Yei Piyee Malta
28
Haiꞌouꞌaree paꞌaa piye, haiꞌouna noꞌapaꞌalao ba fei gufu, harana Malta. 2 Ei ramaꞌaa fei gufu fei, ronamina farawaninaa haiꞌou. Rona paꞌaiaa fei hafi ma taufaꞌugaa minaa haiꞌou uaa na roparopa fei maunu ma haiꞌouna waiwa. 3 Paul na poroꞌamai hefiꞌa taloa, puguminalao aꞌa fei hafi ma hepalo waꞌa hafelo na teteiamai fei babaia, na taduaa panina ma lomi na rawa. 4 Roꞌaa fanunupaꞌaa fei waꞌa ba na tausisigai panina rona fiwarewarei ba, “Meni ramaꞌa meni, woro hia ramaꞌaa foꞌafamaꞌea. Faꞌua ba ina tela aꞌa fei agi maꞌuaa fei dududuana ipowe famaꞌeia.” 5 Maꞌuaa Paul na hubisiminaa fei waꞌa aꞌa fei hafi ma lomi na to hafeloꞌana wagina. 6 Ei ramaꞌa, rona nara ba i popola, o ba i pasimaꞌe, maꞌuaa roꞌaa gutaꞌomaꞌomaꞌa ma lomi rona fanunupaꞌaa bibiyeiana, ronawe nara ba woro hia hemea haidaa.7 Na paꞌi hefaa baua humu na rafiꞌi, humuu Publius, mei bauaniaa fei gufu fei. Ina taufagutanaa haiꞌou i humuna ma laloo oduai arewaa namina farawaninaa haiꞌodu. 8 Mei amana na funuhaino pafoo tawa. Na babai ununa ma na pepeaa raraa. Paul na waduꞌai ba i maꞌa hia. I lafulafudii, na augaa panina pafona ma fapedugaa funuana. 9 Ro fanunuia aleꞌei, minaa ei funua aꞌa fei gufu fei, rona nomai ma ina fapedugaa funuaa roꞌou. 10 Rona farawaninaa haiꞌou aꞌa watauda manumanu. Ma ei ba ana haiꞌou ala, rona fanaa haiꞌou ei manumanu haiꞌouna nunuminia.
Peꞌi Yei Rome
11 Nenee oduai puda, haiꞌouna hugi aꞌa hepalo wa, hepalo na peꞌi opaꞌai yei aꞌa fei au hafelo. Fei wa fei, wa Alexandria ma i maꞌaa fei wa na paꞌi baua hanunuu laguei wata haidaa sifisifi Castor ma Pollux. 12 Haiꞌouna peꞌi Syracuse ma guta yei oduai arewaa. 13 Ma yei haiꞌouna ala ma peꞌi yei Rhegium. Heaidiai arewaa, na asiꞌaa fei lalarena, noramiana aleꞌena haraꞌuu ma heaidiai arewaa, haiꞌounaree peꞌi yei Puteoli. 14 Ma yei haiꞌouna bapaꞌaa hefiꞌa lofu ma rona dugaa haiꞌou ba haiꞌounei gutafipui aꞌa roꞌou aleꞌei heai hefapagipagia. Ma nenee fei ba haiꞌouna dinaa Rome, 15 ei lofu yei fawelei, rona guainia ba haiꞌoufi talailao, rona nofarauamai ba roꞌaa omaꞌaa haiꞌou yei Forum Appius ma yei Odumanu Tavern. I fanunupaꞌaa ei ramaꞌa ei, Paul na ware ‘ta’ aꞌa mei Haidaa ma na refurefu ununa. 16 Haiꞌouꞌaa nopaꞌaloo Rome, rona uga ba Paul nei gutaꞌuꞌugai unaiana, maꞌuaa nei paꞌi hemea foꞌaa omaꞌana.
Paul na Uꞌu Yei Rome ei Roꞌaa Omaꞌaia
17 Nenee oduai arewaa ina lalaꞌaa ei bauaniaa ei Jew. Roꞌaa nofipuidigimai, na ware Paul aꞌa roꞌou, “Ena lofuu, yau lomi na bigiꞌaa hepalo tata aꞌa ei gufuu oꞌou, o aꞌa ei maumau ei upuu oꞌou, maꞌuaa, rona panarofau yei Jerusalem ma fifaninau aꞌa ei Rome. 18 Rona dududuau ma ba roꞌaa alarau uaa lomi rona labagipaꞌi tatau ba ponoꞌana maꞌea. 19 Maꞌuaa ei Jew, rona siba wagina, siꞌei, una ainaa aꞌa Caesar. Maꞌuaa lomi ba a dududuaa ei gufuu oꞌodu. 20 Sifei fei fafasuina a lalaꞌaa hamuꞌou ba oꞌaa fiwarewarei. Fei fafasui fei ba na boboꞌai, sifei ba na paꞌi oꞌonai unuu oꞌou Israel.”
21 Rona ware, “Lomi haiꞌouna to neꞌia fi warewareio noramiana Judea ma lomi hemea lofu na nomai yei na uꞌu o wareaa hepalo hafeloꞌamu aꞌa haiꞌodu. 22 Maꞌuaa ba haiꞌouꞌaa guai tamanu naranaramu, uaa haiꞌouna aida ba watauda ramaꞌa, rona warefafeloaa feni maroaa losuu.”
23 Rona fiwarewarei ba roꞌaa maꞌa Paul aꞌa fei arewaa fei ma nenee fei, wataudadiai rona nomai aꞌa fei humu ina guta wagina. Mafufuo ma amaꞌanaloo poi ina uꞌufanaa roꞌou fei haparaiaa mei Haidaa ba i faweꞌiaa naranaraa roꞌou aꞌa Jesus wagii tamanu na wareia fei Law Moses ma ei Mamamaꞌa. 24 Hefiꞌa roꞌou, rona nara ba faꞌua ma hefiꞌa, lomi. 25 Rona fiharenii ma aunu nenee i wareaa feni Paul ba, “Fei Spiriti Apuna warefaꞌuai aꞌa ei upuu hamuꞌou ei i umuinia mei mamamaꞌa Isaiah:
26 “‘Aununaa aꞌa eni ramaꞌa eni ma ware,
“Hamomina guguai, maꞌuaa lomi hamoꞌaa apaꞌaa hanuna;
hamomina fafanunu, maꞌuaa lomi hamoꞌaa fanunupaꞌi.”
27 Uaa, fei naranaraa eni ramaꞌa eni, namina waiwai.
Lomi rona guaipaꞌinaa adiaa roꞌou
ma rona maꞌigunaa pudaa roꞌou.
Nabaa abaa aleꞌei, roꞌaa fanunupaꞌinaa pudaa roꞌou
ma roꞌaa guaipaꞌinaa adiaa roꞌou,
narapaꞌi ma foisimai
ma yau a fapedugaa funuaa roꞌou.’
28 “Siꞌei, nunumiau ba hamonei aida ba fei telaꞌana, mei Haidaa na alodigia aꞌa ei Gentile ma ropowe guguai!” 29\f + \fr 28:29 \ft Hefiꞌa neꞌia ba ropowe guguai!” 29 Iꞌa waredigaa fei, rona aunu ei Jew ma fiharenii.\f*