2 Aktsꞌiya makꞌanchich ixnajunta ju Dios ni caꞌalinaꞌ ju chunch chivinti.

Chai ju makꞌaniya ixlapanacni Dios vachuꞌ ixtanajun tichi chavaich ju Jesús acsni amaꞌatsꞌoknuni ju Dios ju ixchivinti.

3 Pus ju anuꞌ atsꞌoknut ixnajun ixlacata ju quiꞌucxtinꞌan Jesucristo.

Istsꞌalh Dios.

Ju yuchi quitsucuchilh tachi tam lapanac ju ani lacamunutpaꞌ.

Chai mas na makꞌanch istsucuta ju David acsni tavanan tsuculh ju Jesucristo para ju yuchi makꞌaniya ixpapanti ixjunita ju David.

4 Para vachuꞌ istsꞌalh Dios junita.

Chai na salaka ju istacꞌatsan.

Chai ju putasulh ni vasalh chunch junita yuchi ni lacakꞌai tachaput ju taꞌacxtuchokolh junta ixꞌacnui.

5 Pus yuchi ju Jesús ju quinavinilh lamapainin ni quimakꞌalhtaxtulh chai quimalakachalh ni acꞌajunilh ju lapanacni ju jantu israelitanin ixlacata ju Jesús.

Ju chunch ixlhilacaputsꞌun ju lacamunutpaꞌ caꞌalinaꞌ ju jantu israelitanin ju catalhilacaꞌanach ju Jesús chai catalacaꞌiyach ju ixchivinti.

6 Pus ju uxijnan ju vilhchitꞌit ju lakꞌachakꞌan Roma vachuꞌ makyuꞌunch untꞌatꞌit.

Vachuꞌ lhisacxtꞌucꞌantꞌatꞌit ni ixlapanacnich Jesucristo aꞌunaꞌitꞌit.

7 Pus iclamacꞌamiyau tachi chun ju uxijnan ju vilhchitꞌit ju lakꞌachakꞌan Roma ju tamapainiyan ju Dios chai ju lhisacxtꞌucꞌantꞌatꞌit ni ixlapanacni Dios aꞌunaꞌitꞌit.

Va iclacasqꞌuin ni catanaviniyanch lamapainin ju quimpaiꞌan Dios chai ju quiꞌucxtinꞌan Jesucristo.

Chai cataꞌaktaijuyanch ni jantu calacꞌalh ju miꞌalhunutꞌan.

8 Pꞌulhnan iclajumputunau ni icxtakni lakꞌailaktsꞌiuch ju quiDiosꞌan ju milacataꞌan minchuxꞌan.

Para yuchi ju Cristo ju tucan juni ju Dios ju tuchi xacjumputun.

Pus icxtakni lakꞌailaktsꞌiuch ju Dios ni cꞌatsakꞌocanch vanta anchach cava ni lhilacꞌapꞌintꞌatꞌitch ju Jesús.

9 Ju quitꞌin icchꞌalhcatnani ju Dios ixlhichux quiꞌalhunut acsni icꞌajuni ju lapanacni ixlacata ju istsꞌalh ju Jesucristo juncan.

Chai ju yuchi kꞌoxich cꞌatsai ni jantu tavanan ju jantu aclapastacvi ju uxijnan acsni ictꞌachivininch ju Dios.

10 Ictapainini ju Dios tsꞌa ma kꞌoxich calhiula ju yuchi ni aclaꞌanchau laktsꞌinin ju chavai.

Na makꞌanchich ju icpastacta ni aclalakꞌantachauch.

11 Va laich soko acꞌancha junta vilhchitꞌit ni laich aclajunau ju tuchi quimasunita ju Spiritu Santu.

Ju chunch laich palai alhilacꞌapꞌinaꞌitꞌit ju Jesús.

12 Pus acsni icnajun ju chunch va iclajumputunau ni aktsꞌiya calaꞌaktaijuyau.

Pus ju uxijnan palai alhilacꞌapꞌinaꞌitꞌit ju Jesús acsni alaktsꞌinaꞌitꞌit ni iclhilacaꞌanch ju Jesucristo ixlhichux ju quiꞌalhunut.

Chai ju quitꞌin vachuꞌ palai aclhilacaꞌanaꞌ ju Jesús acsni aclaktsꞌinach ni lhilacꞌapꞌinatꞌit ju Jesucristo ixlhichux miꞌalhunutꞌan vachuꞌ.

13 Pus iclacasqꞌuin ji quiꞌalakꞌavin ni acꞌatsꞌatꞌit ni na paklhu ju xaclalakꞌamputunachau ju uxijnan.

Para tus chavai jantucaꞌ lai iclalakꞌantachau.

Pus va icꞌamputunacha junta vilhchitꞌit ni lai acꞌamalacaꞌini ixchivinti Dios ju aliꞌin mintꞌaꞌamachakꞌan.

Ju yuꞌunch vachuꞌ catalacaꞌiyaꞌ ixchivinti Dios tachi ju talacaꞌita ju aliꞌin ju vachuꞌ jantu israelitanin tajunita.

14 Aktsꞌiya tasqꞌuini ni acꞌajunilh ixchivinti Dios ju amachakꞌan lackꞌai lakꞌachakꞌanixni chaich ju amachakꞌan lactꞌicstꞌi lakꞌachakꞌanixni.

Acꞌajunilh ixchivinti Dios ju atalanininch chai ju jantu atalaninin.

15 Pus yuchi ixlhichux quiꞌalhunut iclhiꞌamputunacha ni laich acꞌajunilh ju mintꞌaꞌamachakꞌan tichi chavaich ju Jesús.

16 Ju quitꞌin jantu ictꞌamaxanan ju chivinti junta najun tichi chavaich ju Jesús.

Pus va tichi chavaich ju lacaꞌini ju ixchivinti Dios pus ju Dios malacasuni ju ixtachaput acsni makꞌalhtaxtui ni jantu catiꞌalh ju lacajipi.

Pus ju tucan amakꞌalhtaxtuputun ju Dios quijnanꞌan ju israelitanin juntau.

Para vachuꞌ amakꞌalhtaxtuputun ju jantu israelitanin.

17 Pus laꞌixchivinti Dios najun tichi chavaich ju Jesús.

Chai anchach ju machakxacan ni salaka alaktsꞌin ixꞌalhunutꞌan ju lapanacni ju Dios va acsni ixlhichux ixꞌalhunutꞌan ju talhilacaꞌanta ju Jesús.

Tachi ju tsꞌokcanta junta chani najun:

“Ju Dios ma najun ni ma yuchi ju caꞌalinaꞌ ju isꞌatsucunti ju conkꞌalhiyanta lactꞌiyan ju lhilacaꞌanta ju Jesús chai ixlhiyuchi salaka laktsꞌin ixꞌalhunut ju Dios”.

Ma chunch ju najun ju Dios.

18 Pus ju Dios vilhcha talaclhman para cꞌatsayau ni caꞌamamakꞌalhkꞌajniyaꞌ tachi chun ju jantuch tuꞌuꞌ talhiulai ju Dios chai tachi chun ju na taꞌalactuꞌunun chai va ixlacata ixꞌalactuꞌuntiꞌan tasastꞌucꞌa ju aliꞌin ju tamispaputun ju ixchivinti Dios.

Chai ju yuchi stavasalanti.

19 Pus caꞌamamakꞌalhkꞌajnicanaꞌ ni chunch talai mas lana vas amalacasunicanta ju lapanacni ju tuchi laich mispacan ixlacata ju Dios.

Vas amalacasunicanta ni isꞌakstu ju Dios ju amalacasunilh.

20 Tus laꞌixputaiꞌulacan ju lacamunutpaꞌ cꞌatsacan ta yu junita ju Dios mas jantu lai laktsꞌincan.

Pucꞌatsacan ta yu junita ju Dios ju tuchi navita.

Tasui ju ixtachaput ni jonkꞌalhitach.

Chai tasuich ju ixlhiDios.

Pus ixlhiyuchi ju lapanacni jantu lai tanajun ni jantu tamispai ta yu junita ju Dios.

21 Para mas tacꞌatsai ni chunch junita ju Dios para ixlaquilhtu jantu tavanan tajuni ni yuchi ju xakꞌai.

Nin catajunilh lakꞌailaktsꞌiuch.

Alai va yuchi ju talhipastꞌacꞌa ju taxtokni ju jantu lhitapalai.

Chai ni na va pꞌas ju ixꞌalhunutꞌan pus jantu lai tamachakxai ju ixtaxtokni Dios.

22 Ju yuꞌunch tanajunch ni na taꞌamispanan.

Para alai va tontojni talhixajtacha.

23 Jantu tanajun ni yuchi ju xakꞌai ju Dios ju jantu lai ni.

Alai va isꞌakstuꞌan taxapalaxtuchokoi ju isdiosꞌan tachi ju va tam ixtꞌalapanacꞌan ju lai ni.

Chai tachi ju tuꞌuꞌ tsꞌokꞌo.

Chai tachi ju tuꞌuꞌ atapacxat.

Chai tachi ju tuꞌuꞌ lu.

24 Chai ni chunch ju tanavi ju lapanacni pus yuchi alhimaconilh ju Dios ni catanavilhch ju macxcai.

Catanavi va tuchi macxcai ju catapastꞌacꞌaꞌ laꞌixꞌalhunutꞌan.

Pus yuchi na kꞌai talakꞌalhin talalhinavinich laꞌixlacatunaꞌan isꞌakstuꞌan ju lapanacni.

25 Ju yuꞌunch lana tamacajun ju istavasalanti Dios.

Talacaꞌi ju taꞌaklhtamat.

Pus ju tucan Dios yuchi ju anavikꞌo tachi chun ju taxtokni.

Para jantiyuꞌ ju talakꞌayai.

Alai va yuchach ju talakꞌayai chai tachꞌalhcatnani ju taxtokni ju navita ju Dios.

Para ju stavasalanti tasqꞌuini ni Dios ju cajunicalh ni yuchi ju xakꞌai tus va tavananch.

Chai iclacasqꞌuin ni vasalh chunchach canavicalh.

26 Pus ju lapanacni ni jantu talakꞌayai ju tucan Dios pus yuchi alhimaconilh ju Dios ni catanavi ju macxcai laꞌisꞌatsucuntiꞌan.

Mas yuꞌunch ju chakolun na macxcai tanavi.

Ju aliꞌin tamapaxai ju isꞌatsucuntiꞌan.

Jantu tatꞌatsucui ju tam jokꞌat.

Va laꞌixlhiꞌakstuꞌan talalactuꞌuchokoi.

27 Chai vana va chunch talai ju aliꞌin jokꞌatni.

Jantu tatꞌatsucuputun ju tam atsiꞌ.

Va ixtꞌajokꞌat ju tꞌalalactuꞌui chai lana jantu tamaxanan.

Chai laꞌixlacatunaꞌan isꞌakstuchꞌan tamakꞌalhkꞌajnanchokoi.

Pus lhijunch ni tamakꞌalhkꞌajnan ni na kꞌai alactuꞌunti ju tanavi.

28 Pus ju anuch lapanacni lana jantu tuꞌuꞌ talhiulai ju Dios.

Pus yuchi alaclhimaconilh ju Dios ni catapastaclich ju taxtokni ju jantu kꞌox chai vachuꞌ laich catanavi ju taxtokni ju jantu lhijun ni catanavi.

29 Na ixtalhavatach laꞌixꞌalhunutꞌan ju jantu soknicꞌa atsucunti.

Va tatꞌatꞌajun va tichi chavaich.

Chai na taꞌalhacchaꞌananch.

Chai na kꞌai tajunita.

Na taꞌalhaxcayanan.

Na taꞌamakninin.

Na alin ju ixlaklakꞌaitiꞌan.

Chai na taꞌaꞌokxchokꞌonun.

Chai lana va si tam talhimachakxai ju tuꞌu.

Na tapuquilhchivinin.

30 Na macxcai talhichivinin ixtꞌalapanacꞌan.

Taxcaji ju Dios.

Jantu tuꞌuꞌ talhiulai ju ixtꞌalapanacꞌan.

Na talhitakꞌayai ju tuꞌuꞌ.

Tanajun ni va yuꞌunch ju na taꞌacꞌatsananta.

Tanavi ju sastꞌi alactuꞌunti.

Chai jantu taquiclacaꞌi ju ixlacpaiꞌan.

31 Jantu taꞌacꞌatsananta.

Jantu lai tamuctaxtui ju laꞌixchivintiꞌan.

Jantu lai taꞌamapaininin tachi ju lhilapanac.

Jantu lai taꞌaꞌaktaijunun lacaꞌamapaininti.

32 Ju anuꞌ lapanacni kꞌoxich tacꞌatsai ixlhamapꞌaksin ju Dios junta najun ni lhijunch ni cataꞌalh junta jonkꞌalhita ixmakꞌalhkꞌajnatꞌan tachi chun ju tanavi ju ani taxtokni.

Para mas tamispaich tuchi najunta ju Dios para ixlaquilhtu tatailhiꞌanta ju ixꞌalactuꞌuntiꞌan.

Chai na takꞌachan acsni vachuꞌ chunch taꞌalactuꞌunun ju aliꞌin.