Amacꞌaminin ju Pablo
13
Ju chavai ixlhipaktꞌutuch ju aclalakꞌantachauch.
Chai ju acsnich acꞌamucꞌaniyaꞌ ixtalakꞌalhinꞌan ju lapanacni para va acsni alin pumatꞌui u pumatꞌutu lapanacni ju vasalh talaktsꞌinta acsni tavanan taꞌalactuꞌunulh.
2 Tachi ju iclajuntau ixlacata ju yuꞌunch ju na ixtaꞌalactuꞌunun acsni xaclatꞌavilhchau ju ixlhipaktꞌui pus vana va chun ju iclajunchokopalau ju chavai mas jantu anch iclatꞌavilau.
Icꞌajunich ju yuꞌunch ju vanach na taꞌalactuꞌunun ni jantu xamatiꞌ ju sia yuꞌunch catakꞌalhtaxtuyaꞌ acsni tavanan aclalakꞌanchokotachau.
3 Chunch ju acnaviyaꞌ ni va quilapuxconiyau ta yu laich apꞌucꞌatsꞌayaꞌitꞌit ni vasalh ixchivinti Cristo ju iclajunau.
Jantu lai atꞌinaꞌuntꞌit ni jantu tamasunitan ju ixtachaput ju Cristo.
Ju yuchi na lhu tamasunitan ju ixtachaput lamilhiꞌuxijnan.
4 Ju Cristo acsni tavanan maquilhtacalh ju lacacurus va lhilakꞌaꞌilh ni catasu tachi ju va matich ju ixtachaput ixjunita.
Para ju chavai ju yuchi tꞌajun laꞌixtachaput ju Dios.
Pus vana va chun ju quitꞌin.
Ju uxijnan quilalaktsꞌinau tachi ju va matich ju quintachaput ju quitꞌin.
Para ni iclhilaksita ju yuchi pus alaktsꞌinaꞌitꞌit ni vasalh laꞌixtachaput ju Dios ju icchꞌalhcatnan acsni tavanan aclalakꞌantachau.
5 Alaktsꞌintꞌanuchꞌokꞌocꞌantꞌit miꞌakstuꞌan.
Acꞌatsꞌatꞌit ni vasalh lhilacꞌapꞌinatꞌit ju Cristo u jantu.
Ja va jantu cꞌatsꞌayatꞌit ni tꞌajun ju Jesucristo lamiꞌalhunutꞌan ni vasalh lhilacꞌapꞌinatꞌit ju yuchi.
Para ni jantu pus jantu tꞌajun ju yuchi lamiꞌalhunutꞌan.
6 Pus mas cꞌatsꞌayatꞌit ni lhilacꞌapꞌinatꞌit ju Cristo u jantu para iclacasqꞌuin ni acꞌatsꞌatꞌit ni vasalh ixtamalakachan ju Cristo ju quitꞌin.
7 Ju quitꞌin ictapainini ju Dios ni jantu anavitꞌit tuꞌuꞌ macxcai.
Para jantu icpunajun chunch ni acpulakꞌayacalh quiꞌakstu.
Alinch ju quintachaput ni laich aclalakꞌakꞌaimayau ni alactꞌuꞌununatꞌit.
Para palai kꞌox cava ni sok atsꞌucꞌuyaꞌitꞌit mas aquilalaktsꞌinau ju quitꞌin tachi ju va matich ju quintachaput ni matiꞌ tuꞌuꞌ ju lai aclalhilakꞌakꞌaimau.
8 Pus ju quitꞌin va yuchi ju kꞌox ju aclanaviniyau ni naviyatꞌit tachi ju najun laꞌixchivinti Dios.
Chai ju yuchi stavasalanti.
Va acsnich ju lai aclalakꞌakꞌaimayau ni va jantu anavitꞌit tachi ju najun ju anch.
9 Na iclhikꞌachan acsni tasui lamiꞌatsucuntiꞌan ni ixlhichux ju miꞌalhunutꞌan ju lhilacꞌapꞌinatꞌit ju Cristo mas lai aquilalaktsꞌinau ju chunch tachi ju va matich ju quintachaput laꞌixmacni Cristo ni jantu tuꞌuꞌ alin ju lai aclalhilakꞌakꞌaimayau.
Chai vachuꞌ ictapainini ju Dios ni lana soknicꞌa cajunaꞌ ju miꞌatsucuntiꞌan.
10 Pus ni jantu anch iclatꞌavilau pus va iclaꞌatsꞌoknuniyau ju ani chivinti.
Ju chunch acsni tavanan aclalaktsꞌintachau ta tsꞌa jantu lakꞌoxikꞌotꞌatꞌit ju lhamakꞌan chai jantu catasqꞌuiniyaꞌ ni aclalakꞌakꞌaimayau.
Jantu catasqꞌuiniyaꞌ ni aclamalacasuniyau ju tachaput ju quixtaknita ju quiꞌucxtin Jesús.
Para ju yuchi quixtaknilh ju quintachaput ni laich aclaꞌaktaijuyau.
Jantiyuꞌ ni va aclalakꞌalhiniyau ju miꞌatsucuntiꞌan.
11 Pus va yuchi ju ani iclajumputunau ji quiꞌalakꞌavin.
Alakꞌoxitꞌit ju lhamakꞌan ju alin lamilhiꞌuxijnanꞌan.
Alamapꞌaksitꞌit.
Va lakatam aꞌuntꞌit.
Jantu va alaclakꞌaꞌitꞌit.
Ju chunch ju Dios catatꞌatolanch.
Yuchach ju cataꞌaktaijuyan ni alamapꞌainiyaꞌitꞌit chai ni jantu alalakꞌaꞌitꞌit.
12 Alamacꞌamitꞌitch pumatamin pumatamin.
Va kꞌoxich alamacꞌamitꞌit tachi ju lhijunch ni lhiꞌalakꞌavin untꞌatꞌit.
13 Tachi chun ju lapanacni ju ani tavilanalh ju talhilacaꞌanta ju Cristo tamacꞌamiyan.
14 Ictapainini ju quiꞌucxtinꞌan Jesucristo ni va tachi catanaviniyan lamapainin.
Chai ictapainini ju quimpaiꞌan Dios ni catamasuniyan ju ixꞌamapaininti.
Chai ictapainini ju Spiritu Santu ni na miꞌamigoꞌan cajunaꞌ.
Vasalh chunch ictapainini.