JU PꞌULHNAN ALHIQUI JU ATSꞌOKNUNICALH JU AMACHAKꞌAN CORINTO
Ju Pablo amacꞌami ju amachakꞌan Corinto
1
Ju quitꞌin icPablo.
Pus ju Dios naulh ni ixtamalakachan acva ju Jesucristo.
Chai yuchi ju quilhitꞌasanilh laꞌixlhichꞌalhcat.
Pus ju quitꞌin chai pumatam ju quilhilakꞌau ju Sóstenes juncan iclaꞌatsꞌoknuniyau ju ani alhiqui.
2 Va iclamacꞌamiyau ju uxijnan ju vilhchitꞌit ju lakꞌachakꞌan Corinto ju lhilacꞌapꞌinatꞌit ju Cristo.
Pus ju Cristo Jesús taxacanitan ju miꞌalhunutꞌan acsni lhilacꞌapꞌitꞌit ju yuchi.
Chai Dios ju tasacxtun ni ixlapanacni aꞌunaꞌitꞌit.
Vachuꞌ icꞌamacꞌamiyau tachi chun ju talhilacaꞌantach ju Jesucristo mas vanta anchach catatolhcha.
Ju Jesucristo vachuꞌ kꞌai ixꞌucxtinꞌan junita ju yuꞌunch tachi ju quijnanꞌan.
3 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
Na lhu quintanavinitan lamapainin ju Cristo ni lhilacaꞌanau ju yuchi
4 Va tachi icjuni lakꞌailaktsꞌiuch ju quimpaiꞌan Dios ju milacataꞌan ni xatanaviniyan lamapainin acsni tavanan lhilacꞌapꞌitꞌit ju Jesucristo.
5 Chai ni lhilacꞌapꞌinatꞌit ju Cristo pus Dios taxtaknitan ju miꞌatsucuntiꞌan ju palai kꞌox.
Ju chavai na lai mavasalayatꞌit ju ixchivinti Dios.
Chai na lai machꞌakxayatꞌit.
6 Chai ni tam xajun ju miꞌatsucuntiꞌan pus putasui ni stavasalanti ju chivinti ju icnonau ixlacata ju Jesús.
7 Chai ni xatanaviniyan lamapainin ju Dios pus jantu tuꞌuꞌ tamakꞌancꞌacxniyan tachi chun ju lhakꞌailaktsꞌin ju xtꞌakꞌa ju Dios.
Chai pꞌacxantꞌayatꞌitcaꞌ ju quiꞌucxtinꞌan Jesucristo tus acsni caminaꞌ.
8 Pus Dios ju cataxtakniyan vachuꞌ ju mintachaputꞌan ni laich alhilacꞌapꞌinkꞌalhiyaꞌitꞌit ju Cristo tus laꞌixꞌaclanti ju miꞌatsucuntiꞌan.
Ju chunch jantuch lai aꞌulanicꞌanaꞌitꞌit ju mintalakꞌalhinꞌan acsni tavanan caminchokoyaꞌ ju Jesucristo.
9 Ju Dios muctaxtui ju ixchivinti.
Chai yuchach ju tatꞌasanitan ni kꞌox ixꞌamigojnich aꞌunaꞌitꞌit ju Jesucristo.
Ju yuchi istsꞌalh Dios junita chai vachuꞌ quiꞌucxtinꞌan junita.
Alin ju lakꞌaiti sia yuꞌunch ju talhilacaꞌanta ju Jesús
10 Pus iclatapaininiyau ji quiꞌalakꞌavin ni vachuꞌ lhilacꞌapꞌinatꞌit ju quiꞌucxtinꞌan Jesucristo.
Pus tachi minchuxꞌan va lakatamch aꞌuntꞌit.
Jantu quilhmactꞌui quilhmactꞌutu aꞌuntꞌit.
Va chꞌanxtam aꞌuntꞌit ju lamintacꞌatsanꞌan.
Chai va lakatamch taxtokni ju alhilaksitꞌit.
11 Iclapujunau chunch ji quiꞌalakꞌavin ni quintajunilh ju tavilanancha laꞌixchakaꞌ ju Cloé ni va laclakꞌaꞌitꞌit ju uxijnan.
12 Ju aliꞌin lamilhiꞌuxijnan ma tanajun ni quintachꞌakꞌokꞌai ju quitꞌin.
Chai ju aliꞌin ma tanajun ni yuchi ju Apolos ju tachꞌakꞌokꞌai.
Chai ju aliꞌin ma tanajun ni ma yuchi ju Pitaluꞌ ju tachꞌakꞌokꞌai.
Chai ju aliꞌin ma tanajun ni yuchi ju Cristo ju tachꞌakꞌokꞌai.
13 Para ja na va pumalhu alin ju Cristo.
Ja quitꞌin ju xacmaquilhtacanta ju lacacurus ixlacata ju mintalakꞌalhinꞌan.
Ja laquintapakaꞌut ju lhimakpꞌaxacꞌantꞌatꞌit.
14 Icxtakni lakꞌailaktsꞌiuch ju Dios ni jantu xamatiꞌ ju uxijnan ju icmakpaxata.
Va yuchi ju juncan Crispo chai ju juncan Gayo.
15 Ju chunch jantu lai xamatiꞌ canonaꞌ ni makpꞌaxacꞌantꞌatꞌit laquintapakaꞌut.
16 Chai vachuꞌ icꞌamakpaxata ju yuꞌunch ju ixtatanumanalh laꞌixchakaꞌ ju Estéfanas.
Para jantu icpastꞌacꞌa ni caꞌalilh apumatam ju acmakpaxa.
17 Jantiyuꞌ ju quilhimalakachatachilh ju Cristo ni va acꞌamakpaxanalh.
Ju yuchi quimalakachatachilh ni acmasu ju chivinti junta najun ta yu laich takꞌalhtaxtucan.
Para ma jantu acnaulh laca tuꞌuꞌ cꞌusi chivinti tachi ju tachivinin ju atalaninin.
Ma va vas acnaulh ni nilh ju Cristo ju quilacataꞌan.
Ju chunch cacꞌatsacanach ni na tachapun ju ani chivinti chai va yuchi ju lai amakꞌalhtaxtunun.
Yuchi ju Cristo ju pacxanta ixtachaput chai ixtacꞌatsan ju Dios
18 Pus ju quijnan icꞌajuniu ju lapanacni ni quinichilh ju Cristo ju quilacataꞌan.
Para ju lapanacni ju aktsꞌiya catatsꞌankꞌakꞌalhiyaꞌ ni jantu talhilacaꞌamputun ju Cristo pus tanajun ni va lhilakachapuꞌ ju anuꞌ chivinti.
Para ju quijnanꞌan ju takꞌalhtaxtutauch cꞌatsayau ni va yuchach ju chivinti ju tachapun ni va yuchi ju lai aquintamakꞌalhtaxtuyan.
19 Chunch iclapujunau ni jantu lhitapalai ni va kꞌaya aclhilaksi ju va ixꞌatalaninti ju va lapanac ni chani ma najun ju Dios junta tsꞌokcanta ju ixchivinti:
Ju yuchi ma calakꞌalhiniyaꞌ ju ixchivintiꞌan ju lapanacni ju tanajun ni na atalaninin tajunita.
Chai ma jantu tuꞌuꞌ ixtapalhni canaviniyaꞌ ixꞌatalacpastꞌacꞌatꞌan ju yuꞌunch.
Chunch ma najun junta tsꞌokcanta ju ixchivinti.
20 Pus ju chavai tas anchach ju alin ju lapanacni ju laich tanajun ni na taꞌacꞌatsananta.
Tas anchach ju alin ju laich tanajun ni na tamispaich ju ixlhamapꞌaksin ju Moisés.
Tas anchach ju alin ju laich tanajun ni tacꞌatsai tamalhch ju stavasalanti chai tamalhch ju jantu.
Pus matiꞌ ju lapanacni ju vasalh chunch tajunita ni Dios ju malacasuta ni jantu lhitapalai ju xaꞌatalaninti ju va lhilapanac.
21 Ju Dios cꞌatsai tuchi ju navi.
Chai ju yuchi jantu lacasqꞌuilh ni va laꞌixꞌatalanintiꞌan isꞌakstuꞌan lai catalhilacaꞌalh ju yuchi ju lapanacni.
Alai na kꞌox xalhiulai ju Dios ni catatakꞌalhtaxtulh tachi chun ju takꞌasmatꞌa ju ixchivinti chai talhilacaꞌanta ju Cristo.
Ju yuꞌunch talacaꞌich ju anuꞌ chivinti mas tanajun ju aliꞌin ni va lakachapu chivinti.
22 Ju quintꞌaꞌisraelitanin tanajun ni va lakachapu chivinti ju chunch.
Chai chunch tapunajun ni na pꞌas tasqꞌuini ju Dios ju tuꞌuꞌ ju laich catalaktsꞌilh chai catapucꞌatsa ju stavasalanti.
Chai vana va chun nonatꞌit ju uxijnan ju jantu israelitanin untꞌatꞌit.
Chai ju uxijnan pꞌunonatꞌit chunch ni jantu lai lacꞌaꞌiyatꞌit tuꞌuꞌ ju jantu lai machꞌakxayatꞌit.
23 Para ju quijnan icꞌajunau ju lapanacni ni ixmaquilhtacanta ju Cristo ixlacataꞌan.
Pus ju quintꞌaꞌisraelitanin tanajun ni lana jantu kꞌox ju ani chivinti.
Chai ju uxijnan ju jantu israelitanin untꞌatꞌit va lhitsꞌiꞌinatꞌit.
24 Para tachi chun ju asacxtuta ju Dios u quintꞌaꞌisraelitanin u jantu si tamachakxakꞌojui ni yuchach ju Cristo ju pacxanta ixtachaput ju Dios chai ixtacꞌatsan.
25 Pus ju tasui tachi ju va ixlakachaput Dios yuchi ju palai kꞌox atalaninti.
Palai jantu ju va xaꞌatalaninti lhilapanac.
Chai junta tasui tachi ju va jantu tachapun ju Dios anchach ju palai alin ixtachaput.
Jantu chun tachi ju ixtachaput ju va lhilapanac.
26 Pus alaktsꞌintꞌitch ji quiꞌalakꞌavin.
Tachi chun ju uxijnan ju tasacxtutan ju Dios na lacatsꞌunin ju lamilhiꞌuxijnan ju lai catanaulh ju lapanacni ni atalaninin untꞌatꞌit.
Na lacatsꞌunin ju lamilhiꞌuxijnan ju lai cajunicalh ni xalackꞌajin untꞌatꞌit laꞌixꞌucxlacapuꞌan ju mintꞌalapanacni.
Na lacatsꞌunin ju lamilhiꞌuxijnan ju laich calhimispacalh ni jantu va xamatiꞌ ju mimpaiꞌan.
27 Alai yuꞌunch ju asacxtulh ju Dios ju alhimispacan tachi ju va tonto lapanacni.
Yuchi alhisacxtulh ju yuꞌunch ni va apumamaxani ju xaꞌatalaninin ju ani lacamunutpaꞌ.
Chai yuꞌunch ju asacxtulh ju Dios ju jantu tuꞌuꞌ ixtapalhniꞌan ixꞌalhiulacan laꞌixmacniꞌan ju ixtꞌalapanacni.
Chunch ju lalh ni camamaxanilh ju na xalackꞌajin tajunita.
28 Chai ju Dios asacxtulh ju yuꞌunch ju jantu xalackꞌajin ju ani lacamunutpaꞌ chai ju jantu tuꞌuꞌ alhiulacanta chai ju lana jantu ixꞌalaktsꞌimputuncan.
Chai alhisacxtulh ju yuꞌunch ni caputasuyaꞌ ni jantu lhitapalai ni na kꞌai accꞌatsa.
29 Chai ju chunch jantu lai xamatiꞌ kꞌai cacꞌatsa laꞌixmacni Dios.
30 Isꞌakstu ju Dios xatanaviyan ni va lakatam tꞌaꞌuntꞌatꞌit ju Cristo Jesús.
Chai ni va xaquintamasuniputunan ju kꞌai ixtacꞌatsan ju Dios pus yuchi lhimalakachatachilh ju Jesús ju ani.
Ju chunch lai salaka jun ju quiꞌatsucuntiꞌan laꞌixmacni yuchi chai lai aquintachakꞌaniyan ju quiꞌalhunutꞌan chai lai quintamalakxtuyan laꞌixꞌacꞌalhni.
31 Chunch ju navilh ju Dios ni caꞌuctaxtulh tachi ju najun junta tsꞌokcanta junta chani najun:
“Ni xamatiꞌ lhitakꞌayaputun tuꞌuꞌ pus ma alai chach lakꞌaya ju Dios”.