Ju Pablo na ixchꞌalhcatnan ju lakꞌachakꞌan Tesalónica
2
Ju uxijnan ji quiꞌalakꞌavin miꞌakstuꞌan cꞌatsꞌayatꞌit ni aktsꞌiya ixlhitapalai tuchi xacnaviyachau lamilhiꞌuxijnanꞌan.
2 Pus miꞌakstuꞌan cꞌatsꞌayatꞌit ni icmamakꞌalhkꞌajnicanchauch chai icmamaxanicanchauch ju lakꞌachakꞌan Filipos acsni tucaꞌ xaclalakꞌanachau ju uxijnan.
Para ju quiDiosꞌan quintamakꞌosunin ju quintalhanti quincꞌan ni laich xaclajunau ju uxijnan ta yu lai putakꞌalhtaxtucan.
Laich xaclajunau chunch mas quintalhixcajinch ju aliꞌin mintꞌaꞌamachakꞌan.
3 Pus ju tuchi iclalhimapꞌaksiyau yuchach ju stavasalanti chai jantu va xaclamalacaꞌiniputunau ju tuꞌuꞌ taꞌaklhtamat chivinti nin yuchi ni va aclaꞌokxchokꞌomaxtuniputu ju mintuminꞌan.
4 Alai yuchi ju Dios ju quintalaktsꞌintanun chai ni kꞌoxich quintalhiulan pus quintaxtaknitan ju lhichꞌalhcat ni acnaju ju ixchivinti Dios.
Pus yuchi lhichivinau tachi ju kꞌachanich ju Dios.
Jantu chun icnonau tachi ju va kꞌoxich catalhiula ju tam quintꞌalapanac.
5 Ju Dios cꞌatsai chai vachuꞌ ju uxijnan cꞌatsꞌayatꞌit ni jantu na va cꞌus lapanacni xaclatalacasuniyau ni va xaclapuꞌokxchokꞌoputu ju chivinti ju xaclajunau.
Chai Dios ju cꞌatsai chai vachuꞌ ju uxijnan cꞌatsꞌayatꞌit ni jantu va xaclaꞌokxchokꞌosqꞌuiniputunau ju mintuminꞌan.
6 Jantu xacpuxcoyau ta yu laich aquintapulakꞌayan ju lapanacni.
Nin uxijnan nin yuchi ju akꞌantam lapanac.
Jantu chunch xaclayau mas ca laich chunch aclau ni ixtamalakachan Cristo icjuntau.
7 Alai chunch xaclayau tachi ju tam chakoꞌulh ju na mapaini ju isꞌaskꞌatꞌan chai na alhistꞌacꞌa.
8 Chai ni slivasalh na xaclamapainiyau ju uxijnan pus jantu va yuchi ju ixchivinti Dios ju xaclaxtakniputunauch para vachuꞌ xaclhitapꞌuxputunau mas quiꞌatsucunti quincꞌan ju va milacataꞌan.
Chunch xacnaviputunau ni aktsꞌiya tuꞌuꞌ xaclalhiulayau ju uxijnan.
9 Ju uxijnan pꞌastꞌacꞌatꞌit ni xaclamasuniyau ixchivinti Dios para vachuꞌ xacchꞌalhcatnanau ta yu xacpulhajayau ju quivaiti quincꞌan.
Chai na xacxkꞌopau.
Tsꞌis chai tuncuj xacchꞌalhcatnanau.
Ju chunch jantu xamatiꞌ ju milhiꞌuxijnan xacmaxcayaniyau ju ixꞌalhunut ju quimavaca quincꞌan acsni xaclajunau ixchivinti Dios.
10 Ju uxijnan ju lhilacꞌapꞌinatꞌit ju Cristo cꞌatsꞌayatꞌit chai vachuꞌ Dios cꞌatsai ni na salaka chai na soknicꞌa ixjunita ju quiꞌatsucunti quincꞌan acsni xaclatꞌavilau.
Chai lana matich ixjunita ju quintalakꞌalhin quincꞌan.
11 Cꞌatsꞌayatꞌit ni na xaclamapꞌaksiyau chai xaclamatankꞌoxaxkꞌayayau ju pumatamin ju uxijnan tachi ju lai tam xapai ni na mapaini ju isꞌaskꞌatꞌa.
12 Xaclajunau chunch ni atsꞌucꞌuyaꞌitꞌit tachi ju lhijunch ni lhilacꞌapꞌintꞌatꞌit ju Dios.
Yuchach ju tatꞌasanitan ni laich atꞌanuyaꞌitꞌit ju lactꞌiyan junta lhinajun ju yuchi chai laich alaktsꞌinaꞌitꞌit ni vasalh xakꞌaich ju yuchi.
13 Pus acsni tavanan iclamakꞌasmatnitachau ju ixchivinti Dios pus ju uxijnan lana lacꞌaꞌitꞌit ni ixchivinti Dios junita.
Chai vasalh chunch junita.
Pus jantu xalacꞌaꞌiyatꞌit ni ixchivinti cava ju va tam quintꞌalapanacꞌan.
Chai yuchi va tachi iclhixtakniyau lakꞌailaktsꞌiuch ju Dios.
Chai ju anuꞌ ixchivinti Dios va tachi chꞌalhcatnan lamiꞌalhunutꞌan ju uxijnan ju lacꞌaꞌiniyatꞌitch.
14 Pus ju uxijnan ji quiꞌalakꞌavin vana va chun chꞌixatꞌit ju makꞌalhkꞌajnat tachi ju talalh ju yuꞌunch ju talhilacaꞌanta ju Dios chai ju Cristo Jesús ju tavilanancha ju xaꞌestado Judea.
Ju uxijnan vana va chun makꞌalhkꞌajnanatꞌit laꞌixmacaꞌan ju mintꞌaꞌamachakꞌanꞌan tachi ju yuꞌunch ni tamakꞌalhkꞌajnalh laꞌixmacaꞌan ju istꞌaꞌisraelitanin.
15 Pus yuꞌunch ju israelitanin ju tamakni ju quiꞌucxtinꞌan Jesús chai ju ixlapanacni Dios ju ixtanajun ixchivinti chai vachuꞌ quintaxcauxtuyan ju quijnan.
Pus ju Dios lana jantu kꞌox lhiulai tachi ju talai ju yuꞌunch.
Chai ju yuꞌunch ixtꞌalaxcaichꞌan tajunita tachi chun ju lapanacni.
16 Pus ju yuꞌunch jantu quintalakꞌaꞌiniyan ni acꞌajuniu ixchivinti Dios ju jantu israelitanin acsni icꞌajuniu ni laich catatakꞌalhtaxtulh.
Chai ni chunch ju talalh pus na talhava ju ixtalakꞌalhinꞌan.
Para cachinaꞌ avilhchan acsni caꞌamalacasuniyaꞌ ju yuꞌunch ju ixtalhkꞌamti ju Dios.
Ju Pablo anchokoputun ju lakꞌachakꞌan Tesalónica
17 Pus ju quijnan ji quiꞌalakꞌavin mas jantu lalaktsꞌinau pantsꞌiquis ju laquiꞌucxlacapuꞌan para jantu tavanan ju iclacaptau.
Chai ni pantsꞌiquis xajun ju jantu xalalaktsꞌinauch pus yuchi slivasalh ixlhichux quiꞌalhunut quincꞌan iclalaktsꞌinchokoputunau ju uxijnan.
18 Pus ju quijnan slivasalh na xaclalakꞌamputunachau ju uxijnan.
Pus ju quitꞌin icPablo chai ju quitꞌin na paklhu xacnavi talakmaskꞌatinti ni xacꞌancha.
Para va xaquintanchajnitꞌajun ju lhacaticuru.
19 Iccꞌatsayau ni milacataꞌan ackꞌachanau acsni caminchokoyaꞌ ju quiꞌucxtinꞌan Jesús.
Chai iccꞌatsayau ni va milacataꞌan aclaktsꞌincanau ni icmuctaxtutauch laꞌixlhichꞌalhcat ju Dios.
20 Pus na kꞌox quintalhichivinan ju quijnan va milacataꞌan ju uxijnan.
Chai uxijnan ju iclalhikꞌachanau.