Ju Pablo ixvi laxalacatꞌun Malta
28
Acsni ictacutchauch ju lacaꞌalama ju amachakꞌan anch quintajunan ni Malta ixjuncan ju anuꞌ lacatꞌun.
2 Pus ju lapanacni amachakꞌan anch jantu va ti lacatsꞌunin quintamapainin.
Tamalhcula ni na ixlai ju xcan chai na lhicꞌasnin ixjunita.
Chai quintajunan ni acskꞌonvi.
3 Pus ju Pablo vachuꞌ ixtꞌajun makmakxtoknuꞌ ju qꞌuiu.
Chai tꞌampꞌulhch.
Pus lacaqꞌuiu ju xatꞌampꞌui ixꞌalin lakatam lu.
Chai ni na ichilh lacajipi pus taxtulh chai livik mactaquilhnu ju Pablo.
4 Pus ju lapanacni ju amachakꞌan anch talaktsꞌilh ju lu ni macquilhtaich laꞌixmacaꞌ ju Pablo chai talaclajunich sia yuꞌunch:
―Ju ani lapanac ca va amakniniꞌ junita.
Chai mas takꞌalhtaxtulh ju lacaꞌalama para ju Dios jantu lacasqꞌuin ni vanach catsuculh.
5 Para ju Pablo cꞌalhapꞌuxlh ju lu chai macaꞌalh lacajipi.
Chai jantu tuꞌuꞌ tapasalh.
6 Pus tachi chun ju anch ixtayanalh ixtanajunch ni ca cacꞌununiyaꞌ ju ixmacaꞌ u cataꞌaktayaꞌ xanin va tam pantsꞌiquis.
Para na panicni ixtapacxan.
Chai acsni talaktsꞌilh ni jantu tuꞌuꞌ tapasalh pus tam tapastaclh.
Ixtanajun ni ca va dios ju yuchi.
7 Pus ju xaꞌucxtin ju anuꞌ lacatꞌun Publio ixjuncan.
Chai vanin junta ictacutchauch lacaꞌalama na lhu ixꞌalin ju ixlacatꞌun.
Pus ju yuchi quintajunan ni acꞌauch lacachakaꞌ ju anch.
Chai lakatꞌutu avilhchan va lacalhikꞌach xaquintamavayan.
8 Pus ju ixpai ju Publio ixma laꞌixputaman.
Na ixtakꞌankꞌai.
Va ixchꞌapata ascacanaꞌ chai istipus.
Pus ju Pablo lakꞌalh.
Tꞌachivinilh ju Dios chai mokslanilh ixmacaꞌ laꞌixꞌucxni ixlacatuna chai lana palai va.
9 Chai ni talaktsꞌilh ni palaich va ju ixpai ju Publio pus vachuꞌ ju aliꞌin amachakꞌan anch ju va ixtalactakꞌankꞌai talakmilh ju Pablo chai palaich anavikꞌocalh.
10 Chai ju yuꞌunch na lhu lhakꞌailaktsꞌin xaquintaxtakniyan.
Chai acsni ictajuchokochauch laca alakatam barco quintaxtaknin chux tachi chun ju xacmaktasqꞌuiniyauch.
Chaꞌalh ju Pablo ju lakꞌachakꞌan Roma
11 Acsni tapasalh lakatꞌutu malhquiyuꞌ ictaju laca alakatam barco ju ixmintacha Alejandría.
Vachuꞌ va isꞌastacnanta ju anch lacalhicꞌasnin junta xacvilau.
Istsꞌokꞌulanicanta laꞌisꞌaktsulh ju barco lakatꞌui isꞌaktsulh isdiosꞌan.
Ju pumatam Cástor ixjuncan chai ju pumatam Pólux ixjuncan.
12 Pus ictaxtuch chai icchaꞌauch lakꞌachakꞌan Siracusa.
Chai ju anch ictolhchau lakatꞌutu avilhchan.
13 Chai ictajuchokoch lacabarco.
Ictaxtuch ju anch chai xacquilhtuꞌantauch ju lacxcan tus icchaꞌauch ju lakꞌachakꞌan Regio.
Acsni tuncunchokolh lalh ju un ju minachalh ju lhisur.
Pus ictaxtuchokoch chai ixlhilakatꞌui avilhchan icpuchaꞌauch ju lakꞌachakꞌan Puteoli.
Chai anchach ju ictacutchauch ju lacabarco chai astan va lacatꞌun ju icpuꞌau.
14 Ju anch iclhitajuchau ju quilhiꞌalakꞌavin laꞌixmacni Jesús.
Chai ju yuꞌunch kꞌasi quintajuninch ni acꞌalactꞌatolhchau tachi tam semana.
Chai ictolhchau.
Astan ictaxtuchokopalau chai icchꞌapachokopalau ju xati Roma.
15 Pus ju quilhiꞌalakꞌavinꞌan laꞌixmacni Jesús ju ixtavilanancha lakꞌachakꞌan Roma takꞌasmatlh ni icmintauch ju lacati.
Pus ju aliꞌin quintaquipakxtokchin tus ju lakꞌachakꞌan junta Tres Tabernas ixjuncan.
Ju aliꞌin palai makat quintaquipakxtokchin.
Pus ju Pablo acsni alaktsꞌilh ju yuꞌunch lana xtaknilh lakꞌailaktsꞌiuch ju Dios chai na kꞌachalh.
16 Pus acsni icchaꞌauch ju Roma ju xacapitán amakꞌaxtaklh ju tachꞌinin.
Axtaknilh ju xaꞌucxtin ixtaropajni ju kꞌai ucxtin.
Para ju Pablo yau junicalh ni va isꞌakstu catanu lacachakaꞌ ju ismatsꞌisqꞌuinlh.
Va pumatam taropa tꞌaꞌalh ni calhistaclh.
Ju Pablo ajuni ju amachakꞌan Roma ixchivinti Dios
17 Chai acsni tapasalh lakatꞌutu avilhchan pus ju Pablo alactꞌasanilh ju xalackꞌajin istꞌaꞌisraelitanin.
Chai acsni tatakꞌaixtoklh chani alacjuni:
―Ju quitꞌin ji quintꞌalapanacni jantu tuꞌuꞌ iclanavinitau talakꞌalhin ju uxijnan ju quintꞌaꞌisraelitanin untꞌatꞌit.
Nin yuchi ni acsamakꞌalh tachi ju quintamalanitan ju makꞌaniya quilacpaꞌitniꞌan.
Para mas jantu tuꞌuꞌ icnavita para tachꞌin xacnavicantacha ju lakꞌachakꞌan Jerusalén chai xacmakꞌaxtaknicanta laꞌixmacaꞌan ju romanonin.
18 Pus ju yuꞌunch acsni quintamakꞌosaspitlh xaquintamacomputunch ni jantu tuꞌuꞌ talakꞌalhin ju xaquintalhitajuni ju lai aclhimapalalh ju quiꞌaninti.
19 Para ju quintꞌaꞌisraelitaninꞌan jantu ixtalakꞌaꞌi ni acmacajuncalh.
Pus tapꞌastu icsqꞌuinlh ni yuchi ju César ju aquilakꞌoxinilh ju quilhamakꞌan para jantu va icꞌamucꞌaniputun tuꞌuꞌ talakꞌalhin ju quintꞌaꞌamachakꞌan.
20 Pus yuchi iclhilatꞌasaniyau ni xaclalaktsꞌimputunau chai xaclatꞌachivimputunau.
Va xaclajumputunau ni tachꞌin icnavicanta lacacadena va ixlacaꞌatalh ni iclhilacaꞌanta ju yuchi ju xaquintajuntan ju Dios ni aquintamalakachanitachan ju quijnanꞌan ju israelitanin juntau ni aquintamakꞌalhtaxtuyan.
21 Chai ju lapanacni tajunich:
―Pus ju quijnan jantu icꞌamaklhtayanantauch tuꞌuꞌ alhiqui ju milacata ju tuꞌuch caminchalh ju Judea.
Chai jantu xamatiꞌ ju quiꞌalakꞌavin ju laich camilh xtaknaꞌ tuꞌuꞌ chivinti ni lai catanaulh tuꞌuꞌ macxcai ju milacata ju uxintꞌi.
22 Para iccꞌatsayauch ni ixlhilacaputsꞌun ju lacamunutpaꞌ va tatꞌalaxcaji ju talacaꞌi tachi ju lacꞌaꞌich ju uxintꞌi.
Pus yuchi iclhilakꞌasmatniputunauch tuchꞌi lacꞌaꞌich ju uxintꞌi.
23 Pus talhcaꞌulanilh lakatam avilhchan chai ju acsnich na lhu talakmilh ju Pablo junta ixtanun.
Chai vatsꞌisin tus tokꞌoxai ju yuchi ixꞌalacjuni ixlacata ju Dios ni lhinomputun laꞌisꞌatsucuntiꞌan ju lapanacni.
Ixꞌamavasalani tuchi ixnajun ju Moisés laꞌixlhamapꞌaksin.
Chai ixꞌamavasalani ju tuchi ixtanajun ju makꞌaniya lapanacni ju ixtanajun ixchivinti Dios.
Va ixꞌalacmalacaꞌiniputun ni Jesús vasalh yuchi ju anuch ju ixnoncan camalakachatachilh ju Dios.
24 Pus ju aliꞌinch talacaꞌilh tuchi ixꞌajuni ju Pablo.
Para ju aliꞌin jantu talacaꞌilh.
25 Chai acsni jantu lai va lakatam ixtanavi ixꞌatalacpastꞌacꞌatꞌan pus va ixtataxtuputun ju yuꞌunch ju jantu kꞌox ixtalhiulai ixchivinti ju Pablo.
Para ju Pablo chani ajuni:
―Ju Spiritu Santu xtaknilh ju chivinti ju ixnajun ju makꞌaniya lapanac ju Isaías ixjuncan.
Ju yuchi ixnajun ixchivinti Dios.
Chai vas ju ajuni ju makꞌaniya quilacpaꞌitniꞌan.
26 Ju Isaías junicalh ni calakꞌalh ju anuꞌ lapanacni chai caꞌalacjunach ni ma slivasalh catakꞌasmatꞌaꞌ para ma jantu catitamachakxayaꞌ.
Ma slivasalh catalaktsꞌinaꞌ tuꞌuꞌ para ma jantu tavanan catanavini cuenta ju tuchi talaktsꞌinta.
27 Ma na pꞌas tanavita ju ixꞌalhunutꞌan ni jantu tamachakxaputun.
Ma jantu takꞌasmatputun ni jantu tanaviputun.
Ma jantu talaktsꞌimputun tuꞌuꞌ ni jantu talacaꞌiputun ju tuchi catalaktsꞌilh.
Ma jantu tamacomputun ju macxcai isꞌatsucuntiꞌan ni laich caꞌamacꞌacxanilh ju Dios ixtalakꞌalhinꞌan.
Ma chunch ju naulh ju Dios.
28 Pus ju chavai acꞌatsꞌatꞌit ni chavai chai atipuꞌanta acꞌajunau ju jantu quintꞌaꞌisraelitaninꞌan ta yu laich caꞌamakꞌalhtaxtuyaꞌ ju Dios ni jantu catitaꞌalh ju lacajipi.
Chai ju yuꞌunch catalacaꞌiyaꞌ.
29 Pus acsni naulh junima chivinti ju Pablo pus ju istꞌaꞌisraelitanin tataxtulh chai na lhu chivinti ixtalaclajuni ju sia ixlhiꞌakstuꞌan.
30 Pus ju Pablo tolhcha ju lakꞌachakꞌan Roma lakatꞌui cꞌata lacachakaꞌ ju ismatsꞌisquinta.
Chai kꞌox alactꞌachivinilh tachi chun ju ixtalakminch ju anch.
31 Va lhikꞌach ixꞌajuni ju lapanacni ni lhinomputun ju Dios laꞌisꞌatsucuntiꞌan.
Chai ixꞌajuni ixlacata ju kꞌai ixꞌucxtin ju Jesucristo juncan.
Chai jantu xamatiꞌ xajuni ni jantu chunch catilalh.