3
Ju chavai ju Cristo vanin tꞌavilhcha ju Dios ju lactꞌiyan.
Chai ju Dios talhilhcatan ju uxijnan ni tachi ju va tꞌalokꞌonchꞌokꞌotꞌatꞌit ju Cristo.
Pus yuchi lhitasqꞌuini ni ixtaxtokni Dios ju anavitꞌit cuenta ju uxijnan.
2 Yuchi ju palai anavitꞌit cuenta ju xataxtokni lactꞌiyan.
Jantiyuꞌ ju va xataxtokni ju ani lacamunutpaꞌ.
3 Pus ju Dios talhilhcatan tachi ju va tꞌanitꞌatꞌit ju Cristo.
Chai ju chavai alin ju sastꞌi miꞌatsucuntiꞌan ni lhilacꞌapꞌintꞌatꞌit ju Cristo chai isꞌaskꞌatꞌan Dios untꞌatꞌit.
4 Pus yuchi ju Cristo ju quintaxtaknitan ju sastꞌi quiꞌatsucuntiꞌan.
Chai acsni tavanan caminchokoyaꞌ ju yuchi pus ju uxijnan vachuꞌ atꞌatꞌalacꞌasuyaꞌitꞌit ju yuchi.
Chai vachuꞌ xalackꞌajin aꞌunaꞌitꞌit.
Ta yu ixjunita ju quiꞌatsucuntiꞌan chai ta yu junita ju chavai
5 Chai ni chunch junita ju quiꞌatsucuntiꞌan ju chavai pus yuchi alhitsꞌucꞌutꞌit tachi ju vasalh nitꞌatꞌit ixlacata ju xataxtokni ju ani lacamunutpaꞌ.
Jantu atꞌatsꞌucꞌutꞌit ju jantu miꞌamachakaꞌan u ju jantu mimpapaꞌan.
Nin lai anavitꞌit ju aliꞌ alactuꞌunti ju ixtꞌachunch cava.
Jantu akꞌachꞌanitꞌit tachi chun ju atsiꞌin.
Nin yuchi ni caꞌalilh ju macxcai miꞌatalacpastꞌacꞌatꞌan.
Chai jantu alhacchꞌipꞌitꞌit tuꞌuꞌ.
Ni va chunch alatꞌit pus tachi ju va midiosꞌan navitꞌatꞌit ju miꞌalintaꞌan.
6 Pus va ixlacata ni chunch ju taꞌalactuꞌunun ju lapanacni ju jantu taquiclacaꞌiputun ju Dios yuchi alhiꞌulanicanta ixtalakꞌalhinꞌan chai caꞌamamakꞌalhkꞌajnicanaꞌ.
7 Chai ju uxijnan vachuꞌ chunch ju ixlayatꞌit ju pꞌulhnan.
8 Para ju chavai amacꞌaꞌuntꞌit tachi chun ju ani taxtokni.
Jantuch vana atꞌalhkꞌamantꞌit.
Jantu alhilakꞌachꞌapꞌutꞌit tuꞌuꞌ.
Jantu alaxcꞌaꞌitꞌit.
Jantu anaꞌuntꞌit macxcai chivinti ixlacata akꞌantam.
Jantu anaꞌuntꞌit tuꞌuꞌ macxcai chivinti.
9 Jantu vana alaꞌunitꞌit taꞌaklhtamat ni cꞌaptꞌatꞌit ju miꞌatsucuntiꞌan tachi ju ixlayatꞌit acsni tucaꞌ ismispꞌayatꞌit ju Jesucristo.
10 Para ju chavai sastꞌi ju miꞌatsucuntiꞌan.
Chai palai palai mispꞌayatꞌit ju Dios tus acsni cachinaꞌ avilhchan acsni apꞌastꞌacꞌaꞌitꞌit tachi ju apastacnan ju Dios ju tanavitan.
11 Pus sia quijnanꞌan ju sastꞌi junita ju quiꞌatsucuntiꞌan jantu lhitapalai ni israelitanin juntau u ni jantu israelitanin.
Jantu lhitapalai ni chꞌucꞌucantau u ni jantu cachꞌucꞌucau.
Jantu tuꞌuꞌ nomputun mas atalanininta cava u ni jantu tuꞌuꞌ mispai.
Jantu tuꞌuꞌ nomputun mas va xalapanac junita.
Nin yuchi ju isꞌakstu chꞌalhcatnan.
Va yuchi ju Cristo ju tapalai chai yuchi ju tꞌajun laquiꞌalhunutꞌan quinchuxꞌan ju lhilacaꞌantauch ju yuchi.
12 Pus Dios ju tasacxtutan ni isꞌaskꞌatꞌan aꞌunaꞌitꞌit chai ju yuchi na tamapainiyan.
Pus yuchi lhitasqꞌuini ni kꞌeu acꞌatsꞌantꞌit.
Chai amalacꞌasutꞌit ju milhikꞌox lapanacꞌan.
Atꞌalacꞌatꞌicstꞌitꞌit.
Kꞌoxich atꞌalalhipꞌitꞌit lhichux.
Chai achꞌixkꞌotꞌit tachi chun ju macxcai.
13 Achꞌixtꞌit ni tuꞌuꞌ tanaviyan tam xamatiꞌ.
Chai alamacꞌacxanitꞌit acsni tuꞌuꞌ lanaviniyatꞌit macxcai.
Ju Cristo ni quintamacꞌacxaninch pus vachuꞌ chunch alanavitꞌit ju uxijnan.
14 Chai ju tucan tasqꞌuini yuchi ni na alamapꞌainitꞌit.
Ju chunch ni kꞌoxich atsꞌucꞌuyaꞌitꞌit chai va lakatam cajunaꞌ ju miꞌatalacpastꞌacꞌatꞌan.
15 Pus acsni alin tuꞌuꞌ lhamakꞌan lamilhiꞌuxijnanꞌan pus apꞌuxcꞌaꞌutꞌit tamalhch ju alatꞌit ta yu laich kꞌox apꞌulalhipꞌitꞌit.
Chai ju Cristo cataꞌaktaijuyan ni jantu atꞌalakꞌaꞌitꞌit ju aliꞌin.
Pus ju uxijnan lhisacxtꞌucꞌantꞌatꞌit ni kꞌox alalhipꞌitꞌit minchuxꞌan ni tachi ju va lakatam lacatuna untꞌatꞌit ni si lhilacꞌapꞌintꞌatꞌit ju Cristo.
Vachuꞌ tasqꞌuini ni va tachi aꞌunitꞌit lakꞌailaktsꞌiuch ju Dios.
16 Va tachi anavitꞌit cuenta tuchi ixnajun ju Cristo.
Kꞌox amachꞌakxatꞌit acsni lamalaniyatꞌit chai acsni lamapꞌaksiyatꞌit.
Chai alamalanitꞌit ixchivinti Dios chai alamapꞌaksitꞌit acsni milhpꞌayatꞌit ju salmos chai acsni lakꞌayapꞌutꞌunatꞌit ju Dios laca tuꞌuꞌ milhpat.
Laꞌixlhichux miꞌalhunutꞌan amilhpꞌanitꞌit ju Dios chai aꞌunitꞌit lakꞌailaktsꞌiuch ixlacata chux ju taxtaknitan.
17 Chai va tuchi ixtalakxtuch ju naviyatꞌit chunch ju anavitꞌit tachi ju kꞌox calhiulayaꞌ ju quiꞌucxtinꞌan Jesús.
Chai va tuchi ixtalakxtuch ju nonatꞌit chunch ju achꞌivinintꞌit tachi ju kꞌox calhiulayaꞌ ju yuchi.
Chai axtꞌaknitꞌit lakꞌailaktsꞌiuch ju quimpaiꞌan Dios ixlacata tachi chun ju quintaxtakniyan.
Chani cava ju isꞌatsucuntiꞌan ju talhilacaꞌanta ju Jesucristo
18 Ju uxijnan ju icꞌantꞌatꞌit aqꞌuiclacꞌaꞌitꞌit ju mimpapaꞌan tachi ju lhijunch ni lhilacꞌapꞌintꞌatꞌit ju Jesús.
19 Ju uxijnan ji papanin amapꞌainitꞌitch ju miꞌamachakaꞌan chai jantu atꞌalakꞌaꞌitꞌit ju yuchi.
20 Chai ju uxijnan ji askꞌatꞌan aqꞌuiclacꞌaꞌitꞌit ju mimpaiꞌan chai ju minatiꞌan tachi chun ju tajunan.
Aqꞌuiclacꞌaꞌitꞌit ni na kꞌox lhiulai ju Jesús acsni chunch ju layatꞌit.
21 Ju uxijnan ji xalacpaꞌitni jantu na va lhu ju akꞌaꞌitꞌit ju miꞌaskꞌatꞌan.
Pus ni chunch ju alatꞌit jantu xcai ni va jeks cataꞌulh.
22 Chai ju uxijnan ji xalapanacni aqꞌuiclacꞌaꞌitꞌit tachi chun ju catalhijunan ju miꞌucxtinꞌan ju ani lacamunutpaꞌ.
Va tachi kꞌox achꞌalhcꞌatnantꞌit.
Jantu va acsnich ju kꞌox achꞌalhcꞌatnantꞌit acsni va talaktsꞌinan ju miꞌucxtinꞌan ni laich catanaulh ni lackꞌoxin lapanacni untꞌatꞌit.
Alai va tachi kꞌox achꞌalhcꞌatnanitꞌit ni tꞌalhoniyatꞌit ju Dios.
23 Tachi chun ju naviyatꞌit pus ixlhichux ju miꞌalhunutꞌan ju anavitꞌitch tachi ju va jun Dios ju chꞌalhcꞌatnaniyatꞌit.
Jantu chun tachi ju va mintꞌalapanacni ju chꞌalhcꞌatnaniyatꞌit.
24 Pus chunchach ju alatꞌit ni cꞌatsꞌayatꞌit ni yuchi ju Cristo ju catamapalhniyan.
Yuchi ni apꞌinaꞌitꞌit ju lactꞌiyan ni achꞌalhcꞌatnaniyaꞌitꞌit ju Cristo ju vasalh miꞌucxtinꞌan junita.
25 Para ju navi ju macxcai calhimapalhnicanaꞌ ixlacata ju macxcai ju xanavi.
Chai ju Dios jantu xamatiꞌ ju va pumacatami camapaini.