3 Acsni ictapaininiyau ju Dios ixpai ju Jesucristo ju milacataꞌan pus va tachi icxtakniyau lakꞌailaktsꞌiuch ni xalhilacꞌapꞌinatꞌit ju yuchi.

4 Va icpunonau chunch ni ickꞌasmatꞌau ni lhilacꞌapꞌintꞌatꞌit ju Cristo Jesús chai ni mapꞌainiyatꞌit tachi chun ju aliꞌin ju vachuꞌ talhilacaꞌanta ju Dios.

5 Chunch ju layatꞌit ni vasalh lacꞌaꞌiyatꞌit ni aktsꞌiya aquintaxtakniyan ju Dios tuchi quintakꞌalhtasunitan ni aquintaxtaknitachan ju lactꞌiyan.

Pus makꞌanchich kꞌasmatꞌatꞌit ju chivinti ju stavasalanti junta najun ta yu lai putakꞌalhtaxtucan.

Chai acsnich vachuꞌ kꞌasmatꞌatꞌit ixlacata ju anuꞌ ju quintakꞌalhtasunitan ju Dios.

6 Chai ju anuꞌ chivinti ju uncꞌantꞌatꞌit ju uxijnan vachuꞌ kꞌasmatkꞌocanta ixlhilacaputsꞌun ju lacamunutpaꞌ.

Chai yuchach ju chivinti ju amapaxani isꞌatsucuntiꞌan tachi chun ju talacaꞌita.

Chai palai lhu ju tatꞌajun lacaꞌinin ju anuꞌ chivinti.

Chai vana va chun tamapaxanitan ju Dios ju miꞌatsucuntiꞌan tus acsni kꞌasmatꞌatꞌit ni tanavinitan lamapainin ju Dios.

Chai ju uxijnan lacꞌaꞌitꞌatꞌit ni vasalh lamapainin ju xatanaviniyan.

7 Chunchach ju tamasunin ju Epafras.

Ju yuchi vachuꞌ navini ixlhichꞌalhcat ju Dios tachi ju quijnan.

Chai na icmapainiyau.

Chai ju yuchi na muctaxtui laꞌixlhichꞌalhcat ju Cristo lamilhiꞌuxijnan mas jantu lai xacꞌanachau laꞌaktaijunin ju quijnan.

8 Yuchi ju quintamavasalanin ni quilamapainiyau.

Chai ni tꞌajun ju Spiritu Santu lamiꞌalhunutꞌan vachuꞌ pus yuchi lai quilalhimapainiyau ju quijnan.

9 Pus ni icjuncantauch ni lhilacꞌapꞌinatꞌit ju Jesucristo pus yuchi jantu tavanan iclhiꞌastacnanau ixtapaininica ju Dios ju milacataꞌan.

Icsqꞌuiniyauch ni vasalh catamamispaniyan tuchi lacasqꞌuin ju Dios ni anaviyaꞌitꞌit.

Icsqꞌuiniyauch ni yuchi ju Spiritu Santu ju cataxtakniyan ju kꞌox mintacꞌatsanꞌan ni laich amachꞌakxayaꞌitꞌit ixkꞌachat ju Dios.

10 Ju chunch laich atsꞌucꞌuyaꞌitꞌit tachi ju lhijunch ni lhilacꞌapꞌintꞌatꞌit ju quiꞌucxtinꞌan Jesús.

Chai mas va tuchꞌi naviyatꞌit laich anaviyaꞌitꞌit tachi ju slivasalh kꞌox calhiulayaꞌ ju yuchi.

Chai ju chunch vachuꞌ lai anaviyaꞌitꞌit tijpachux ju kꞌox chai lai palai amispꞌayaꞌitꞌit ju Dios.

11 Vachuꞌ icsqꞌuinauch ni slivasalh ixlhichux ju miꞌalhunutꞌan ju alhilacꞌapꞌitꞌit ju Dios.

Chai lai chunch alatꞌit ni na kꞌai ju ixtachaput ju Dios.

Chai ni na pꞌas lhilaksiyatꞌit ju Dios pus lai achꞌixkꞌoyaꞌitꞌit mas va tuchi camilh lamiꞌatsucuntiꞌan chai jantu jeks aꞌuyaꞌitꞌit.

Alai va tachi akꞌachꞌanaꞌitꞌit.

12 Vachuꞌ lai aꞌunaꞌitꞌit lakꞌailaktsꞌiuch ju quimpaiꞌan Dios ni yuchi ju quintalakꞌoxinin ju quiꞌatsucuntiꞌan ni laich vachuꞌ camakꞌamaklhtayananau ju tuchi najunta ju yuchi ni aquintaxtakniyan tachi chun ju quijnanꞌan ju lhilacaꞌantauch ju Jesús.

Chai ju tuchi aquintaxtakniyan anchach ju makꞌatacha junta vilhcha ju Dios junta vasalh atuncunuꞌ junita.

13 Pus yuchi ju Dios ju quintamakꞌalhtaxtun acsni ixtꞌonaucaꞌ laꞌixtachaput ju lhinajun lacaꞌatatsꞌisni.

Chai ju chavai yuchi ju Jesucristo ju lhinajun laquiꞌatsucuntiꞌan.

Yuchi ju istsꞌalh Dios junita.

Chai ju Dios na mapaini ju yuchi.

14 Chai ni lhilacaꞌanauch ju yuchi pus quintamalakxtutanch laꞌixꞌacꞌalhni.

Chai quintamacꞌacxanitan ju quiꞌalactuꞌuntiꞌan.

15 Mas jantu lai laktsꞌincan ju Dios para ju istsꞌalh ju Jesucristo juncan amalacasunilh ju lapanacni ta yu junita ju ixpai ni vana va chunch junita ju yuchi.

Pus ju Jesús yuchi ju pꞌulh ixtꞌajun.

Astan anavicalh tachi chun ju taxtokni.

16 Yuchi ju anavikꞌo tachi chun ju taxtokni ju alin ju lactꞌiyan chai ju alin ju ani lacatꞌun.

Chux ju lai laktsꞌincan chai ju jantu lai laktsꞌincan.

Yuchi ju anavikꞌo ju anquilhnin ju tatolai laꞌixpuꞌucxtinꞌan chai ju aliꞌin anquilhnin ju tamaklhinajun chai ju xalactꞌicstꞌin ucxtinin sia yuꞌunch chai tachi chun ju anquilhnin ju alin ixtachaputꞌan.

Yuchi ju Jesús ju anavikꞌo chai va ixlacata isꞌakstu ju lhinavilh chunch.

17 Ju Cristo aktsꞌiya ixtꞌajunch mas tucaꞌ ixꞌalin ju ani taxtokni.

Chai yuchi ju alhistackꞌojui tachi chun ju taxtokni ju chavai ni catatailhiꞌalh tachi ju ixꞌalhcanicantach.

18 Chai tachi ju quiꞌaktsulhꞌan ni yuchi ju lhinonkꞌojui chux quilacatunaꞌan pus vana va chun ju Cristo.

Laich acnaulh ni ixlacatuna Cristo juntau tachi chun ju quijnanꞌan ju lhilacaꞌantauch ju yuchi.

Chai yuchi ju quiꞌaktsulhꞌan junita ni yuchi ju quintalhijunkꞌoyan laquiꞌatsucuntiꞌan.

Yuchach ju quintaxtakniyan ju sastꞌi quiꞌatsucuntiꞌan.

Chai ni yuchi ju pꞌulhnan lokꞌonchokolh laꞌixꞌaninti chai jantu tavanan xanichokoi tachi ju talalh ju aliꞌin ju ixꞌamalokꞌonicanta pus yuchi xakꞌai lhijunita tachi chun ju taxtokni.

19 Pus ju quimpaiꞌan Dios lacasqꞌuilh ni lana catalacasu ju Jesús laꞌisꞌatsucunti ju ani lacamunutpaꞌ tachi ju junita isꞌakstu ju xapai.

20 Vachuꞌ lacasqꞌuilh ju Dios ni laꞌixlacata ju Cristo laich caꞌapunavichokoyaꞌ ixꞌamigojni tachi chun ju lapanacni.

Chai lhikꞌoxamixlh acsni taxtunilh ixꞌacꞌalhni ju Cristo lacacurus.

Pus laꞌixlacata ju Cristo laich canavikꞌoyaꞌ ixꞌamigojni Dios tachi chun ju tatꞌajun ju ani lacamunutpaꞌ.

Chai vachuꞌ laꞌixlacata ju Cristo tachi chun ju taxtokni ju ani lacamunutpaꞌ laich cajunchokoyaꞌ tachi ju ilhcata ju Dios ju pꞌulhnan.

21 Pus ju makꞌanchich vachuꞌ ju uxijnan jantu ismispꞌapꞌutꞌunatꞌit ju Dios.

Ju lamiꞌalhunutꞌan va ixtꞌalaxcꞌayatꞌit ju Dios ni ixnaviyatꞌit ju macxcai taxtokni.

22 Para ju chavai ju Jesús tanavitan ixꞌamigojni ju Dios laꞌixꞌaninti acsni xtucmucꞌacalh ixlacatuna ju lacacurus.

Ju chunch ni laich catalhiꞌanan laꞌixꞌucxlacapuꞌ chai ju anch alhimispꞌacꞌanaꞌitꞌit ni vasalh isꞌaskꞌatꞌan Dios untꞌatꞌit chai salaka untꞌatꞌit chai matich ju mintalakꞌalhinꞌan.

23 Chunch ju catanaviyan ni va tachi alhilacꞌapꞌinaꞌitꞌit ju Jesús ixlhichux ju miꞌalhunutꞌan chai jantu va tam tam anonaꞌitꞌit chai jantu va amacꞌonaꞌitꞌit ixchivinti Dios ju ixꞌuncꞌantꞌatꞌit.

Yuchi ju anuꞌ chivinti ju najun ni lai amakꞌalhtꞌaxtꞌucꞌanaꞌitꞌit.

Chai ju uxijnan kꞌasmatꞌatꞌit ju anuꞌ chivinti chai vachuꞌ alacjuncanta tachi chun ju lapanacni ju tatꞌajun ju ani lacamunutpaꞌ.

Pus ju quitꞌin icPablo.

Chai vachuꞌ icxtaknicanta ju quilhichꞌalhcat ni acꞌamalaninilh ju lapanacni ju ani ixchivinti Dios.

24 Na ickꞌachan mas ictꞌajun makꞌalhkꞌajnaꞌ ju milacataꞌan ni laich alhilacꞌapꞌitꞌit ju Cristo.

Ictꞌajun makꞌalhkꞌajnaꞌ tachi ju Cristo ni makꞌalhkꞌajnanta ju quilacataꞌan quinchuxꞌan.

Iclhimakꞌalhkꞌajnan vachuꞌ ixlacaꞌatalh ju ixlacatuna ju Cristo.

Pus ju ixlacatuna ju Cristo nomputun ni yuꞌunch ju talhilacaꞌanta ju yuchi.

25 Dios ju quisacxtuta ni amamakaꞌunuꞌ acva ixlacataꞌan ju yuꞌunch ju tatꞌajun lhilacaꞌanin ju Jesús.

Iclhixtaknicanta ju ani lhichꞌalhcat ni aclajunkꞌoyauch ju uxijnan tachi chun ju ixchivinti Dios.

26 Aclajunau ju uxijnan ju anuꞌ chivinti ju jantu tavanan ixꞌamavasalanicanta ju lapanacni ju makꞌanch ixtatꞌajun.

Para ju chavai amavasalanicanta tachi chun ju talhilacaꞌantach ju Cristo.

27 Pus ju uxijnan ju jantu israelitanin untꞌatꞌit ju Dios talacasqꞌuinin ni amachꞌakxayaꞌitꞌit ni slivasalh na kꞌox ju anuꞌ chivinti ju jantu ixmavasalacanta.

Chai ju yuchi slivasalh na kꞌox junita ju milacataꞌan ju uxijnan.

Pus ju anuꞌ chivinti najun ni tꞌajun ju Cristo lamiꞌalhunutꞌan vachuꞌ.

Chai ixlhiyuchi cꞌatsꞌayatꞌit istavasalanti ni achꞌipꞌinaꞌitꞌit ju lactꞌiyan junta slivasalh kꞌox junita.

28 Ju quijnan iclajunau ixlacata ju Cristo.

Chai icꞌalhimapꞌaksiyau tachi chun ju lapanacni chai icꞌamalaniyau tachi chun ju lapanacni lacakꞌox tacꞌatsanti.

Chunch iclayau ni va iclacasqꞌuinau ni chunch lana catatsuculh tachi ju kꞌachani ju Cristo.

29 Yuchach ju ictꞌajun lhichꞌalhcatnaꞌ chai slivasalh laꞌixlhichux quiꞌalhunut icnavi ju yuchi lacatachaput ju quixtakni ju Cristo.