Ju Cristo mas xakꞌai ixjunita talacatꞌicstꞌi ju quilacataꞌan
2
Pus ju uxijnan aktsꞌiya tamatankꞌoxaxkꞌayatan ju Cristo.
Chai na kꞌachꞌanatꞌit ni tamapainiyan ju yuchi.
Chai ju Spiritu Santu tꞌajun lamiꞌalhunutꞌan.
Chai ju Dios tanavinitan kꞌai lamapainin.
2 Pus ni chunch ju tanavinitan ju Dios pus aquilamakꞌankꞌachayau ju quitꞌin.
Va lakatam aꞌuntꞌit chai alamapꞌainitꞌit.
Chach va lakatam valh ju miꞌatalacpastꞌacꞌatꞌan chai chach va lakatamch valh ju tuchꞌi navipꞌutꞌunatꞌit.
Chai ni anaviyaꞌitꞌit ju chunch pus slivasalh na ackꞌachanach.
3 Jantu anavitꞌit ju va minkꞌachatꞌan miꞌakstuꞌan nin yuchi ni laich anavitꞌit tuꞌuꞌ va ixlacaꞌatalh ni xakꞌai atꞌalacꞌasuyaꞌitꞌit.
Alai va atꞌalacꞌatꞌicstꞌitꞌit.
Chai palai kꞌox alhiulatꞌit ju mintꞌalapanac.
Palai jantu miꞌakstuꞌan.
4 Jantu va yuchi ju anavitꞌit cuenta ta yu laich kꞌox atsꞌucꞌuyaꞌitꞌit miꞌakstuꞌan.
Para vachuꞌ anavitꞌit cuenta ta yu laich apꞌuꞌaktꞌaiꞌutꞌit ju aliꞌin.
5 Chach chunch va ju miꞌatalacpastꞌacꞌatꞌan tachi ju ixjunita ixꞌatalacpastꞌacꞌat ju Cristo Jesús.
6 Ju yuchi mas ixtꞌachunchach junita ju Dios para maconchalhcaꞌ ju ixpuxakꞌai ju lactꞌiyan.
7 Chai lakꞌaꞌilh ni jantu catalacasu pantsꞌiquis tachi ju Dios.
Talacasuchilh ju ani tachi ju tam xalapanac acsni tavanan lapanac quitsucuchilh ju ani lacamunutpaꞌ.
8 Chai acsni lapanac tsucuchilh ju ani pus talacatꞌicstꞌichokolh aliꞌ.
Quiclacaꞌinilh tachi ju ixnajunta ju Dios chai lakꞌaꞌilh ni tamakni mas na lhimaxan tamapasalh ni tachi ju tam kꞌai alactuꞌunuꞌ taꞌulhtulh ni tamaknilh ju lacacurus.
9 Chai ni chunchach ju xanavi ju Jesús pus ju Dios slivasalh lakꞌaya chai lhimapakaꞌulh xakꞌai.
Matiꞌ apumatam ju ixtꞌachunch junita.
10 Ju chunch tachi chun ju tavilanancha lactꞌiyan chai ju quijnanꞌan ju tꞌonau ju ani lacatꞌun chai ju taꞌanta lacajipi cataꞌaktsokotaniyau ju Jesús acsni calakꞌayayauch.
11 Chai tachi chun ju lapanacni catanonaꞌ ni yuchach ju ucxtin ju Jesucristo.
Chai ju chunch calakꞌayacanaꞌ ju quimpaiꞌan Dios.
Ju talhilacaꞌanta ju Cristo chunch tajunita tachi ju tuꞌuꞌ maclhcu
12 Pus ji quiꞌalakꞌavin ju uxijnan aktsꞌiya xaquilaquiclacaꞌiyauch acsni xaclatꞌavilhchaucaꞌ.
Chai ju chavai ni jantu iclatꞌavilhchau pus palai tasqꞌuini ni aquilaquiclacaꞌiu.
Chai ju chavai ni alin ju sastꞌi miꞌatsucuntiꞌan pus chunchach ju atsꞌucꞌutꞌit tachi ju kꞌachani ju Dios.
Chai atꞌalhonitꞌit.
13 Pus yuchi ju Dios ju chꞌalhcatnan lamiꞌalhunutꞌan ni anavinipꞌutꞌunaꞌitꞌit ju ixkꞌachat chai ju yuchi cataꞌaktaijuyan ni laich anaviyaꞌitꞌit.
14 Tachi chun ju najun ju Dios ni anavitꞌit pus anavitꞌit.
Para jantu va lacatalhkꞌamti.
Chai jantu va lakatꞌui anavitꞌit ju miꞌatalacpastꞌacꞌatꞌan.
15 Ju chunch jantu lai xamatiꞌ catitamucꞌanin ju mintalakꞌalhinꞌan.
Chai salaka atsꞌucꞌutꞌit ni isꞌaskꞌatꞌan Dios untꞌatꞌit.
Chunch ju atsꞌucꞌutꞌit mas anch ju tꞌonatꞌit junta taꞌalin ju lapanacni ju na taꞌalactuꞌunun.
Pus ju laꞌixꞌucxlacapuꞌan ju yuꞌunch ju uxijnan chunch ju untꞌatꞌit tachi ju tuꞌuꞌ maclhcu ju mapulhcui junta na putsꞌista.
16 Chai lamiꞌatsucuntiꞌan ju uxijnan amasuniyaꞌitꞌit ju aliꞌin ni lai xtꞌakꞌa ju Dios ju atsucunti jonkꞌalhita.
Chai ni chunch ju atsꞌucꞌuyaꞌitꞌit pus aclhikꞌachanach acsni tavanan caminchokoyaꞌ ju Cristo.
Accꞌatsayaꞌ ni jantu tsꞌankꞌata ju lhichꞌalhcat ju xacnavi lamilhiꞌuxijnan para aktsꞌiya lhitapalata ni xaclajunau ixchivinti Dios.
17 Pus ju uxijnan ni chunch ju atsꞌucꞌuyaꞌitꞌit tachi ju iclajuntau pus ju miꞌatsucuntiꞌan chunch cajunaꞌ tachi ju tuꞌuꞌ lhakꞌailaktsꞌin laꞌixmacni Dios.
Chai ju quitꞌin mas tasqꞌuini ni acmaknicanaꞌ para aclhikꞌachanach ni chunch cajunlh ju miꞌatsucuntiꞌan.
Chai ju uxijnan vachuꞌ akꞌachꞌanaꞌitꞌit astan.
18 Pus kꞌaixtamch quilatꞌakꞌachanau ju quitꞌin mas chunch ju catapasayaꞌ ju laquiꞌatsucunti chai ni chunch cajunaꞌ ju miꞌatsucuntiꞌan.
Timoteo chai Epafrodito ixꞌalactꞌavilhcha ju Pablo
19 Pus chani ju icpastꞌacꞌa ni va calacasqꞌuinaꞌ ju quiꞌucxtin Jesús.
Pus icnajun ni acmalakachayanta ju Timoteo.
Ju chunch acsni caquitaspꞌitꞌanta pus aquijunaꞌ ta yu tꞌonatꞌit chai aclhikꞌachanach.
Jantu xamatiꞌ ju ani tavilanalh ju chunch alacpastacnan tachi ju quitꞌin.
Va yuchi ju Timoteo.
Ju yuchi vachuꞌ lacasqꞌuin ni kꞌox atsꞌucꞌuyaꞌitꞌit laꞌixmacni Dios.
20 Para matiꞌ xamatiꞌ akꞌantam ju chunch alacpastacnan.
21 Ju aliꞌin ju ani tavilanalh va tanaviputun ixkꞌachatꞌan isꞌakstuꞌan.
Jantu tanaviputun ixlhichꞌalhcat ju Cristo Jesús.
22 Para ju uxijnan mispꞌayatꞌit ju Timoteo chai cꞌatsꞌayatꞌit ni na kꞌox lapanac ju yuchi.
Pus ju yuchi quintꞌachꞌalhcatnalh ismasuca ju chivinti ixlacata ju Jesús.
Ju yuchi quiꞌaktaiju tachi ju aktaijui ixpai ju tam tsꞌalh.
23 Pus icnajun ni lana acmalakachayanta ju yuchi acsni accꞌatsayach ta yu aquintalakꞌoxiniyaꞌ ju quilhamakꞌan.
24 Chunch aclayaꞌ mas iclhilaksi ju quiꞌucxtinꞌan Jesús ni vachuꞌ lai vatsꞌalhti acꞌancha quitꞌin quiꞌakstu.
25 Pus iccꞌatsai ni aktsꞌiya tasqꞌuini ni lana acmalakachachokoyanta ju Epafrodito.
Ju yuchi quilakꞌau junita chai quintꞌachꞌalhcatnaꞌ ixnajunca ixchivinti Dios.
Pus ju uxijnan malakꞌachꞌanichitꞌit ju ani ni laich aquixtakniyaꞌ ju tumin ju xamakꞌaixtꞌokꞌatꞌit ju ixlacata quimaktasqꞌuinit chai ni lai aquiꞌaktaijuyaꞌ.
26 Pus ju yuchi na talaktsꞌinchokoputunan minchuxꞌan ju uxijnan.
Vachuꞌ na ixꞌamakꞌaninin acsni cꞌatsalh ni cꞌatsꞌachitꞌit ni na ixtakꞌankꞌai.
27 Pus vasalh na ixtakꞌankꞌai.
Na ixniputun.
Para ju Dios aktaijulh lacaꞌamapaininti.
Chai jantu va yuchi ju aktaiju para vachuꞌ ju quitꞌin ni jantu caꞌalilh palai lhu ju quiꞌamakꞌanit.
28 Pus ni na ixlhamakꞌanininatꞌit pus yuchi palai vatsꞌalhti iclhimalakachaputunacha ju Epafrodito.
Ju chunch acsni alaktsꞌinchꞌokꞌoyaꞌitꞌit akꞌachꞌanaꞌitꞌit.
Chai ju quitꞌin palai jantu na lhu acꞌamakꞌanininaꞌ ni accꞌatsayaꞌ ni lhikꞌach amaklhtꞌayananchꞌokꞌoyaꞌitꞌit.
29 Pus acsni cachaꞌananta lhikꞌach amaklhtꞌaꞌitꞌit chai axtꞌaknitꞌit lakꞌailaktsꞌiuch ju Dios.
Alakꞌayatꞌit ju tam lapanac ju chunch junita.
30 Chunch alhilaktsꞌintꞌit ni laꞌixlhichꞌalhcat ju Cristo va lacatsꞌunin lana na ixniputun.
Jantu tuꞌuꞌ xalhiulai ju isꞌatsucunti ni laich xaquiꞌaktaijui.
Ju yuchi navilh ju jantu lai xanaviyatꞌit ni jantu ani ju vilatꞌit.