3 Heaidiai arewaa, haiꞌouna peꞌi yei Sidon. Ma Julius ba i farawaninaa Paul, na ugainia ba neidoꞌo aunu ma tatalai aꞌa ei tafina ba roꞌaa hadumia aꞌa tamanu nunumiana. 4 Ma yei, haiꞌouna aladiai ma talenaa Cyprus fipepei lomi lalarena uaa fei lalarena na agisuafaa haiꞌou. 5 Haiꞌouꞌaa fatalelao i lama papaa fei rau Cilicia ma Pamphylia, haiꞌouna peꞌi Myra yei Lycia. 6 Yei, mei centurion na labagipaꞌaa hepalo wa Alexandria ba i dinaa Italy ma na fahuginaa haiꞌou pafona. 7 Haiꞌouna talefagigilao watauda arewaa ma na waiwai ba haiꞌou peꞌi yei Cnidus. Namina rata fei lalarena ma siꞌei lomi haiꞌouna talefawanewane. Haiꞌouna talenaa fipepei lomi lalarena yei Crete, papaa Salmone. 8 Haiꞌounamina oteifagigilao nopaꞌamii hefawala harana Fair Havens na rafiꞌinaa fei gufu Lasea.

9 Hefiꞌa au namina aunudigilao ma napaꞌaa fei au hafeloaa fei lama uaa rona paꞌidigaa fei Au Fabaoa.^a Siꞌei, na warefaꞌaiaa roꞌou Paul, 10 “Meꞌo, na fanunupaꞌia ba feni taleaa oꞌou, i paꞌaa oꞌou hafeloꞌa ma i paꞌai feni baua wa ma ei manumanu pafona mawe oꞌodu.” 11 Maꞌuaa, mei centurion, lomi na guainaa wareaa Paul. Ina neneraa wareaa mei rapiꞌa ma mei amaa fei wa. 12 Fei peꞌiaa wa yei lomi na rawani ba haiꞌouꞌaa peꞌi famadii aleꞌei figa puda. Ma watauda haiꞌouna ware ba haiꞌounei fataleꞌualao ba haiꞌouꞌaa dinaa Phoenix ma peꞌi farereaa fei lalarena yei. Fei, hepalo peꞌiaa wa yei Crete, omaꞌanaloo hafaꞌialama ma punenegufu. Ma ba haiꞌouꞌaa peꞌi famadii, aleꞌei figa puda yei.

13 I nimanimaimai maꞌida fei lalarena, rona nara ba sifei fei talaa roꞌou. Siꞌei rona fafaneaa fei hipo ma fataleꞌaunulao Crete. 14 Ataa madii, namina asiꞌaa fei baua lalarena. Haraa feni lalarena raiharaꞌuu noranamai i aꞌa fei gufu. 15 Fei lalarena na fitaninaa maꞌaa fei wa ma lomi na talepaꞌi ma siꞌei, haiꞌounawe talenenegiꞌuaia. 16 Haiꞌouna lafelao rafiꞌinaa hepalo pusuꞌo gufu harana Cauda ma na waiwai ba haiꞌouꞌaa faufarawaninaa hepalo pusuꞌo wa, fei rona taleforaia aꞌa fei wa bauana. 17 Roꞌaa poroꞌaupaꞌidigaa fei pusuꞌo wa, rona tonaa hefiꞌa wao ma faufaweloinaa puguu fei baua wa ba roꞌaa faufaweꞌia. Siꞌei ba rona maꞌau ba fei lalarena i nafaꞌisiminaa roꞌou i piyee Syrtis, rona fapasiaa fei hipo ba nei falaporaa fei wa. 18 Fei agi namina fanimaꞌaiaa haiꞌou ma siꞌei, iree arewa, rona siminaa agi ei manumanu pafoo fei wa. 19 Aꞌa fei faꞌoduaiaa arewaa, ronawe tonaa ei manumanu unuu fei wa ma porosiminia. 20 Aleꞌei figa arewaa i didii lomi haiꞌouna fanunupaꞌaa fei halo o ei piꞌu ma fei agi namina weta ua. Nawe asisi naranaraa haiꞌou ba lomi haiꞌouꞌaa tela.

21 Figa arewaa na didii ma lomi rona hanana ei ramaꞌa. Idii, Paul nawe u i pudaa roꞌou ma ware, “Maꞌaia meꞌo? Nabaa hamona guainaa wareau ba oneiꞌaa diꞌininaa Crete, lomi hamoꞌaa paꞌaa aree hamuꞌou aleꞌeni ma ei manumanuu hamuꞌou, lomi ba i paꞌai aleꞌeni. 22 Maꞌuaa a warefanaa hamuꞌou ba apuna faꞌasisiaa naranaraa hamuꞌou, uaa lomi nemea hamuꞌou ba i paꞌai; uniaa feni wa. 23 Poi minoa hemea aloꞌalo na u papau. Mei aloꞌalo mei, hemea aloꞌaloo mei Haidaa, mei una bigiꞌaa bigiꞌana. 24 Mei aloꞌalo na ware, ‘Apuna maꞌau Paul. Yoi, o u i maꞌaa Caesar ma mei Haidaa, i faniꞌuaio fei harenuaa ei roꞌaa tamafipui aꞌamu.’ 25 Siꞌei, hamonei faꞌoꞌonainaa unuu hamuꞌou meꞌo, uaa yau na paꞌi narafaweꞌiau aꞌa mei Haidaa ba tamanu ei wareana aꞌau i paꞌaa bigiꞌia. 26 Maꞌuaa oꞌou, oꞌaa tafe aꞌa hepalo gufu.”

27 Aꞌa fei fahefua ma gunaroaa poi, fei lalarena ana fi susuniꞌuamiaa haiꞌou aunulao yei Agii Adriatic.^b Ma aleꞌei poidifaꞌuꞌu, ei bigibigiꞌa pafoo wa, rona nanamuinia ba roi fararafiꞌinaa fei gufu. 28 Rona faꞌaunuaa fei wao ma fanunupaꞌia ba walalona aleꞌei odufua paꞌania ma oloromeai metre.^c Madilao maꞌida, rona faꞌaunudinia ma fanunupaꞌia ba walalona aleꞌei enu paꞌania ma oloromeai metre.^d 29 Rona maꞌau ba fei mamaua i nafaꞌisiminaa haiꞌou pafoo naꞌa. Siꞌei, rona fapasidinaa obao hipo i mugii fei baua wa ma gutaroni ba nei arewa batafa. 30 Ba roꞌaa diꞌininaa fei baua wa, hefiꞌa bigibigiꞌa na alafapasiaa fei pusuꞌo wa. Ma ba roꞌaa sifiꞌaa ei ramaꞌa, rona fapasiaa hefiꞌadiai hipo i maꞌaa fei baua wa. 31 Ma Paul na warenaa aꞌa mei centurion mawe ei foꞌaa ba, “Nabaa lomi roꞌaa gutapanarofaa feni baua wa, lomi hamoꞌaa tela.” 32 Siꞌei, ei foꞌaa na moroꞌaa ei wao, ei na panarofaa fei wa pusuꞌo ma fapasialao.

33 Anaa i arewa, na ware aꞌa roꞌodu Paul ba ronei hanana. Ina ware, “Laloo ei hefua ma gunaroa arewaa i didii hamona gutanara watauda ma lomi hamona hanana. Lomi hamona hanaiaa hepalo manumanu. 34 Eꞌeni a ware ba hamonei hanana ba lomi hamoꞌaa maꞌe. Lomi ba i adudu hepalo hugo tabaa hemea hamuꞌou.” 35 I waredii aleꞌei, na tonaa hefiꞌa faraa pidaua ma i pudaa minaa roꞌou na ware ‘ta’ aꞌa mei Haidaa. Ma na itafia ma hanaia. 36 Namina faweꞌidinaa naranaraa minaa roꞌou ma ana rona hanaiaa hefiꞌa duꞌua. 37 Puduu haiꞌou pafoo wa aleꞌei enu puꞌu ma oloromfua ma oloroa. 38 Roꞌaa hananafamagudii, ba roꞌaa fapapaiaa fei wa, rona siminaa agi ei duꞌua.

39 I noꞌarewalao, lomi rona fanunuꞌapaꞌaa fei gufu ba tamanu, maꞌuaa rona fanunupaꞌaa hefaa malouna ma na paꞌi piye ma rona nara aleꞌei ba roꞌaa manimaꞌa ba roꞌaa fatafe yei. 40 Rona moroꞌaa ei hipo, famomogunaa agi ma alaraa ei wao, ei na faugaa ei poree rapirapi. Ma rona sugainaa pafea fei lawalawa aꞌa fei tala lalarena ma fatalenaa piye. 41 Maꞌuaa fei wa na tafe aꞌa fei piye fawelei na parepare. Fei maꞌaa wa na tafe. Loꞌediai maꞌatalana ma fei mugii wa na aninimatala aꞌa fei mamaua.

42 Ei foꞌaa, rona fiwarei ba roꞌaa foꞌafamaꞌeaa ei boboꞌaia uaa ba roneiꞌaa paiꞌaunu ma ponipaꞌai. 43 Maꞌuaa mei centurion lomi na nunumiai ba Paul i maꞌe siꞌei ina lawaraa roꞌou aꞌa fei naranaraa roꞌou. Ina ware aꞌa ei rona aida paia ba roneidoꞌo rofo ma painaa piye. 44 Ma ei dufudufu ronei falafe pafoo ei memee haihai fei wa. Rona bigiꞌia aleꞌei ma siꞌei, minaa roꞌou, rona paꞌaa piye.