Ju chivinti ju najun ni nilh ju Cristo
2
Pus ji quiꞌalakꞌavin acsni iclaquilakquilachau ju uxijnan xaclajunau ju ixchivinti Dios.
Para jantu xaclajunau laca tuꞌuꞌ cꞌusi chivinti nin laꞌixꞌatalaninti ju va lhilapanac.
2 Chunch xaclai ni xacnajunta ni lana jantu tuꞌuꞌ atumpa ju aclajunau ju uxijnan.
Va yuchi ni aclajunau ni tamaquilhtalh lacacurus ju Jesucristo ju quilacataꞌan.
3 Chai acsni xaclatꞌavilau ju uxijnan lana jantu xaclhilaksichokocan quiꞌakstu.
Alai na xactalhanan chai na xacꞌaxqꞌuipꞌipꞌitnin.
4 Chai acsni xaclajunau tuꞌuꞌ chai acsni xaclamasuniyau tuꞌuꞌ jantu tavanan xaclamalacaꞌiniputunau laca tuꞌuꞌ cꞌus chivinti tachi ju ixchivinti tam atalaniniꞌ.
Alai istasui ixtachaput ju Dios laquinchivinti chai yuchi ju Spiritu Santu ju xaquiꞌaktaijui.
5 Ju chunch jantu va ixlacata ixꞌatalaninti tam lapanac ju alacꞌaꞌiyaꞌitꞌit.
Alai alacꞌaꞌiyaꞌitꞌit ixchivinti Dios ni alaktsꞌinaꞌitꞌit ixtachaput ju Dios.
Yuchi ju Spiritu Santu ju quintamamachakxaniyan ixchivinti Dios
6 Pus ju vasalh talhilacaꞌanta ju Cristo icꞌajunau ju vasalh atalaninti.
Para jantiyuꞌ ju ixꞌatalaninti ju va lhilapanac.
Nin ixꞌanuꞌan cava ju xalackꞌajin ju ani lacamunutpaꞌ.
Pus cachinaꞌ avilhchan acsni jantu vana xalackꞌajin catajunaꞌ chai cacapcanaꞌ ju ixchivintiꞌan ju ixtanajun.
7 Pus ju chivinti ju icnajun yuchi ju kꞌox ixꞌatalacpastꞌacꞌat ju Dios junta najun ni aquintaxtakniyan ju quiꞌatsucuntiꞌan ju jonkꞌalhita.
Chunch ispastacta ju Dios mas tucaꞌ ixnavican ju lacamunutpaꞌ.
Para jantu sai amavasalanicalh ju lapanacni.
8 Para ju xalackꞌajin ju ani lacamunutpaꞌ jantu tamachakxai ju anuꞌ ju ispastacta ju Dios.
Ni caꞌixtamachakxa pus jantu tavanan ixtamaquilhta lacacurus ju slivasalh cꞌus lapanac junita.
Yuchi ju Jesús.
9 Pus icnajun tachi ju tsꞌokcanta junta chani najun:
Ju Dios ma lakꞌoxita ju tuꞌuꞌ ju slivasalh kꞌox ixlacataꞌan ju tamapaini ju yuchi.
Ju va tam lapanac ma jantu tavanan laktsꞌinta tuꞌuꞌ ju ixtꞌachunch cava nin cakꞌasmatlh nin capastaclh ni caꞌalilh ju tuꞌuꞌ ju chunch.
Chunch ju najun junta tsꞌokcanta.
10 Para ju Dios quintaxtaknitan ju Spiritu Santu chai yuchach ju quintamamachakxaniyan ju ani taxtokni.
Pus ju Spiritu Santu mispakꞌojui tachi chun ju taxtokni.
Mispakꞌojui chux ju ixꞌatalacpastꞌacꞌat ju Dios.
11 Jantu xamatiꞌ lai cꞌatsani tuchi pastꞌacꞌach ju akꞌantam lapanac.
Va isꞌakstu ju lapanac cꞌatsai tuchi ju pastꞌacꞌa laꞌixꞌalhunut.
Pus vana va chunch jantu lai xamatiꞌ cꞌatsani ju ixꞌatalacpastꞌacꞌat ju Dios.
Va yuchi ju Spiritu Santu.
12 Pus ju quijnanꞌan jantiyuꞌ ju xaꞌatalaninti va lhilapanac ju pumachakxayau ju ixtaxtokni Dios.
Para ju Dios quintaxtaknitan ju Spiritu Santu chai yuchach ju quintamamachakxaniyan ju tuchi quintalhikꞌailaktsꞌintan ju Dios.
13 Chai ju tuchi quintamamachakxaniyan ju Spiritu Santu pus yuchach ju icnonau.
Jantiyuꞌ ju icnonau ju iclanitau ju va laquiꞌakstu quincꞌan.
Pus acsni iclajunau ju ixtaxtokni Dios ju uxijnan ju pꞌacxantꞌatꞌit ju Spiritu Santu lamiꞌalhunutꞌan pus va yuchi iclajunau ju quintamamachakxanitanch ju Spiritu Santu.
14 Pus ju tam lapanac ju jantucaꞌ lhilacaꞌanta ju Jesús jantu lacaꞌiputun ju ixchivinti ju Spiritu Santu.
Ju yuchi va lakachapu chivinti lhiulai.
Chai jantucaꞌ lai catimachakxa ju yuchi ni va yuchi ju Spiritu Santu ju amamachakxaninin ju ixtaxtokni Dios.
15 Para ju tam lapanac ju pacxanta ju Spiritu Santu laꞌixꞌalhunut laich machakxai ixchivinti Dios chai lai sacxtui ju kꞌox ju canavi.
Chai ju jantucaꞌ lhilacaꞌanta ju Cristo jantu lai machakxani ju isꞌatsucunti ju ixtꞌalapanac ju lhilacaꞌanta ju Cristo.
16 Pus chani ju tsꞌokcanta laꞌixchivinti Dios:
“Tis chavaich ju lai camachakxanilh ju ixꞌatalacpastꞌacꞌat ju Dios ni laich canaulh ni camalaniyaꞌ tuꞌuꞌ ju yuchi”.
Chunch ju najun laꞌixchivinti Dios.
Para ju quijnanꞌan ju pacxantauch ju Spiritu Santu machakxayau ju ixꞌatalacpastꞌacꞌat ju Cristo.