JU ALHIQUI JU ATSꞌOKNUNICALH JU AMACHAKꞌAN GALACIA
Ju Pablo amacꞌami ju amachakꞌan Galacia
1
Ju quitꞌin icPablo.
Ixtamalakachan Jesús icjunita.
Jantu quintꞌalapanacni ju quintamalakachatachilh nin pumatam quintꞌalapanac ju quisacxtuta ni ixtamalakachan Jesús acva.
Alai yuꞌunch ju Jesucristo chai quimpaiꞌan Dios ju quintamalakachatachilh.
Yuchi ju Dios ju malokꞌonichokolh ju Jesús laꞌixꞌaninti.
2 Pus ju quitꞌin chai tachi chun ju lhiꞌalakꞌavin ju quintatꞌavi iclamacꞌamiyau tachi chun ju uxijnan ju lhilacꞌapꞌinatꞌit ju Jesús ju vilhchitꞌit ju xalacatꞌun Galacia.
3 Icꞌatapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
4 Pus ju Jesucristo tamakꞌaxtakchokolh isꞌakstu ixlacata quiꞌalactuꞌuntiꞌan.
Chai chunch ju lalh ni laich aquintamakꞌalhtaxtuyan ju ani lacamunutpaꞌ junta na lhu alin ju alactuꞌunti.
Chai chunch ju lalh ju Jesús ni chunch ju ixlacasqꞌuinta ju quimpaiꞌan Dios.
5 Chach lakꞌayacalhch ju yuchi tus va tavananch.
Vasalh iclacasqꞌuin ni chunch ju caꞌulhtucalh.
Matiꞌ atumpa ju lai aquintamakꞌalhtaxtun
6 Na iclhamakꞌaninin ni vatsꞌalhti xamacꞌonatꞌit ju Dios.
Laich xalacꞌaꞌiyatꞌit atumpa chivinti chai nonatꞌit ni amakꞌalhtꞌaxtꞌucꞌanaꞌitꞌit ni alacꞌaꞌiyaꞌitꞌit ju chunch.
Laich chunch xalayatꞌit mas tasacxtutan ju Dios va ixlacaꞌatalh ni tanavinitan kꞌai lamapainin ju Cristo.
7 Para jantu vasalh ni caꞌalilh tuꞌuꞌ atumpa chivinti ju aquintajunan ta yu laich catakꞌalhtaxtu.
Va yuchi ni taꞌalin ju lapanacni ju talakꞌalhiniputunan ju miꞌatalacpastꞌacꞌatꞌan.
Ju yuꞌunch va tamapaxaputun ju ixchivinti Dios ixlacata ju Cristo.
8 Para ju Dios caxcayaꞌ va tichi cavalhch ju laich catajunan atumpa chivinti junta tajunan ni alin atumpa ju apꞌutꞌakꞌalhtꞌaxtꞌuyaꞌitꞌit.
Jantiyuꞌ tachi ju iclajuntauch ju quitꞌin.
Pus ni caꞌalilh tam xamatiꞌ ju chunch calalh pus ju Dios caxcailh.
Mas quitꞌin cava u mas camincha lactꞌiyan pumatam anquilh ju chunch catajunin.
9 Pus ju chavai aclajunchokoyau aktam tachi ju xaclajunau makꞌanchich.
Ni xamatiꞌ catajunan atumpa chivinti ni jantiyuꞌ tachi ju aktsꞌiya lacꞌaꞌitꞌatꞌit pus ju Dios caxcayaꞌ.
10 Pus ni icnajun ju chunch pus lana tasui ni iclacasqꞌuin ni yuchi ju Dios ju kꞌox aquilhiula.
Jantiyuꞌ ni va kꞌox aquintalhiula ju quintꞌalapanacni.
Chai putasui ni jantiyuꞌ ju quintꞌalapanacni ju icꞌanaviniputun ixkꞌachatꞌan.
Pus ni va acꞌanavinilh cava ju ixkꞌachatꞌan ju quintꞌalapanacni pus jantu ixlapanac ju Cristo acva.
Chani ju pujunlh ixtamalakachan Jesús ju Pablo
11 Pus ji quiꞌalakꞌavin iclacasqꞌuin ni acꞌatsꞌatꞌit ni jantu va ixchivinti ju va tam lapanac ju iclajuntauch acsni iclajuntau ta yu laich atꞌakꞌalhtꞌaxtꞌuyaꞌitꞌit.
12 Pus jantu xamatiꞌ tam quintꞌalapanacꞌan ju quijunilh ju anuꞌ chivinti.
Nin yuchi ni va tam lapanac cava ju quimalanilh.
Alai isꞌakstu ju Jesucristo ju quimavasalanilh ju anuꞌ chivinti.
13 Ju uxijnan kꞌasmatꞌatꞌit ta yu ixjunita ju quiꞌatsucunti ju makꞌanchich acsni xaclacaꞌi tachi ju talacaꞌi ju quintꞌaꞌisraelitanin.
Cꞌatsꞌayatꞌit ni slivasalh na xacꞌalhimakchapui ju ixtalhilacaꞌanta ju Cristo.
Tus xacnajunta ni xacꞌamaknikꞌo.
14 Chai palai xacmuctaxtui laꞌixꞌatalanintiꞌan ju quintꞌaꞌisraelitanin.
Palai jantu ju aliꞌin tsꞌalan ju quintꞌatsucunin ixtajunita.
Pus palai xacnaviputun tachi ju quintamalanitan ju quilacpaꞌitni quincꞌan.
Palai jantu ju aliꞌin.
15-16 Pus ju Dios quisacxtulh acsni tucaꞌ xactsucui.
Chai va ixlacata ni na kꞌai ju ixꞌamapaininti pus yuchi astan quilhilhcaꞌula ni ixtamalakachan acva.
Pus chilh avilhchan acsni lacasqꞌuilh ju Dios ni acmispalh ju istsꞌalh ni laich aclajunau ju uxijnan ju jantu israelitanin untꞌatꞌit ta yu laich atꞌakꞌalhtꞌaxtꞌuyaꞌitꞌit.
Pus ju acsnich lana jantu xamatiꞌ ju va quintꞌalapanac ju icsqꞌuinilh lamapainin ni aquijunilh ni kꞌox ju acnaviyaꞌ u jantu.
17 Nin yuchi ni acꞌalh ju lakꞌachakꞌan Jerusalén alaktsꞌiniꞌ ju yuꞌunch ju ixtamalakachan Jesús ixtajunita.
Jantu icꞌalactꞌachivinilh mas pꞌulhnan asacxtucalh ju yuꞌunch ni ixtamalakachan catava.
Astan ju quitꞌin.
Alai ictaxtulh ju lakꞌachakꞌan Damasco.
Chai icquitolhcha pantsꞌiquis ju xalacatꞌun Arabia.
Astan icminchokolh ju lakꞌachakꞌan Damasco.
18 Tus acsni taꞌaktsalh lakatꞌutu cꞌata acsnicaꞌ ju icquilalh ju lakꞌachakꞌan Jerusalén.
Va icꞌalh laktsꞌiniꞌ ju Pitaluꞌ juncan chai ictꞌatolhcha lakacauquis avilhchan.
19 Para jantu iclaktsꞌincha xamatiꞌ akꞌantam ixtamalakachan Jesús.
Va yuchi ju Jacobo ispꞌisekꞌe ju quiꞌucxtinꞌan Jesús.
20 Pus Dios cꞌatsai ni stavasalanti tachi chun ju ani ju iclaꞌatsꞌoknunitau.
Jantu va iclaꞌokxchokꞌoyau.
21 Pus ju astan icꞌampa ju xalacatꞌun ju Siria chai ju xalacatꞌun ju Cilicia.
22 Pus jantu xaquintamispai ju ixtalhilacaꞌanta ju Cristo ju ixtavilanancha ju xaꞌestado Judea.
23 Va yuchi ni ixtakꞌasmatꞌach ni icꞌajunilh ju lapanacni ju chavai ni catalhilacaꞌalh ju Jesús mas na xacmamactaputunch ju chunch chivinti ju makꞌanchich.
Mas na xacꞌalhimakchapui ju makꞌanchich ju ixtalhilacaꞌanta ju chunch.
24 Pus ni takꞌasmatlh ju chunch pus na ixtalakꞌayai ju Dios ni tam xajun ju quiꞌatsucunti.