JU ALHIQUI JU ATSꞌOKNUNICALH JU AMACHAKꞌAN FILIPOS
Ju Pablo amacꞌami ju amachakꞌan Filipos
1
Ju quitꞌin icPablo chai quintꞌavi ju Timoteo.
Ixlapanacni ju Jesucristo icjuntau.
Chai iclamacꞌamiyau ju uxijnan ju lhinonatꞌit lacatalhavat chai ju aꞌaktꞌaiꞌununatꞌit lacatalhavat ju talhilacaꞌanta ju Cristo.
Vachuꞌ iclamacꞌamiyau tachi chun ju aliꞌin uxijnan ju vachuꞌ lhilacꞌapꞌinatꞌit ju Cristo Jesús ju vilhchitꞌit ju lakꞌachakꞌan Filipos.
2 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
Ju Pablo sqꞌuini ju Dios ixlacataꞌan ju talhilacaꞌanta ju Cristo
3 Pus va ta pakchux ju iclapastꞌacꞌau ju uxijnan icxtakni lakꞌailaktsꞌiuch ju quiDios ju milacataꞌan.
4 Chai va ta pakchux ju icsqꞌuini ju Dios ju milacataꞌan slivasalh na ickꞌachan.
5 Icxtakni lakꞌailaktsꞌiuch ju Dios ju milacataꞌan ni na lhu aꞌaktaijunti xaquilaxtakniyau ni laich xacpumakpitsi ju chivinti ixlacata ju Cristo tus acsni lacꞌaꞌichitꞌit tus chavai.
6 Yuchi ju Dios ju taiꞌulata ju kꞌox lhichꞌalhcat ju tanaviniyan ni laich palai alhilacꞌapꞌinaꞌitꞌit ju Jesús chai lana iccꞌatsai ni yuchi ju catailhiꞌanaꞌ tus acsni cachinaꞌ ju avilhchan acsni caminchokoyaꞌ ju Jesucristo.
7 Chai lhijunch ni chunchach acpastaclh ju milacataꞌan ni laꞌixlhichux quiꞌalhunut iclamapainiyau.
Vachuꞌ lhijunch ni aclamapainiu ni va kꞌaixtam quintanaviniyan lamapainin ju Dios chai vachuꞌ ni quilaꞌaktaijuyau acsni ictꞌalhnucanta ju chavai.
Vachuꞌ quilaꞌaktaijuch acsni xaclhiꞌancanta lacapuꞌucxtin chai icꞌamavasalanilh ju lapanacni ni stavasalanti ju ixchivinti Dios.
8 Pus ju Dios kꞌox cꞌatsai ni vasalh iclamapainiyau minchuxꞌan ju uxijnan.
Chun iclamapainiyau tachi ju tamapainiyan ju Jesucristo.
9 Ju tucan icsqꞌuini ju Dios ju milacataꞌan yuchi ni amapꞌaininintꞌit.
Para vachuꞌ icsqꞌuini ni palai lhu caꞌalilh ju mintacꞌatsanꞌan chai ju miꞌamachakxantiꞌan.
10 Ju chunch aktsꞌiya laich asacxtꞌuyaꞌitꞌit ju kꞌox.
Chai ju chunch salaka aꞌunaꞌitꞌit lamiꞌatsucuntiꞌan chai jantu amakꞌalhkꞌosuyaꞌitꞌit xamatiꞌ tus acsni caminchokoyaꞌ ju Cristo.
11 Ju chunch ju Jesucristo cataꞌaktaijuyan ni lai sok atsꞌucꞌuyaꞌitꞌit.
Chai ni chunch junita ju miꞌatsucuntiꞌan pus calakꞌayacanaꞌ ju Dios chai catanonach ju lapanacni ni slivasalh xakꞌai ju yuchi.
Ju Pablo najun ni va yuchi ju Cristo ju lhitapalai laꞌisꞌatsucunti
12 Iclacasqꞌuinch ji quiꞌalakꞌavin ni acꞌatsꞌatꞌit ni na lhu takꞌasmatlh ju chivinti ixlacata ju Cristo va ixlacaꞌatalh ni ictꞌalhnucanta ju chavai.
13 Pus tachi chun ju ixtaropajni ju ucxtin chai ju aliꞌin lapanacni ju ani tavilanalh si tacꞌatsakꞌojui ni va ixlacaꞌatalh ni iclhilacaꞌanta ju Cristo yuchi iclhitꞌalhnucanta.
14 Chai ju chavai na lacatsꞌunin ju quiꞌalakꞌavin ju titatalhanancaꞌ.
Ju chavai na lhu alin ju palai jokꞌat tacꞌatsan chai tanajun ixchivinti Dios chai jantu tatalhanan.
Chunch talai va ixlacaꞌatalh ni talaktsꞌin ni quilhistꞌacꞌa ju Cristo chai yuchi palai talhilhilaksi ju yuchi.
15 Vasalh alin lapanacni ju tanajun ju chivinti ixlacata ju Cristo va ixlacaꞌatalh ni talhacchaꞌani ju tuchi lai xacnavi chai va quintaxcaji.
Para ju aliꞌin na kꞌox ju ixꞌatalacpastꞌacꞌatꞌan acsni tanajun ju chivinti ixlacata ju Cristo.
16 Ju aliꞌin tanajun ju chivinti ixlacata ju Cristo para va ixlacaꞌatalh ni va palaich acꞌamakꞌaninilh tanajun lacapulachꞌin ni va yuꞌunchach ju palai lhu caꞌachꞌakꞌokꞌacalh.
Chai aquintamacoyaulh ju quitꞌin.
Para lana jantu kꞌox tachi ju tapastꞌacꞌa ju yuꞌunch.
17 Para ju aliꞌin lapanacni tanajun ju chivinti va ixlacaꞌatalh ni quintamapaini.
Tacꞌatsai ni icxtaknicalh ju lhichꞌalhcat ni acꞌamavasalaniyaꞌ ju lapanacni ni stavasalanti ju chivinti ixlacata ju Cristo.
18 Ju quitꞌin ickꞌachan mas jantu kꞌox talai ju aliꞌin.
Iclhikꞌachan ni aktsꞌiya tanajun ju chivinti ixlacata ju Cristo.
Chai va tachi ackꞌachanach.
19 Pus iccꞌatsai ni kꞌox acxajanta ni sqꞌuiniyatꞌit ju Dios ju quilacata chai ni quiꞌaktaijui ju Spiritu Santu.
20 Slivasalh iclacasqꞌuin ni jantu tuꞌuꞌ acnaviyaꞌ ju lai aclhimaxananaꞌ astan.
Pus tachi ju aktsꞌiya xacnajun ju chivinti ixlacata ju Cristo chai jantu xactalhanan pus vana va chun aclayaꞌ ju chavai.
Chai ju chunch calakꞌayacalh ju Cristo ixlacata quiꞌatsucunti mas acniyaꞌ u actitsuculhcaꞌ lacatsꞌunin.
21 Pus ni ictꞌajuncaꞌ pantsꞌiquis pus va lakatam taxtokni ju icnaviputun.
Va icnaviniputun ju ixkꞌachat ju Cristo.
Para ni acniyaꞌ pus palai kꞌox cajunaꞌ ju quilacata.
22 Para ni actitsucuyaꞌ alacatsꞌunin pus laich icꞌamalacaꞌini ju aliꞌin ixlacata ju Cristo.
Pus ju chunch jantu iccꞌatsai tamalhch ju acsacxtuyaꞌ.
U acniputunach u jantu.
23 Pus na lhu alin ju quiꞌatalacpastꞌacꞌat.
Na icniputun ni laich actꞌatolanta ju Cristo.
Ju chunch palai kꞌox cava ju quilacata.
24 Para palai tasqꞌuini ni actitsuculhcaꞌ alacatsꞌunin ni laich aclaꞌaktaijuyau ju uxijnan.
25 Chai ni iccꞌatsai ni quilamaktasqꞌuiniyaucaꞌ pus iccꞌatsai ni actsucuyacaꞌ alacatsꞌunin ni laich aclaꞌaktaijuyau ni laich palai alhilacꞌapꞌinaꞌitꞌit ju Cristo chai palai alhikꞌachꞌanaꞌitꞌit.
26 Chai acsni tavanan calalaktsꞌinchokoyau pus laich alhilakꞌayayaꞌitꞌit ju Cristo Jesús ni quimaxtulh lacapulachꞌin.
27 Para aktsꞌiya atsꞌucꞌutꞌit tachi ju lhijunch ni lhilacꞌapꞌinatꞌit ju Cristo.
Ju chunch mas aclaꞌantachau laktsꞌinin u jantu para ackꞌasmatlich ju milacataꞌan ni va tachi lhilacꞌapꞌinatꞌit ju Cristo chai va lakatam untꞌatꞌit.
Vachuꞌ ackꞌasmatlich ni laꞌaktꞌaiꞌuyatꞌit ni jantu tuꞌuꞌ catamacꞌapꞌaniyan ni jantu alhilacꞌapꞌitꞌit ju chivinti ixlacata ju Cristo.
28 Jantu alakꞌaꞌitꞌit ni catamakꞌantalhanayan ju taxcayan.
Chai ni taxcayan pus pumachakxacan ni catatsꞌankꞌakꞌalhiyach ju yuꞌunch.
Chai ju uxijnan ni laich achꞌixaꞌitꞌit tuchi tapumamakꞌalhkꞌajniyan pus apꞌucꞌatsꞌayaꞌitꞌit ni yuchi ju Dios ju taꞌaktaijuyan chai aktsꞌiya catamakꞌalhtaxtuyan.
29 Pus ju Dios jantu va yuꞌ xatalhisacxtuyan ni laich xalhilacꞌapꞌinaꞌitꞌit ju Cristo.
Para vachuꞌ talhisacxtuyan ni laich amakꞌalhkꞌajnanaꞌitꞌit ixlacata yuchi.
30 Pus ju uxijnan chai ju quitꞌin vaklhtam chun mamakꞌalhkꞌajnicanau ixlacata yuchi.
Pus ju uxijnan quilalaktsꞌiuch acsni xacmamakꞌalhkꞌajnican.
Chai ju chavai kꞌasmatꞌatꞌit ni vana va chun ju icmamakꞌalhkꞌajnican.