JU ALHIQUI JU ATSꞌOKNUNICALH JU AMACHAKꞌAN EFESO
Ju Pablo amacꞌami ju amachakꞌan Efeso
1
Ju quitꞌin icPablo chai Dios ju lacasqꞌuilh ni ixtamalakachan acva.
Iclamacꞌamiyau ju uxijnan ju isꞌaskꞌatꞌan Dios untꞌatꞌit ju vilhchitꞌit ju lakꞌachakꞌan Efeso.
Ju uxijnan vachuꞌ lhilacꞌapꞌintꞌatꞌit ju Cristo.
2 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
Ju Cristo xtꞌakꞌa tachi chun ju kꞌox
3 Chach lakꞌayacalh ju Dios ixpai ju quiꞌucxtinꞌan Jesucristo.
Ju yuchi quintaxtaknitan tachi chun ju kꞌox va ixlacaꞌatalh ni lhilacaꞌanauch ju Cristo.
Chai ju tuchi quintaxtaknitan ju yuchi pus lactꞌiyan ju xaminacha.
4 Pus quintanavitan chunch va ixlacaꞌatalh ni Dios ju quintasacxtun makꞌanch acsni tucaꞌ ixnavican ju lacamunutpaꞌ ni va lakatam catꞌajumvi ju Cristo.
Pus ju yuchi va islacasqꞌuin ni laich ixꞌanuꞌ cajumvi chai laich aquintalaktsꞌinan tachi ju va matich ju quiꞌalactuꞌuntiꞌan chai yuchi quintalhisacxtun.
5 Tus makꞌanchich ixnajunta ju Dios laꞌixꞌamapaininti ni aquintanaviyan isꞌaskꞌatꞌan va ixlacata ju Jesucristo.
Chai va ixlacata ni chunch ju xakꞌachani pus chunch ju lalh.
6 Pus ni laich calakꞌayacalh ixlacata ju kꞌai ixꞌamapaininti ju quintanavinitan yuchi xaquintalhinaviyan isꞌaskꞌatꞌan.
Lana lhu quintanavinitan ju lamapainin acsni quintanavin isꞌaskꞌatꞌan va ixlacata ni lhilacaꞌantauch ju istsꞌalh ju na mapaini.
7 Yuchach ju quintamalakxtun laꞌixꞌacꞌalhni.
Chai ni slivasalh na kꞌai ju ixꞌamapaininti ju quintamasunitan pus quintamacꞌacxaninch ju quiꞌalactuꞌuntiꞌan.
8 Chai ju anuꞌ kꞌai ixꞌamapaininti ju quintamasunitan jantu va yuchi ni quintamakꞌalhtaxtun.
Para vachuꞌ lhu xaquintaxtakniyan ju atalaninti chai acꞌatsanti.
9 Chai vachuꞌ quintamavasalanin ju ixkꞌachat ju jantu ixꞌamavasalanicanta ju lapanacni ju makꞌanchich.
Quintamavasalanin tuchi ilhcata ni canaviyaꞌ ju Cristo.
10 Pus tus makꞌanchich ixnajunta ni caꞌulacanach ju Cristo ixpuxaꞌucxtin tachi chun ju xataxtokni ju alin lactꞌiyan chai ju alinch ju lacatꞌun.
Chai chux ju ani caꞌuctaxtuyaꞌ acsni cataꞌaktsayaꞌ ju avilhchan tachi ju ilhcata ju Dios.
11 Chai va ixlacata ni lhilacaꞌantau ju Cristo pus ju Dios aquintaxtakniyan ju ixmakꞌalit.
Na makꞌanch chunch ispastacta ju Dios ju quilacataꞌan chai ju yuchi aktsꞌiya navikꞌojui chux tachi ju kꞌachani.
12 Ju Dios yuchi quintalhisacxtutan makꞌanch ni laich aclakꞌayayau ni yuchi ju tucan xakꞌai.
Aclakꞌayayau ju quijnan ju pꞌulhnan iclhilacaꞌantauch ju Cristo.
13 Chai vachuꞌ ju uxijnan lacꞌaꞌitꞌatꞌit acsni kꞌasmatꞌatꞌit ju chivinti ju stavasalanti junta najun ta yu laich putakꞌalhtaxtucan junta jonkꞌalhita makꞌalhkꞌajnat.
Chai acsni lacꞌaꞌitꞌatꞌit pus ju Dios taxtaknin ju anuꞌ ju apꞌucꞌatsꞌayaꞌitꞌit ni vasalh ixꞌanuꞌ untꞌatꞌit.
Yuchi ju Spiritu Santu ju ixkꞌalhtasuta ju Dios.
14 Xtaknicantauch ju Spiritu Santu ju chavai ni laich cacꞌatsayau ni vasalh aquintaxtakniyan tachi chun ju kꞌalhtasuta ju Dios.
Chai acsnich ju aquintaxtakniyan acsni matich lana cajunaꞌ ju quiꞌalactuꞌuntiꞌan ni alin ju sastꞌi quilacatunaꞌan.
Chai ju chunch palai calakꞌayayau ju Dios ju tucan xakꞌai.
Ju Pablo tapainini ju Dios ixlacataꞌan ju amachakꞌan Efeso
15 Pus ju quitꞌin ickꞌasmatlh ni ixlhichux ju miꞌalhunutꞌan ju lhilacꞌapꞌintꞌatꞌit ju quiꞌucxtinꞌan Jesús chai na amapꞌainiyatꞌit tachi chun ju vachuꞌ talhilacaꞌanta ju yuchi.
16 Pus yuchi va tachi iclhijunich ju Dios lakꞌailaktsꞌiuch ju milacataꞌan chai icsqꞌuini ju Dios ju milacataꞌan acsni ictꞌachivinin ju yuchi.
17 Ictapainini ju Dios ixpai ju quiꞌucxtinꞌan Jesucristo.
Yuchi ju xakꞌai tucan.
Icsqꞌuini ni cataxtakniyan ju kꞌox mintacꞌatsanꞌan ni laich amachꞌakxayaꞌitꞌit ixtaxtokni Dios.
Chai ju chunch palai lai amispꞌayaꞌitꞌit ju yuchi ta tucan junita.
18 Icsqꞌuini ni catamalacpucujunin ju mintacꞌatsanꞌan ni laich amachꞌakxayaꞌitꞌit tuchi ixtalakxtuch ju lacꞌaꞌiyatꞌit ni cataxtakniyan ju Dios ju lactꞌiyan chai tuchi lhilhcꞌacꞌantꞌatꞌit.
Vachuꞌ icsqꞌuini ju Dios ni laich amachꞌakxayaꞌitꞌit ni slivasalh na kꞌox ju anuꞌ ju caꞌaxtaknicanaꞌ tachi chun ju isꞌaskꞌatꞌan tajunita.
19-20 Chai icsqꞌuini ni laich acꞌatsꞌayaꞌitꞌit ni slivasalh na kꞌai ju ixtachaput ju quilacataꞌan ju lhilacaꞌantauch ju yuchi.
Chai ju ixtachaput ju na kꞌai ju quilacataꞌan vana va yuꞌ ju malacasulh ju Dios acsni malokꞌonichokolh ju Cristo acsni ixnitach chai acsni ulacha lactꞌiyan vanin junta vi ju yuchi.
21 Anch ulacalh ju Cristo ni palai xakꞌai navicanta ju yuchi.
Palai jantu tachi chun ju xaꞌanquilhnin lactꞌiyan ju talhinajun.
Jantu xamatiꞌ ju tꞌajun ju chavai ju ixtꞌachunch cava nin lai caꞌalilh astan xamatiꞌ ju ixtꞌachunch cajunaꞌ.
22 Chai ju Dios yuchi lhiꞌula ni yuchi ju calhinonkꞌoyach tachi chun ju taxtokni.
Chai lhilhcaꞌula ju yuchi tachi saꞌaktsulh tachi chun ju talhilacaꞌanta ju Cristo.
23 Pus tachi chun ju talhilacaꞌanta ju Cristo tachi ixlacatuna tajunita ni yuchi ju alhijuni chai laꞌixmacni yuchi va lakatam tatꞌajunita.
Chai ju Cristo vi mas vanta anchach cava.