4
Chai ju uxijnan ji lapanacni ju alin ju tanaviniyan ju milhichꞌalhcatꞌan anavinitꞌitch ju soknicꞌa chai tachi ju lhijunch.
Apꞌastꞌactꞌit ni vachuꞌ alin ju miꞌucxtinꞌan ju lactꞌiyan.
2 Va tachi atꞌachꞌivinitꞌit ju Dios chai anavitꞌit cuenta tuchꞌi unatꞌit chai aꞌunitꞌit lakꞌailaktsꞌiuch.
3 Atꞌapꞌaininitꞌit ju Dios vachuꞌ ju quilacata quijnan ni laich acꞌajunau ju lapanacni ixlacata ju Cristo.
Laich acmavasalayau ixchivinti Dios ju jantu ixꞌamavasalanicanta ju lapanacni ju makꞌanchich.
Pus va ixlacata ni icnajun ju anuꞌ chivinti yuchi tachꞌin iclhijunita.
4 Asqꞌuintꞌit ni laich acꞌamavasalaniyaꞌ ni laich catamachakxayaꞌ.
Chunch acchivinaꞌ tachi ju lhijun ni acnaulh.
5 Lacakꞌox acꞌatsanti atꞌalalhiꞌitꞌit ju yuꞌunch ju jantucaꞌ tamispai ju Jesucristo.
Jantu va alhakꞌamanantꞌit ju mimpantsꞌiquisꞌan.
6 Va tachi kꞌox alalhixakꞌalatꞌit.
Na can achꞌivinintꞌit.
Ju chunch lai acꞌatsꞌayaꞌitꞌit ta yu laich apꞌuꞌakꞌalhtꞌayananaꞌitꞌit ju pumatamin ju catasacmiyan tuꞌuꞌ ixlacata ju Cristo.
Ju Pablo amacꞌaminin
7 Yuchi ju Tíquico ju catamacꞌatsanikꞌoyan ta yu icjunita.
Ju yuchi quilakꞌauꞌan junita ju na mapainicanta chai ju yuchi na quiꞌaktaijui chai lai lhilaksican.
Chai ju yuchi quintꞌanavi ixlhichꞌalhcat ju Jesús.
8 Pus icmalakachanitachan ju Tíquico ni lai acꞌatsꞌatꞌit ta yu icjuntau chai ni lai catamatankꞌoxaxkꞌayayan ju yuchi.
9 Chai ju Onésimo catꞌaꞌananta ju yuchi.
Ju yuchi quilakꞌauꞌan junita chai ju yuchi muctaxtui laꞌixtaxtokni Dios chai na icmapainiyau.
Chai ju yuchi mintꞌaꞌamachakꞌanꞌan junita.
Pus ju yuꞌunch catamacꞌatsanikꞌoyan tachi chun ju tꞌajun tapasanaꞌ ju ani.
10 Ju Aristarco ju ictꞌatꞌalhnucanta tamacꞌamiyan.
Vachuꞌ ju Marcos ixlhilakꞌau ju Bernabé tamacꞌamiyan.
Pus iclalhimapꞌaksitauch ixlacata ju yuchi.
Acsni tavanan catalakchaꞌanan pus lhikꞌach amaklhtꞌayanantꞌit.
11 Vachuꞌ tamacꞌamiyan ju Jesús ju vachuꞌ Justo juncan.
Ju yuꞌunch quintꞌaꞌisraelitanin quincꞌan tajunita chai talhilacaꞌanta ju Cristo.
Pus va yuꞌunchach ju quintatꞌachꞌalhcatnan ixꞌajunica ju lapanacni ixchivinti Dios.
Matich apumatam ju sia yuꞌunch ju quintatꞌachꞌalhcatnan.
Pus ju anuꞌ ixpumatꞌutuꞌan slivasalh na quintamatankꞌoxaxkꞌayai.
12 Vachuꞌ tamacꞌamiyan ju Epafras ju vachuꞌ mintꞌaꞌamachakꞌanꞌan junita.
Chai ju yuchi ixlapanac Cristo junita vachuꞌ.
Pus ju yuchi va tachi tapaininich ju Dios ju milacataꞌan ni atsꞌucꞌuyaꞌitꞌit tachi ju kꞌachani ju Cristo chai ni anaviyaꞌitꞌit tachi chun ju lacasqꞌuin ju Dios.
13 Chai quitꞌin quiꞌakstu iclaktsꞌinta ju yuchi ni slivasalh na tapainini ju Dios ju milacataꞌan ju uxijnan chai ixlacataꞌan ju tavilanancha ju lakꞌachakꞌanixni Laodicea chai Hierápolis.
14 Vachuꞌ tamacꞌamiyan ju Lucas ju acꞌuchꞌunuꞌ ju na mapainicanta.
Chai vachuꞌ tamacꞌamiyan ju Demas.
15 Amacꞌamitꞌit ju quiꞌalakꞌavinꞌan ju tavilanancha ju lakꞌachakꞌan Laodicea.
Vachuꞌ amacꞌamitꞌit ju quilakꞌauꞌan atsiꞌ Ninfas chai tachi chun ju talhilacaꞌanta ju Cristo ju tatakꞌaixtꞌokꞌach laꞌixchakaꞌ.
16 Pus ju ani atsꞌoknut alhiqui acsni akꞌasmatkꞌoyaꞌitꞌit ju uxijnan amalakꞌachꞌayaꞌitꞌit ju lakꞌachakꞌan Laodicea.
Chach takꞌasmatꞌanta vachuꞌ ju yuꞌunch ju talhilacaꞌanta ju Cristo ju tavilanancha ju anch.
Chai ju alhiqui ju icꞌatsꞌoknunita ju amachakꞌan Laodicea catamalakachanitachin ju uxijnan.
Pus akꞌasmatꞌaꞌitꞌit vachuꞌ ju yuchi tuchi najunch.
17 Chai aꞌunaꞌitꞌit ju Arquipo ni camuctaxtu ju lhichꞌalhcat ju xaxtakni ju ixꞌucxtin Jesús.
18 Ju quitꞌin icPablo chai tus ani apumatam xaquiꞌatsꞌoknuni ju ani alhiqui.
Para ju chavai quitꞌin quiꞌakstu aclaꞌatsꞌoknuniyau chai aclamacꞌamiyau.
Apꞌastꞌactꞌit ni tachꞌin icjunita.
Ictapainini ju Dios ni cataxtakniyan ju kꞌox miꞌatsucuntiꞌan.
Vasalh chunch iclacasqꞌuin.