Ju atsucunti ju vasalh soknicꞌa chani junita
3
Pus ju chavai ji quiꞌalakꞌavin alhikꞌachꞌantꞌit ju Jesucristo.
Ju quitꞌin jantu jeks icꞌui mas aktam aclaꞌatsꞌoknunichokoyau ju tuchi xaclajunau makꞌanchich.
Pus ni aclajunchokoyau ca laich aktꞌaiꞌucꞌanatꞌit ni jantu aꞌokxchꞌokꞌocꞌanaꞌitꞌit.
2 Alhistꞌaccꞌantꞌit ni jantu cataꞌokxchokꞌoyan ju anuch lapanacni ju na lhquiliqui ju isꞌatsucuntiꞌan chai ju tanavi ju macxcai chai ju tanajun ni takꞌalhtaxtuputuncan ma aktsꞌiya tasqꞌuini ni acchꞌucꞌucalh tachi ju talai ju quintꞌaꞌisraelitanin ni laich cataputasuyaꞌ ni ixlapanacni Dios tajunita.
3 Para ju quijnanꞌan pumalacasuyau ni ixlapanacni Dios juntau ni lakꞌayayau ju yuchi laquiꞌalhunutꞌan ju salaka junita.
Lakꞌayayau ju Dios tachi ju quintajunan ju Spiritu Santu.
Chai lhikꞌachanau ju Cristo Jesús ni yuchach ju quintamakꞌalhtaxtuyan.
Jantu lhilaksiyau ju tuꞌuꞌ ju lai canaviu ju va laquiꞌakstuꞌan ju lai caputakꞌalhtaxtu.
4 Ni alin tam xamatiꞌ ju laich calhilaksichokocalh isꞌakstu chai canaulh ni laich caꞌixnavilh tuꞌuꞌ ju ixlhiyuchi ju Dios caꞌixmakꞌalhtaxtulh pus ca quitꞌinch ju laich acnaulh ju chunch ni na xacmuctaxtui tachi ju najun lacalhamapꞌaksin.
5 Pus xacpacxanta lakatsajin avilhchan acsni icchꞌucꞌucalh.
Chai ju quitꞌin stavasalanti israelita icjunita.
Makꞌaniya ixpapanti Benjamín icjunita.
Ju quimpai quinati ixtachivinin ju lhihebreo chai vachuꞌ chunch ju icchivinin.
Chai xaclhilaksi ju ixlhamapꞌaksinꞌan ju fariseonin.
Chai ju yuꞌunch lana ixtamuctaxtukꞌojui ju ixlhamapꞌaksin ju Moisés.
6 Chai ni tapꞌastu xaclacasqꞌuin ni ixtalhonicalh ju ixlhamapꞌaksin ju Moisés yuchi iclhiꞌamamakꞌalhkꞌajni ju ixtalhilacaꞌanta ju Cristo ni xacnajun ni jantu chun ixtalai ju yuꞌunch.
Pus jantu xamatiꞌ ju lai xaquijuni ni jantu icmuctaxtukꞌota tachi chun ju najun lacalhamapꞌaksin.
7 Para tachi chun ju ani taxtokni ju na kꞌoxich xaclhiulai pus ju chavai jantu tuꞌuꞌ iclhiulai va ixlacata ni icmispai ju Cristo.
8 Pus vasalh.
Tachi chun ju ani taxtokni jantu tuꞌuꞌ iclhiulai va ixlacaꞌatalh ni icmispai ju chavai ju tuꞌuꞌ ju palai kꞌox.
Yuchi ju quiꞌucxtin Cristo Jesús.
Pus va ixlacata yuchi icmaconkꞌota tachi chun ju anuꞌ taxtokni ju kꞌoxich xaclhiulai.
Chai tachi ju va amacxtalh icꞌalhiulai ni laich acmispayaꞌ alai ju Cristo.
9 Icmaconkꞌota ni laich va lakatam actꞌava ju yuchi.
Chai ju chunch vachuꞌ alinch ju soknicꞌa quiꞌatsucunti ju quixtaknita ju Dios acsni iclhilacaꞌalh ju Cristo.
Ju chavai jantu icnajun ni lai soknicꞌa acva va ixlacata ni icnavi tachi ju najun lacalhamapꞌaksin.
10 Slivasalh icmispaputun ju Cristo.
Pus ju Cristo lokꞌonchokolh acsni ixmacnucanta chai iclacasqꞌuin ni catasu laquiꞌatsucunti ixtachaput ju yuchi chai ni laich acchꞌixlh ju makꞌalhkꞌajnat tachi ju lalh ju yuchi.
Chai iclacasqꞌuin ni caꞌuctaxtulh laquiꞌatsucunti ni tachi ju va icnita ixlacata ju alactuꞌunti tachi ju quilhcata ju Dios.
11 Ju quitꞌin icnavikꞌoputun tachi ju najun ju Dios ni laich aquimalokꞌonichokolh ju yuchi laquiꞌaninti.
Tasqꞌuini ni calhistacchokocauch ni laich cachaꞌanau ju lactꞌiyan
12 Jantu icnajun ni icchaꞌanta ju chunch ju laquiꞌatsucunti nin yuchi ni lai acnaulh ni na icsoknicꞌa.
Para ictailhiꞌanch ni tsꞌa ma laich acmuctaxtu laquiꞌatsucunti tachi ju quilhcanita ju Cristo Jesús.
13 Pus ji quiꞌalakꞌavin ju quitꞌin jantu icnajun ni icchaꞌanta ju chunch ju laquiꞌatsucunti.
Para chani ju iclai.
Ju tapasata ju laquiꞌatsucunti iccapkꞌotach.
Chai va yuchi ju icnavi cuenta ta yu laich palai soknicꞌa actsucuyaꞌ.
14 Ixlhichux quiꞌalhunut icnavi cuenta ta yu laich acpuchaꞌanaꞌ ju lhikꞌox tachi ju lhcata ju Dios.
Chai ju chunch acsni acchaꞌananta ju lactꞌiyan junta aquintatꞌasaniyan ju Dios pus laich acꞌamaklhtayananaꞌ ju quintalhaja.
Yuchi ni actꞌatolaꞌ ju Cristo ni iclhilaksita ju yuchi.
15 Pus tachi chun ju quijnanꞌan ju tsucuyau tachi ju kꞌachani ju Cristo tasqꞌuini ni chunch ju calau tachi ju iclajuntau.
Para ni jantu chun ju machꞌakxayatꞌit pus ju Dios catamamachakxaniyan ni vasalh chunch junita tachi ju iclajuntau.
16 Va yuchi ni tasqꞌuini ni camuctaxtuyau chux tachi ju machakxayau ju chavai.
17 Quiꞌalakꞌavin chunchach ju atsꞌucꞌutꞌit tachi ju quilalaktsꞌinau ju quiꞌatsucunti.
Chai anavitꞌit cuenta ju aliꞌin ju chunch tatꞌajun vachuꞌ.
18 Na paklhu xaclajunau ni na lhu taꞌalin ju lapanacni ju ixtꞌalaxcai Cristo tajunita.
Lana jantu tuꞌuꞌ talhiulai mas quinichilh ju Cristo ju lacacurus.
Chai aktam aclajunchokopalau ju chunch chai na ickꞌalhun acsni iclaꞌatsꞌoknuniyau ju chunch.
19 Pus ju yuꞌunch catatsꞌankꞌakꞌalhiyaꞌ.
Pus va ixkꞌachatꞌan isꞌakstuꞌan tanaviputun.
Talhitakꞌayai ju yuchi ju alai tasqꞌuini ni caꞌixtalhimaxanalh.
Va yuchi ju xataxtokni ju ani lacamunutpaꞌ ju tapastactꞌajun.
20 Para ju quijnanꞌan amachakꞌan lactꞌiyan juntau.
Chai pacxanauch ju quiꞌamakꞌalhtaxtunuꞌan ju cataxtuyanta.
Yuchi ju quiꞌucxtinꞌan Jesucristo.
21 Chai ju yuchi aquintamapaxaniyan ju quilacatunaꞌan ju na tsamai.
Chai aquintaxtakniyan quilacatunaꞌan tachi ixlacatuna ju yuchi.
Chai ju yuchi na cꞌus junita.
Pus ju Jesús alin ju ixtachaput chai yuchi lai aquintalhinaviyan chunch.
Chai ni alin ixtachaput pus lai vachuꞌ tꞌalalhajai tachi chun ju taxtokni.