodu. Eꞌeni apowe dinaa aꞌa ei Gentile.”
7 Ma Paul na asiꞌadiꞌininaa fei synagogue ma dinaa fei humu papana, fei humuu Titius Justus, hemea na losuinaa mei Haidaa. 8 Crispus, mei bauaniaa fei synagogue ma minaa ei maroana laloo humuna, rona narafaweꞌi aꞌa mei Fasu. Ma watauda ei Corinth roꞌaa guainia, rona narafaweꞌi ma pudugufai.
9 Heai poi, mei Fasu na warenaa aꞌa Paul wagii fei fanunuana aleꞌei mefi, “Apuna maꞌau; onei uꞌuꞌuawau, apuna babanini. 10 Uaa yau i aꞌamu ma lomi nemea ba i farararaoio uaa una paꞌi watauda ramaꞌa yeni, i aꞌa feni gufu feni.” 11 Siꞌei, Paul na guta yei heai ma hesuwi igisimasi ma na feroinaa roꞌodu fei wareaa mei Haidaa.
12 Wagii fei au ba Gallio hia gavanaa Achaia, ei Jew na nofipuimai ma fadugeaa Paul ma noduginaa hia dududua. 13 Rona ware, “Meni ramaꞌa meni, fi feroinaa ei ramaꞌa ba ronei losuinaa mei Haidaa, maꞌuaa fei mau losuia fei, ina barafeaa fei law.”
14 Ma ba i ware Paul, Gallio na warefanaa ei Jew, “Nabaa hamuꞌou Jew hamoꞌaa ware ba ina barafeaa hefei paꞌaa law, hefei pusuꞌo, o baua law, te, a guainaa hamuꞌoudu. 15 Maꞌuaa, siꞌei ba hamona fawoꞌaa ei warea, hara ma law hamuꞌou Jew—hamonei fawanewaneaa ana hamuꞌou. Lomi a dududuaa eni mau manumanu aleꞌeni.” 16 Siꞌei, ina teteaa roꞌodu aꞌa fei humuu dududua. 17 Ma ronaꞌaa guafaa Sosthenes, mei bauaniaa synagogue ma rona hafugia i poaa fei humuu dududua. Maꞌuaa Gallio, lomi ba na falanaa huona fei.
Priscilla, Aquila ma Apollos
18 Paul na guta famadii maꞌida yei Corinth. Ma nawe diꞌininaa ei lofu ma tamanaa Syria. Priscilla ma Aquila, laguna aunuhugia. Ma ei atawe tama, na fapiꞌaa hugo tabana yei Cenchrea, uaa fei faꞌunaiana aꞌa mei Fasu. 19 Rona peꞌi yei Ephesus ma Paul na diꞌininaa Priscilla ma Aquila yei. Ma hia na waduꞌainaa fei synagogue ma fiwarewarei aꞌa ei Jew. 20 Rona iꞌigainia ba neidoꞌo gutadiai aꞌa roꞌou ma ina ware ba lomi. 21 Maꞌuaa, ei ifi nolao nadii faꞌunai, “Awe hadiweꞌimai nabaa i nunuminia mei Haidaa.” Idii, nawe tamadiꞌininaa Ephesus. 22 Iree peꞌi yei Caesarea, na wanolao ma na bapaꞌaa ei losuia ma nenee fei na upuꞌaunulao Antioch.
23 I gutafamadidii yei Antioch, Paul na asiꞌaa yei ma na tatalai aꞌa hepapalo gufu yei malalaa Galatia ma Phrygia ma ina faweꞌiaa naranaraa minaa ei otalai nenera.
24 I bigiꞌaa ei manumanu ei, hemea Jew harana Apollos, gufuna Alexandria na aununaa Ephesus. Ina todigaa watauda feroia ma siꞌei napaꞌaa bauana apaꞌana aꞌa fei Buꞌu Apuna. 25 Ina to feroiana wagii fei talaa mei Fasu ma waretofininaa refuaa ununab ma uꞌufarawaninaa fei uꞌugaa Jesus. Maꞌuaa apaꞌiꞌuana fei pudugufaiaa John. 26 Idii, inawe warefaweꞌi i laloo fei synagogue. Laguꞌaa guainia Priscilla ma Aquila, laguna duginaa hia humuu lagua ma faꞌarewaꞌapoinaa fei talaa mei Haidaa aꞌana.
27 Ba i aununaa Achaia Apollos, ei lofu na warefarefuia ma neꞌinaa aꞌa ei otalai nenera yei ba ronei taufagutania. I nodigimai, namina haweninaa ei rona narafaweꞌi wagii fei rawaniꞌaa mei Haidaa. 28 Uaa ina warehotaꞌaa ei Jew pudaa ei ramaꞌa ma faꞌarewaia aꞌa fei Buꞌu Apuna ba paꞌaa faꞌua ba Jesus, hia mei Christ.