JU PꞌULHNAN ALHIQUI JU ATSꞌOKNUNICALH JU AMACHAKꞌAN TESALÓNICA
Amacꞌamican ju amachakꞌan Tesalónica
1
Ju quijnan icPablo chai icSilvano chai icTimoteo ju ani icvilau.
Va iclamacꞌamiyau ju uxijnan ju vilhchitꞌit ju lakꞌachakꞌan Tesalónica.
Pus ju uxijnan va lakatam tꞌaꞌuntꞌatꞌit ju quimpaiꞌan Dios chai ju quiꞌucxtinꞌan Jesucristo.
Pus icꞌatapainini ju yuꞌunch ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
Isꞌatsucuntiꞌan chun junita tachi ju tuꞌuꞌ lhilaktsꞌintaiti
2 Pus va ta pakchux ju ictꞌachivinau ju Dios icjunau lakꞌailaktsꞌiuch ju milacataꞌan.
Chai ictapaininiyau ju yuchi ju milacataꞌan.
3 Icxtakniyau lakꞌailaktsꞌiuch ju quimpaiꞌan Dios ni va tachi icpastꞌacꞌau ju lhichꞌalhcat ju naviyatꞌit va ixlacaꞌatalh ni lhilacꞌapꞌintꞌatꞌit ju Jesús.
Vachuꞌ va tachi icpastꞌacꞌauch ju tuchꞌi naviyatꞌit mas xkꞌopꞌatꞌit va ixlacaꞌatalh ni mapꞌainiyatꞌit ju Jesús.
Vachuꞌ jantu lai iccꞌapꞌau ni lana jantu jeks uyatꞌit va ixlacaꞌatalh ni lhilaksiyatꞌit ju quiꞌucxtinꞌan Jesucristo ni cataxtakniyan ju miꞌatsucuntiꞌan ju conkꞌalhiyanta ju lactꞌiyan tachi ju takꞌalhtasunitan.
4 Iccꞌatsayau ni Dios ju tasacxtutan ji quiꞌalakꞌavin chai na tamapainiyan.
5 Icpunonau chunch ni istasui ixtachaput ju Spiritu Santu lamiꞌatsucuntiꞌan acsni xaclajunau ju chivinti ixlacata ju Jesús.
Jantu chun xatapasai tachi acsni va noncan va tuꞌuch chivinti.
Pus ixlhichux quiꞌalhunut quincꞌan xaccꞌatsayau ni yuchi ju Spiritu Santu ju ixtꞌajun chꞌalhcatnaꞌ lamiꞌalhunutꞌan ju uxijnan.
Chai acsni xaclatꞌavilau pus lana istasui laquiꞌatsucunti quincꞌan ni stavasalanti ju xaclajunau.
6 Vachuꞌ icpucꞌatsayau ni tasacxtutan ju Dios ni vachuꞌ chunch ju latꞌit tachi ju iclayau ju quijnan chai tachi ju lalh ju quiꞌucxtinꞌan Jesús.
Pus vachuꞌ taꞌaktaijutan ju Spiritu Santu ni laich xakꞌachꞌanatꞌit mas na tamamakꞌalhkꞌajniyan ju lapanacni va ixlacata ni lacꞌaꞌinitꞌit ju ixchivinti Dios.
7 Chai ni chunch ju latꞌit ju uxijnan pus ju miꞌatsucuntiꞌan valhch tachi tuꞌuꞌ xalhilaktsꞌintaiti ixlacataꞌan tachi chun ju talhilacaꞌanta ju Cristo amachakꞌan xalacatꞌun Macedonia chai amachakꞌan xalacatꞌun Acaya.
8 Chai uxijnan ju makpꞌitsꞌitꞌit ixchivinti ju quiꞌucxtinꞌan Jesús.
Chai jantu va anch ju xalacatꞌun Macedonia chai Acaya para vanta anchach cꞌatsacan ni lhilacꞌapꞌintꞌatꞌit ju Dios.
Chai ju chunch pus jantu tasqꞌuini ni tuꞌuꞌ acꞌajunilh ju lapanacni ju milacataꞌan.
9 Ju yuꞌunch tanajun ta yu xaclayau acsni iclalakchiu ju uxijnan.
Vachuꞌ tanajun ta yu pꞌumacꞌaꞌuntꞌit ju misantoqꞌuiuꞌan chai lhilacꞌapꞌitꞌit ju Dios chai makꞌaxtꞌaknikꞌotꞌit ju miꞌatsucuntiꞌan ju yuchi.
Yuchach ju lakꞌajunta chai stavasalanti Dios junita.
10 Vachuꞌ ju uxijnan pꞌacxanatꞌit ju istsꞌalh Dios ju caminanta lactꞌiyan.
Yuchach ju malokꞌonilh ju Dios acsni ixnita.
Yuchi ju Jesús ju aquintamakꞌalhtaxtuyan ni jantu camakꞌalhkꞌajnanauch tachi ju catamakꞌalhkꞌajnanaꞌ ju aliꞌin acsni caꞌamalacasuniyaꞌ ju ixtalhkꞌamti ju Dios.